Surat Road Horror: ચોમાસાની શરૂઆત થતાં જ સુરત મહાનગરપાલિકા (SMC) ની પ્રી-મોન્સૂન કામગીરીની પોલ ખુલી ગઈ છે. શહેરના લિંબાયત ઝોનમાં આવતા ડિંડોલી વિસ્તારમાં પાલિકા અને કોન્ટ્રાક્ટરની ઘોર બેદરકારી સામે આવી છે, જ્યાં તાજેતરમાં જ કરોડોના ખર્ચે બનેલો નવો નકોર રોડ અચાનક બેસી ગયો હતો. આ રોડ ધસી પડવાને કારણે ત્યાંથી પસાર થઈ રહેલું એક ભારેભરખમ ડમ્પર રસ્તાની વચ્ચે જ ખૂંપી ગયું હતું. પીક અવર્સમાં બનેલી આ ઘટનાને કારણે હજારો વાહનચાલકો કલાકો સુધી ટ્રાફિક જામમાં અટવાયા હતા, જેને પગલે જનતામાં પાલિકા તંત્ર સામે ભારે આક્રોશ જોવા મળી રહ્યો છે.
Surat Road Horror: યોગ્ય પુરાણ કર્યા વિના જ ઉતાવળે બનાવી દીધો રોડ
સ્થાનિક સૂત્રો પાસેથી મળતી માહિતી મુજબ, લિંબાયત ઝોન હેઠળ આવેલી માનસી રેસિડેન્સીની સામે અને પાણીની ટાંકી નજીક થોડા સમય પહેલાં જ ડ્રેનેજ લાઇન નાખવાની કામગીરી કરવામાં આવી હતી. સ્થાનિક રહીશોનો સીધો આક્ષેપ છે કે, ડ્રેનેજ લાઇન માટે જે મોટો ખાડો (ટ્રેન્ચ) ખોદવામાં આવ્યો હતો, તેને પુરવામાં પાલિકાના કોન્ટ્રાક્ટરે ભારે વેઠ ઉતારી હતી. યોગ્ય ટેકનિકલ ધોરણો મુજબ માટીનું પુરાણ કે રોલિંગ કર્યા વિના જ, ચોમાસા પહેલાં કામગીરી પૂર્ણ બતાવવાની ઉતાવળમાં ઉપરથી ડામરનો નવો રોડ બનાવી દેવાયો હતો.
Surat Road Horror: સવારે પીક અવર્સમાં રોડ બેસી ગયો અને ડમ્પર ફસાયું
તંત્રની આ નબળી અને લોલંલોલ કામગીરીનું પરિણામ આજે સવારે જોવા મળ્યું હતું. સવારના સમયે જ્યારે રોડ પર વાહનોની ભારે અવરજવર હતી, ત્યારે અચાનક રસ્તા પર મોટી તિરાડો પડવા લાગી હતી અને જોતજોતામાં રસ્તાનો એક મોટો ભાગ અંદર તરફ ધસી પડ્યો હતો. બરાબર એ જ સમયે ત્યાંથી પસાર થઈ રહેલું એક ડમ્પર આ ખાડામાં ફસાઈ ગયું હતું. ડમ્પર રસ્તાની વચ્ચે જ નમી પડતાં આખો માર્ગ બ્લોક થઈ ગયો હતો. ઑફિસ, ધંધા-રોજગાર કે શાળા-કોલેજે જવા નીકળેલા હજારો નાગરિકો કલાકો સુધી ટ્રાફિકમાં અટવાઈ પડ્યા હતા.
Surat Road Horror: ભ્રષ્ટાચારના આક્ષેપો સાથે જનતાનો ભારે આક્રોશ
ચોમાસું માથે છે ત્યારે જ કરોડો રૂપિયાના ખર્ચે બનેલા રસ્તાઓ સામાન્ય વરસાદ કે વાહનોના વજનથી તૂટી જાય, તે પાલિકાની ગુણવત્તા સામે મોટા સવાલો ઊભા કરે છે. લિંબાયતના રહીશોએ રોષે ભરાઈને જણાવ્યું કે, આ કામગીરીમાં મોટા પાયે ભ્રષ્ટાચાર આચરવામાં આવ્યો છે. જનતાના ટેક્સના પૈસાનું પાણી કરનારા જવાબદાર અધિકારીઓ અને કોન્ટ્રાક્ટર વિરુદ્ધ તાત્કાલિક કડક તપાસ કરી પગલાં લેવામાં આવે તેવી માંગ ઉઠી છે.
Surat Road Horror: મોડે મોડે જાગેલું પાલિકા તંત્ર દોડતું થયું
ઘટનાની ગંભીરતાને જોતાં સુરત મહાનગરપાલિકાના હાઇડ્રોલિક અને રોડ પ્રોજેક્ટ વિભાગના અધિકારીઓનો કાફલો જેસીબી અને ક્રેન સાથે ઘટનાસ્થળે દોડી આવ્યો હતો. ભારે જહેમત બાદ ફસાયેલા ડમ્પરને બહાર કાઢવાની અને રસ્તાના તાકીદના સમારકામ (પેચવર્ક) ની કામગીરી શરૂ કરવામાં આવી હતી. જોકે, આ ઘટનાએ સુરત પાલિકાના સ્માર્ટ સિટીના દાવાઓ અને પ્રી-મોન્સૂન તૈયારીઓની ગુણવત્તા પર મોટું પ્રશ્નાર્થચિહ્ન મૂકી દીધું છે.
વધુ સમાચાર વાંચવા માટે અંહી ક્લિક કરો
