Diwali Travel Rush: દિવાળી અને છઠ્ઠ પૂજાના તહેવારો નજીક આવતાં જ સુરત અને ઉધના રેલવે સ્ટેશન પર વતન જવા માગતા શ્રમિકો અને મુસાફરોની ભારે ભીડ ઉમટી પડી છે. ખાસ કરીને ઉત્તર પ્રદેશ અને બિહાર તરફ જતી ટ્રેનોમાં મુસાફરોનો ધસારો સતત વધી રહ્યો છે. તહેવારો પહેલાં રવિવારે વતન જવા નીકળેલા હજારો મુસાફરોને કારણે ઉધના રેલવે સ્ટેશનનો હોલ્ડિંગ એરિયા શનિવારે રાત્રે જ સંપૂર્ણ ભરાઈ ગયો હતો. પરિસ્થિતિને પહોંચી વળવા રેલવે તંત્ર દ્વારા રાતથી સવાર સુધીમાં છ ટ્રેનો દોડાવવામાં આવી હતી. આ ટ્રેનો મારફતે અંદાજે 25 હજાર મુસાફરોને વતન રવાના કરવામાં આવ્યા હતા. જોકે, આટલી મોટી સંખ્યામાં મુસાફરો રવાના થયા હોવા છતાં દિવસ દરમિયાન વધુ ભીડ થવાની શક્યતા યથાવત્ રહી હતી.
Diwali Travel Rush: રાતથી સવાર સુધી છ ટ્રેનો દોડાવી, 25 હજાર મુસાફરોને રાહત
ઉધના રેલવે સ્ટેશન પર મુસાફરોનો ધસારો વધતાં રેલવે પ્રશાસને અગાઉથી વિશેષ આયોજન કર્યું હતું. રવિવારે સવારે 8:30 વાગ્યે ઉપડતી અંત્યોદય એક્સપ્રેસમાં ભારે ભીડ થવાની શક્યતાને ધ્યાનમાં રાખીને શનિવાર રાતથી જ વધારાની સ્પેશિયલ ટ્રેનો દોડાવવાનું શરૂ કરવામાં આવ્યું હતું.
શનિવારે રાત્રે 11:30 વાગ્યે હસનપુર માટે પ્રથમ વિશેષ ટ્રેન રવાના કરવામાં આવી હતી. ત્યારબાદ રાત્રે 1:30 વાગ્યે મધુબની માટે ટ્રેન દોડાવવામાં આવી હતી. વહેલી સવારે 3:30 અને 5:30 વાગ્યે જયનગર માટે વિશેષ ટ્રેનો રવાના કરવામાં આવી હતી. આ ઉપરાંત સવારે 8:30 વાગ્યે જયનગર માટે અંત્યોદય એક્સપ્રેસ અને સવારે 10:20 વાગ્યે તાપ્તી ગંગા એક્સપ્રેસ મુસાફરોને લઈને રવાના થઈ હતી.
આ છ ટ્રેનો મારફતે સવાર સુધીમાં આશરે 25 હજાર મુસાફરો વતન પહોંચવા માટે રવાના થયા હતા. પરિણામે હોલ્ડિંગ એરિયામાં ભીડ થોડી હળવી થઈ હતી. તેમ છતાં મુસાફરોની સંખ્યા વધુ રહેવાની શક્યતાને ધ્યાનમાં રાખીને સવારે 11:30 અને બપોરે 1:30 વાગ્યે જયનગર માટે વધારાની સ્પેશિયલ ટ્રેનો સ્ટેન્ડબાય રાખવામાં આવી હતી.
Diwali Travel Rush: કલાકો સુધી લાઇનમાં ઊભા રહેવા છતાં ટ્રેન ચૂકી જતા મુસાફરો
સ્ટેશન પર મુસાફરોની ભારે ભીડને કારણે અનેક લોકોને મુશ્કેલીઓનો સામનો કરવો પડી રહ્યો છે. અબુધાબીથી સુરત આવેલા મુસાફર મુહમ્મદ દિલશાદ આલમે જણાવ્યું હતું કે તેઓ એક કોર્સ માટે સુરત આવ્યા હતા અને વેકેશન દરમિયાન પોતાના ઘરે જવા માગતા હતા. નિયમિત ટ્રેનોમાં કન્ફર્મ સીટ ન મળતાં તેઓ સ્પેશિયલ ટ્રેન પકડવા ઉધના સ્ટેશન પહોંચ્યા હતા.
તેમના જણાવ્યા અનુસાર, તેઓ સવારે 7 વાગ્યાથી લાઇનમાં ઊભા હતા, પરંતુ ભારે ભીડને કારણે સવારે 8:30 વાગ્યાની પટના જતી ટ્રેન ચૂકી ગયા હતા. હવે સવારે 11 વાગ્યાની ટ્રેનમાં જગ્યા મળશે કે નહીં તેની પણ તેમને ખાતરી નહોતી. તેમણે જણાવ્યું કે ઘણા મુસાફરો વહેલી સવારે 4થી 5 વાગ્યાથી લાઇનમાં ઊભા રહેવા છતાં ટ્રેન પકડી શકતા નથી. તમામ મુસાફરો એક જ જગ્યાએ ભેગા થતાં મુશ્કેલી વધી રહી છે, તેથી મુસાફરોને અલગ-અલગ વ્યવસ્થિત લાઇનમાં રાખવાની જરૂર છે.
Diwali Travel Rush: એસી અને રિઝર્વેશન કોચમાં પણ મુસાફરોની ભીડ
ઉત્તર પ્રદેશના જૌનપુરના રહેવાસી વિનયસિંહે ટ્રેનની અંદરની સ્થિતિ અંગે ચિંતા વ્યક્ત કરી હતી. તેમના જણાવ્યા અનુસાર, પ્લેટફોર્મ પર અગાઉની સરખામણીએ વ્યવસ્થા સુધરી છે અને નાસભાગની સ્થિતિમાં પણ ઘટાડો થયો છે, પરંતુ ટ્રેનમાં મુસાફરોની સંખ્યા ઘણી વધારે છે.
તેમણે જણાવ્યું કે એસી, રિઝર્વેશન અને જનરલ કોચ વચ્ચે પણ ભીડની સ્થિતિમાં ખાસ તફાવત જોવા મળતો નથી. એસી કોચમાં પણ વેઇટિંગ ટિકિટ ધરાવતા મુસાફરો સીટ પર બેસી જતા હોવાથી કન્ફર્મ ટિકિટ ધરાવતા મુસાફરોને મુશ્કેલી પડે છે. અનેક મુસાફરો પેસેજમાં અને શૌચાલયની આસપાસ પણ બેસવા મજબૂર બને છે.
ખાસ કરીને નાના બાળકો સાથે મુસાફરી કરતા પરિવારો માટે આવી સ્થિતિ વધુ મુશ્કેલ બની જાય છે. ખાવા-પીવાની અને અન્ય પ્રાથમિક સુવિધાઓ મેળવવામાં પણ મુશ્કેલી પડે છે. વિનયસિંહે મુસાફરોની વધતી સંખ્યાને ધ્યાનમાં રાખીને તાપ્તી ગંગા એક્સપ્રેસ જેવી એકથી બે વધારાની દૈનિક ટ્રેનો શરૂ કરવાની માગ કરી હતી.
Diwali Travel Rush: 10 હજાર ચોરસ મીટરમાં વિશાળ હોલ્ડિંગ એરિયા તૈયાર
મુસાફરોના વધતા ધસારાને પહોંચી વળવા પશ્ચિમ રેલવે દ્વારા ઉધના સ્ટેશન પર વિશેષ વ્યવસ્થાઓ ઊભી કરવામાં આવી છે. DRM પંકજસિંહના જણાવ્યા અનુસાર, છેલ્લા ચાર મહિનામાં રેકોર્ડ સમયમાં વિશાળ પેસેન્જર સુવિધા કેન્દ્ર તૈયાર કરવામાં આવ્યું છે.
જૂની વ્યવસ્થા સાથે નવી સુવિધાઓનો વિસ્તાર કરવામાં આવતાં હવે કુલ 10 હજાર ચોરસ મીટરના વિસ્તારમાં આશરે 15થી 20 હજાર મુસાફરો રોકાઈ શકે તેવી ક્ષમતા ઊભી થઈ છે. મુસાફરોની સુવિધા માટે 40 મોટા પંખા, 200 લાઇટ્સ અને 150 સ્પીકર્સ લગાવવામાં આવ્યાં છે. પીવાના પાણીની વ્યવસ્થા ઉપરાંત ટિકિટ મેળવવામાં સરળતા રહે તે માટે 10 નવી ટિકિટ બારીઓ પણ શરૂ કરવામાં આવી છે.
સ્વચ્છતા અને આરોગ્યની સુવિધાને ધ્યાનમાં રાખીને પુરુષો માટે 50 અને મહિલાઓ માટે 30 શૌચાલયોની વ્યવસ્થા કરવામાં આવી છે. રેલવે તંત્રનો પ્રયાસ છે કે મુસાફરોને સ્ટેશન પર રાહ જોતી વખતે જરૂરી સુવિધાઓ મળી રહે અને ભીડનું વ્યવસ્થિત સંચાલન થઈ શકે.
Diwali Travel Rush: પ્લેટફોર્મ નંબર 6ને હાઈ-લેવલ પ્લેટફોર્મમાં ફેરવાયું
મુસાફરોને ટ્રેનમાં ચઢવા અને ઉતરવામાં પડતી મુશ્કેલીઓ દૂર કરવા પ્લેટફોર્મ નંબર 6નું પણ નવીનીકરણ કરવામાં આવ્યું છે. અગાઉ આ પ્લેટફોર્મ રેલ-લેવલનું હોવાથી મુસાફરોને ટ્રેનમાં ચઢવા અને સામાન સાથે ઉતરવા માટે મુશ્કેલી પડતી હતી. હવે તેને હાઈ-લેવલ પ્લેટફોર્મમાં ફેરવી દેવામાં આવ્યું છે. સાથે જ પ્લેટફોર્મ પર નવું સરફેસિંગ અને છતની વ્યવસ્થા પણ કરવામાં આવી છે.
Diwali Travel Rush: એક દિવસમાં 35 હજારથી વધુ મુસાફરો રવાના થવાનો અંદાજ
રેલવે અધિકારીઓના જણાવ્યા અનુસાર, ગયા વર્ષે પીક સીઝન દરમિયાન એક દિવસમાં આશરે 35 હજાર મુસાફરો વતન જવા રવાના થયા હતા. આ વર્ષે પણ રવિવારે આખા દિવસ દરમિયાન 35 હજારથી વધુ મુસાફરો રવાના થાય તેવી શક્યતા છે. મુંબઈ મંડળમાંથી અત્યાર સુધીમાં અંદાજે દોઢ લાખ મુસાફરો વતન જવા રવાના થઈ ચૂક્યા છે. તહેવારોની સીઝન પૂર્ણ થાય ત્યાં સુધીમાં આ આંકડો અઢી લાખને પાર પહોંચવાનો અંદાજ છે.
Diwali Travel Rush: RPF, GRP અને સિટી પોલીસની ટીમો તહેનાત
મુસાફરોની સુરક્ષા અને ભીડનું નિયંત્રણ જાળવવા RPF, GRP અને સ્થાનિક સિટી પોલીસના જવાનોને મોટી સંખ્યામાં તહેનાત કરવામાં આવ્યા છે. આ ઉપરાંત 100થી 150 ટિકિટ ચેકર્સ પણ કામગીરીમાં જોડાયા છે. ટ્રેનો સમયસર દોડી શકે તે માટે ટેકનિકલ, મિકેનિકલ અને ઇલેક્ટ્રિકલ વિભાગની ટીમો સતત કાર્યરત છે. ટ્રેનોની તપાસ, જરૂરી સમારકામ અને સફાઈની કામગીરી પણ કરવામાં આવી રહી છે.
દિવાળી અને છઠ્ઠ પૂજાના કારણે વતન જવા માટે મુસાફરોનો ધસારો હજુ થોડા દિવસો સુધી યથાવત્ રહેવાની શક્યતા છે. રેલવે તંત્ર દ્વારા વધારાની ટ્રેનો અને મુસાફરો માટેની સુવિધાઓ ઊભી કરવામાં આવી હોવા છતાં કન્ફર્મ ટિકિટ, ટ્રેનમાં જગ્યા અને ભીડના નિયંત્રણ જેવા પ્રશ્નો મુસાફરો માટે પડકારરૂપ બની રહ્યા છે.
વધુ સમાચાર વાંચવા માટે અંહી ક્લિક કરો
