Rajkot Liquor Party Raid: રાજકોટમાં દારૂબંધીના કાયદાના અમલ વચ્ચે એક હાઈ-પ્રોફાઈલ દારૂ પાર્ટીનો પર્દાફાશ થતાં શહેરમાં ભારે ચકચાર મચી ગઈ છે. રાજકોટના કાલાવડ રોડ પર આવેલી સરાઝા હોટેલમાં 31 ઓક્ટોબરની મોડી રાત્રે LCB ઝોન-2ની ટીમે ઓચિંતી રેડ પાડીને દારૂની મહેફિલ ઝડપી હતી. આ પાર્ટીમાં 43 પુરુષો અને 33 મહિલાઓ સહિત કુલ 76 લોકો હાજર હોવાનું પોલીસ તપાસમાં સામે આવ્યું છે. પોલીસ દ્વારા સ્થળ પરથી વિદેશી દારૂનો જથ્થો અને દારૂની ખાલી બોટલો કબજે કરવામાં આવી છે.
Rajkot Liquor Party Raid: બર્થડે ઉજવણીની આડમાં યોજાઈ હતી પાર્ટી
પ્રાથમિક વિગતો અનુસાર, ડેકોરા ગ્રુપ સાથે સંકળાયેલા ચિરાગ અરવિંદ પટેલનો જન્મદિવસ 12 નવેમ્બરે આવતો હોવાથી એડવાન્સમાં ઉજવણીનું આયોજન કરવામાં આવ્યું હતું. દિવાળીના તહેવાર દરમિયાન જન્મદિવસ આવતો હોવાથી સરાઝા હોટેલમાં આ પાર્ટી યોજાઈ હોવાનું જાણવા મળ્યું છે. જોકે, ઉજવણી દરમિયાન દારૂની મહેફિલ ચાલી રહી હોવાની માહિતી સામે આવતાં પોલીસ તંત્ર સક્રિય બન્યું હતું.
Rajkot Liquor Party Raid: વીડિયો સામે આવ્યા બાદ LCBની કાર્યવાહી
31 ઓક્ટોબરની રાત્રે આશરે 12 વાગ્યાની આસપાસ હોટેલમાં દારૂની પાર્ટી ચાલી રહી હોવાનો વીડિયો સામે આવ્યો હતો. ત્યારબાદ રાજકોટ LCB ઝોન-2ની ટીમે રાત્રે આશરે 1 વાગ્યે હોટેલમાં દરોડો પાડ્યો હતો. પોલીસની કાર્યવાહી શરૂ થતાં જ હોટેલમાં અફરાતફરીનો માહોલ સર્જાયો હતો. પાર્ટીમાં રાજકોટ અને મોરબીના જાણીતા ઉદ્યોગપતિઓ તેમજ નામાંકિત વ્યક્તિઓ હાજર હોવાની ચર્ચા પણ સામે આવી છે. જોકે, આ અંગેની સત્તાવાર પુષ્ટિ તપાસના આધારે જ થઈ શકશે.
Rajkot Liquor Party Raid: મોઢું છુપાવવા ટેબલ-ખુરશીના કવરનો ઉપયોગ
આ સમગ્ર ઘટનામાં સૌથી વધુ ચર્ચા મહિલાઓને મેડિકલ તપાસ માટે લઈ જતી વખતે જોવા મળેલા દૃશ્યોની થઈ રહી છે. પોલીસ દ્વારા પાર્ટીમાં હાજર 33 મહિલાઓને મેડિકલ તપાસ માટે સિવિલ હોસ્પિટલ લઈ જવામાં આવી હતી. આ દરમિયાન કેમેરામાં ઓળખ ન દેખાય તે માટે કેટલીક મહિલાઓએ મોઢા પર ટેબલ અને ખુરશીના કવર બાંધ્યાં હતાં. આ દૃશ્યો સામે આવતાં સમગ્ર મામલો વધુ ચર્ચાસ્પદ બન્યો હતો.
Rajkot Liquor Party Raid: હોટેલની લાઈટો બંધ થતાં અનેક સવાલો
પોલીસ કાર્યવાહી દરમિયાન હોટેલની બહાર અને અંદર લાઈટો બંધ કરી દેવામાં આવી હોવાની વિગતો પણ સામે આવી છે. રાત્રે આશરે 3 વાગ્યાથી વીજળી બંધ થવાની શરૂઆત થઈ હતી અને ત્યારબાદ હોટેલની લાઈટો સંપૂર્ણપણે બંધ થઈ ગઈ હતી. બીજી તરફ, હોટેલના પાર્કિંગમાં મોંઘીદાટ લક્ઝરી કારોની લાંબી લાઈન જોવા મળી હતી. આ ઘટનાને પગલે હોટેલની વ્યવસ્થા અને પાર્ટીના આયોજન અંગે અનેક સવાલો ઊભા થયા છે.
Rajkot Liquor Party Raid: ટેબલ પર દારૂ ભરેલા ગ્લાસ મળી આવ્યા: ACP
સવારે આશરે 5 વાગ્યે રાજકોટ પશ્ચિમ ઝોનના ACP બી.જે. ચૌધરીએ સમગ્ર મામલે પ્રાથમિક સત્તાવાર વિગતો આપી હતી. તેમના જણાવ્યા અનુસાર, પોલીસ હોટેલમાં પહોંચી ત્યારે ટેબલ પર દારૂ ભરેલા ગ્લાસ અને આસપાસ દારૂની ખાલી બોટલો મળી આવી હતી. પોલીસે વિદેશી દારૂનો જથ્થો કબજે કર્યો છે. પ્રાથમિક તપાસ દરમિયાન દારૂ સિવાય અન્ય કોઈ નશાકારક પદાર્થ મળી આવ્યો ન હોવાનું પણ તેમણે જણાવ્યું હતું.
Rajkot Liquor Party Raid: મેડિકલ રિપોર્ટ બાદ વધુ વિગતો સામે આવશે
ACP બી.જે. ચૌધરીએ જણાવ્યું હતું કે પાર્ટીમાં હાજર કેટલા લોકોએ દારૂનું સેવન કર્યું હતું તે અંગે હાલ ચોક્કસ કહી શકાય તેમ નથી. તમામ સંબંધિત વ્યક્તિઓના મેડિકલ પરીક્ષણના અંતિમ અહેવાલ આવ્યા બાદ જ હકીકત સ્પષ્ટ થશે. આ ઉપરાંત દારૂની વ્યવસ્થા હોટેલ સંચાલકો દ્વારા કરવામાં આવી હતી કે અન્ય કોઈ વ્યક્તિ દ્વારા કરવામાં આવી હતી તે દિશામાં પણ તપાસ હાથ ધરવામાં આવી છે.
સમગ્ર મામલે હોટેલ મેનેજર સામે ગુનો નોંધવાની કાર્યવાહી કરવામાં આવી છે. પોલીસ દ્વારા પાર્ટીના આયોજન, દારૂના જથ્થાની વ્યવસ્થા અને તેમાં સંડોવાયેલા લોકોની ભૂમિકા અંગે વધુ તપાસ કરવામાં આવી રહી છે. રાજકોટની સરાઝા હોટેલમાં યોજાયેલી આ પાર્ટી હવે શહેરમાં ચર્ચાનો વિષય બની છે.
વધુ સમાચાર વાંચવા માટે અંહી ક્લિક કરો: અમેરિકામાં ગાંધીજીના પૌત્રની 30.76 એકર જમીન પરથી દબાણ દૂર થશે, 20 મહિનાની કાનૂની લડાઈ બાદ સુરતના ટ્રસ્ટની ઐતિહાસિક જીત, જમીન વેચીને ગરીબ બાળકો માટે બનશે સેન્ટર ઓફ એક્સલન્સ
