Gujarat Police: ગુજરાતમાં નશીલા પદાર્થો (ડ્રગ્સ)ના દૂષણને જડમૂળથી ઉખાડી ફેંકવા માટે રાજ્ય પોલીસે એક ખૂબ જ મોટો અને મહત્વપૂર્ણ નિર્ણય લીધો છે. રાજ્યભરમાં ડ્રગ્સ વિરોધી અભિયાનને વધુ આક્રમક અને વ્યાપક બનાવવા માટે રાજ્ય પોલીસ વડા (DGP) શ્રી જી.એસ. મલિકે તમામ પોલીસ એકમોને કડક આદેશો જારી કર્યા છે. હવેથી NDPS (નાર્કોટિક ડ્રગ્સ એન્ડ સાયકોટ્રોપિક સબસ્ટાન્સિસ) એક્ટ હેઠળ ગુના નોંધવાની જવાબદારી માત્ર ક્રાઇમ બ્રાન્ચ કે સ્પેશિયલ ઓપરેશન્સ ગ્રુપ (SOG) પૂરતી મર્યાદિત નહીં રહે, પરંતુ રાજ્યના તમામ સ્થાનિક પોલીસ સ્ટેશનોએ પણ ડ્રગ્સના કેસો શોધીને ફરજિયાત નોંધવાના રહેશે.
નાયબ મુખ્યમંત્રી શ્રી હર્ષ સંઘવીના નેતૃત્વમાં ગુજરાતે ડ્રગ્સ સામે ‘ઝીરો ટોલરન્સ’ નીતિ અપનાવી છે. આ નીતિ અંતર્ગત ડ્રગ્સના વેપાર, વિતરણ અને હેરફેર સાથે સંકળાયેલા તત્વો સામે કડકમાં કડક કાનૂની પગલાં લેવા માટે પોલીસ તંત્રને સંપૂર્ણ છૂટ આપવામાં આવી છે.
Gujarat Police: ઉચ્ચસ્તરીય બેઠકમાં લેવાયેલા મહત્વના નિર્ણયો અને આદેશો:
- સ્થાનિક પોલીસની જવાબદારી નક્કી થઈ: જો કોઈ બાહ્ય એજન્સી દ્વારા સ્થાનિક પોલીસ સ્ટેશનની હદમાં આવીને NDPSનો ગુનો પકડશે, તો તે વિસ્તારના સંબંધિત પોલીસ અધિકારીઓની જવાબદારી નક્કી કરવામાં આવશે અને તેમની સામે પગલાં લેવાશે.
- નાની માત્રા પર પણ કડક નજર: ઓછી માત્રામાં નશીલા પદાર્થો મળતા હોય તેવા કેસોમાં પણ સહેજ પણ ઢીલાશ રાખ્યા વિના કડક કાર્યવાહી કરવા DGP દ્વારા સૂચના અપાઈ છે.
- ગુપ્તચર આધારિત ઓપરેશન: ડ્રગ્સ પેડલરો અને મોટા સ્મગલરોનું નેટવર્ક તોડવા માટે ગુપ્ત માહિતી (Intelligence) આધારિત ચોક્કસ ઓપરેશન્સ હાથ ધરવામાં આવશે.
Gujarat Police: સપ્લાય ચેઇન તોડવા વ્યસનીઓની પૂછપરછ કરાશે
પોલીસ વડાએ સ્પષ્ટ કર્યું છે કે ડ્રગ્સના કેસમાં પકડાતા વ્યસનીઓની માત્ર ધરપકડ જ નહીં, પરંતુ તેમની વિસ્તૃત પૂછપરછ કરવામાં આવશે. આ પૂછપરછ પાછળનો હેતુ એ છે કે ડ્રગ્સ ક્યાંથી આવ્યું, તેનો મુખ્ય સપ્લાયર કોણ છે અને તેનું નેટવર્ક ક્યાં સુધી ફેલાયેલું છે તેની મૂળભૂત માહિતી મેળવી આખી સપ્લાય ચેઇનનો પર્દાફાશ કરી શકાય.
Gujarat Police: કાયદાકીય કડકાઈ સાથે માનવતાવાદી અભિગમ: કાઉન્સેલિંગ પર ભાર
ગુજરાત પોલીસ આ અભિયાનમાં માત્ર ગુનેગારોને પકડવા પૂરતી સીમિત નહીં રહે, પરંતુ નશાની લતમાં ફસાયેલા યુવાનોને બહાર લાવવા માટે માનવતાવાદી અભિગમ પણ અપનાવશે. પોલીસ વિભાગ નશાથી પ્રભાવિત વ્યક્તિઓ માટે કાઉન્સેલિંગ અને પુનર્વસન (Rehabilitation) ની સુવિધાઓ પૂરી પાડવામાં સક્રિય સહયોગ આપશે, જેથી પીડિતો ફરી સામાન્ય જીવન જીવી શકે.
સારું કામ કરનાર પોલીસકર્મીઓને અપાશે ઇનામ ડ્રગ્સ વિરોધી આ ઝુંબેશમાં જે પોલીસ કર્મચારીઓ ઉત્કૃષ્ટ કામગીરી કરશે, સફળતાપૂર્વક NDPSના કેસો શોધી કાઢશે અને તેની સચોટ તપાસ કરશે, તેમને પ્રોત્સાહિત કરવા માટે રાજ્ય સરકાર અને પોલીસ વિભાગ તરફથી ખાસ ઇનામો અને સન્માન આપવામાં આવશે.
વધુ સમાચાર વાંચવા માટે અંહી ક્લિક કરો: સુરતમાં પ્રી-મોન્સૂન કામગીરીના લીરેલીરા, લિંબાયતમાં ડ્રેનેજ લાઇન બાદ બનેલો નવો નકોર રોડ ધસ્યો, ડમ્પર ખૂંપી જતાં કલાકો સુધી ટ્રાફિક જામ
