Sensational Incident in Ahmedabad: અમદાવાદના ચડોળા તળાવ વિસ્તારમાં એક કુખ્યાત ગુનેગારને પકડવા ગયેલી ક્રાઈમ બ્રાન્ચની ટીમ પર હિંસક હુમલો થવાની અત્યંત ચોંકાવનારી અને સનસનાટીપૂર્ણ ઘટના સામે આવી છે. પોલીસ કસ્ટડી અને પકડમાંથી બચવા માટે એક હિસ્ટ્રીશીટર આરોપીએ સંયુક્ત પોલીસ કમિશનર (JCP) શરદ સિંઘલ પર છરી વડે ઘાતક હુમલો કરી દીધો હતો. JCP પર થયેલા આ હુમલાને પગલે બચાવ અને વળતા પ્રહારમાં ઉચ્ચ અધિકારીએ પોતાની સર્વિસ રિવોલ્વરથી ફાયરિંગ કરવું પડ્યું હતું, જેમાં આરોપીના પગમાં ગોળી વાગી હતી.
Sensational Incident in Ahmedabad: ગેરકાયદે હથિયારોની પૂછપરછ દરમિયાન આરોપી બન્યો હિંસક
મળતી વિગતો અનુસાર, અમદાવાદ ક્રાઈમ બ્રાન્ચને બાતમી મળી હતી કે ચડોળા તળાવ વિસ્તારમાં ગેરકાયદેસર હથિયારોની મોટી હેરફેર થવાની છે. આ બાતમીના આધારે ક્રાઈમ બ્રાન્ચની ટીમે ઈસનપુર વિસ્તારના રહેવાસી અને રીઢા ગુનેગાર મોહમ્મદ કલીમ ઉર્ફે ભૈયા અકબરખાન પઠાનને દબોચી લીધો હતો.
ત્યારબાદ ક્રાઈમ બ્રાન્ચની કચેરી ખાતે સંયુક્ત પોલીસ કમિશનર (JCP) શરદ સિંઘલ અને પોલીસ ઇન્સ્પેક્ટર (PI) આઈ.એન. ઘાસુરા દ્વારા આ આરોપીની સઘન પૂછપરછ કરવામાં આવી રહી હતી. પૂછપરછ દરમિયાન આરોપી મોહમ્મદ કલીમ અચાનક ઉગ્ર અને હિંસક બની ગયો હતો. તેણે કાયદાનો જરાય ખોફ રાખ્યા વિના, પોતાની પાસે ગુપ્ત રીતે સંતાડી રાખેલી તીક્ષ્ણ છરી બહાર કાઢીને સીધો JCP શરદ સિંઘલ પર હુમલો કરી દીધો હતો.
Sensational Incident in Ahmedabad: JCP લોહીલુહાણ, વળતા પ્રહારમાં આરોપીને વીંધી નાખ્યો
આરોપીએ કરેલા આ ઓચિંતા હુમલામાં JCP શરદ સિંઘલને હાથના ભાગે છરીનો ગંભીર ઘા વાગતા તેઓ લોહીલુહાણ થયા હતા. જોકે, આવી કટોકટીની સ્થિતિમાં અને ભારે ઝપાઝપી વચ્ચે પણ JCP શરદ સિંઘલે અદ્ભુત સાહસ બતાવ્યું હતું. તેમણે સ્વબચાવમાં અને આરોપીને ભાગતો રોકવા માટે પોતાની સર્વિસ રિવોલ્વર કાઢીને તાત્કાલિક વળતું ફાયરિંગ કર્યું હતું. પોલીસ અધિકારી દ્વારા કરવામાં આવેલા આ રાઉન્ડ ફાયરિંગમાં એક ગોળી સીધી આરોપી કલીમ ઉર્ફે ભૈયાના પગમાં વાગતા તે ત્યાં જ ઢળી પડ્યો હતો.
Sensational Incident in Ahmedabad: આરોપી પાસેથી ૪ હથિયાર જપ્ત, ૩૦થી વધુ ગુનાનો ઇતિહાસ
આ હિંસક ઘટના બાદ કચેરીમાં દોડધામ મચી ગઈ હતી. ગંભીર રીતે ઇજાગ્રસ્ત થયેલા જેસીપી શરદ સિંઘલ અને પગમાં ગોળી વાગેલા આરોપી કલીમ બંનેને તાત્કાલિક ચુસ્ત પોલીસ બંદોબસ્ત વચ્ચે સારવાર અર્થે હોસ્પિટલ ખસેડવામાં આવ્યા છે.
પોલીસે આરોપી મોહમ્મદ કલીમના કબજામાંથી કુલ ૪ ગેરકાયદેસર હથિયારો જપ્ત કર્યા છે. પોલીસ રેકોર્ડ મુજબ, આરોપી કલીમ ઉર્ફે ભૈયા સામાન્ય ગુનેગાર નથી, પરંતુ તેના વિરુદ્ધ અગાઉ હત્યા, હત્યાનો પ્રયાસ, લૂંટ અને ખંડણી (ઉઘરાણી) સહિતના ૩૦થી વધુ ગંભીર ગુનાઓ નોંધાયેલા છે. પોલીસ સ્ટેશનની અંદર જ ઉચ્ચ આઈપીએસ અધિકારી પર થયેલા આ હુમલાને પગલે સમગ્ર પોલીસ બેડામાં ભારે ચકચાર મચી ગઈ છે અને આરોપી વિરુદ્ધ ફરજ પરના અધિકારી પર જાનલેવા હુમલો કરવાનો વધુ એક ગુનો નોંધી આગળની કાર્યવાહી હાથ ધરવામાં આવી છે.
વધુ સમાચાર વાંચવા માટે અંહી ક્લિક કરો
