Tragedy in US: અમેરિકાથી ગુજરાતને હચમચાવી મૂકનારા એક અત્યંત દુઃખદ અને આઘાતજનક સમાચાર સામે આવ્યા છે. યુએસએ (USA) ના મેસેચ્યુસેટ્સ રાજ્યના વુસ્ટર શહેરમાં આવેલી એક હોટેલમાં ફાટી નીકળેલી ભીષણ આગમાં મૂળ ગુજરાતના નડિયાદના એક જ પરિવારના ત્રણ સભ્યોના ગૂંગળામણના કારણે કરુણ મોત નીપજ્યા છે. ઉજ્જવળ ભવિષ્યની આશા સાથે માત્ર બે વર્ષ પહેલાં જ અમેરિકા સ્થાયી થયેલા આ હસતા-ખેલતા પરિવારનો આ રીતે આકસ્મિક અંત આવતાં નડિયાદમાં વસતા તેમના સ્નેહીજનો અને ભારતીય સમુદાયમાં ઘેરા શોકની લાગણી વ્યાપી ગઈ છે.
Tragedy in US: ઉજ્જવળ ભવિષ્યના સપના સાથે ૨ વર્ષ પહેલાં જ અમેરિકા ગયા હતા
મળતી વિગતો અનુસાર, મૂળ નડિયાદના વતની હિતેશભાઈ સુથાર પોતાના પરિવારની આર્થિક સધ્ધરતા અને ૨૦ વર્ષની દીકરી ઈશાનીના ઉચ્ચ શિક્ષણ તેમજ પ્રગતિ માટે માત્ર બે વર્ષ પહેલાં જ વતન છોડીને અમેરિકા આવ્યા હતા. તેઓ વુસ્ટર ખાતે આવેલી ‘ઈકોનો લોજ’ (Econo Lodge) હોટેલમાં રહીને પોતાના નવા જીવનની શરૂઆત કરી રહ્યા હતા. પરંતુ નિયતિને કંઈક જુદું જ મંજૂર હતું, પરિવારનો આ નિર્ણય તેમના માટે આટલો ઘાતક સાબિત થશે તેની કોઈએ કલ્પના પણ કરી ન હતી.
Tragedy in US: હોટેલમાં અચાનક ફાટી નીકળી ભીષણ આગ
ગઈકાલે આ લોજમાં અચાનક જ અગમ્ય કારણોસર ભીષણ આગ ફાટી નીકળી હતી. આગની તીવ્રતા એટલી વધારે હતી કે જોતજોતામાં આગના લપકારા અને કાળા ડિબાંગ ધુમાડાના ગોટેગોટાએ સમગ્ર ઇમારતને પોતાની ઝપેટમાં લઈ લીધી હતી. હોટેલના રૂમની બહાર નીકળવાના તમામ રસ્તાઓ ધુમાડાથી ભરાઈ જતાં લોજમાં રોકાયેલા પ્રવાસીઓમાં ભારે અફરાતફરી અને નાસભાગ મચી ગઈ હતી.
Tragedy in US: જીવ બચાવવા બાથરૂમમાં લીધેલો આશરો જ કાળ બન્યો
બહાર નીકળવાનો કે બચવાનો કોઈ માર્ગ ન દેખાતાં, હિતેશભાઈ સુથાર, તેમના પત્ની હિનાબેન અને પુત્રી ઈશાનીએ સુરક્ષાના ભાગરૂપે પોતાના રૂમના બાથરૂમમાં આશરો લીધો હતો. તેમણે બાથરૂમનો દરવાજો અંદરથી બંધ કરી દીધો હતો જેથી આગ અને ધુમાડાથી બચી શકાય.
પરંતુ, આ નિર્ણય તેમના માટે કાળ સાબિત થયો. આગની લપેટો રૂમ સુધી પહોંચી જતાં ઝેરી અને અતિશય ગરમ ધુમાડો વેન્ટિલેશન અને દરવાજાની તિરાડો વાટે બાથરૂમની અંદર પણ પ્રવેશી ગયો હતો. નાના એવા બાથરૂમમાં ઓક્સિજન ઓછો થઈ જતાં અને ઝેરી ગેસ શ્વાસમાં જવાથી ત્રણેય સભ્યો ત્યાં જ બેભાન થઈ ગયા હતા.
Tragedy in US: ફાયર ફાઈટર્સ દરવાજો તોડી અંદર પ્રવેશ્યા ત્યાં સુધીમાં બધું ખતમ
ઘટનાની જાણ થતાં જ સ્થાનિક ફાયર બ્રિગેડની અનેક ગાડીઓ અને બચાવ ટુકડીઓ ઘટનાસ્થળે દોડી આવી હતી. ફાયર ફાઈટર્સે ભારે જહેમત બાદ આગ પર કાબૂ મેળવ્યો હતો. જો કે, આગ એટલી ભયાનક હતી કે બચાવ ટુકડીને સુથાર પરિવારના રૂમ સુધી પહોંચવામાં અને સર્ચ ઓપરેશન કરવામાં ઘણો સમય લાગી ગયો હતો.
જ્યારે ફાયર વિભાગના જવાનો બાથરૂમનો દરવાજો તોડીને અંદર પ્રવેશ્યા, ત્યારે હિતેશભાઈ, હિનાબેન અને દીકરી ઈશાની મૃત હાલતમાં મળી આવ્યા હતા. લાંબા સમય સુધી ઝેરી ધુમાડો શ્વાસમાં જવાને કારણે ત્રણેયના ગૂંગળામણથી મોત નીપજ્યા હોવાનું તબીબોએ જાહેર કર્યું હતું.
Tragedy in US: વતનમાં આક્રંદ: પાર્થિવ દેહ ભારત લાવવા તજવીજ શરૂ
આ કરુણ દુર્ઘટનાના સમાચાર નડિયાદ અને સમગ્ર ખેડા જિલ્લામાં વાયુવેગે પ્રસરતા જ સુથાર પરિવારના સગાં-સંબંધીઓ અને મિત્રવર્તુળમાં ભારે આક્રંદ મચી ગયો છે. અમેરિકી વહીવટી તંત્ર હાલમાં શોર્ટ સર્કિટ કે અન્ય કોઈ કારણસર આગ લાગી છે તેની તપાસ કરી રહ્યું છે. બીજી તરફ, નડિયાદમાં વસતા મૃતકોના સંબંધીઓ તેમના પાર્થિવ દેહને ભારત પરત લાવવા માટે યુએસએમાં રહેતા અન્ય ભારતીયો અને સરકારી વહીવટી તંત્રના સતત સંપર્કમાં છે. એક જ પરિવારના ત્રણ-ત્રણ સભ્યોના આવા કરુણ મોતના પગલે સમગ્ર નડિયાદ પંથકમાં માતમ છવાયો છે.
વધુ સમાચાર વાંચવા માટે અંહી ક્લિક કરો
