Surat Horror on Camera: સુરતના જહાંગીરપુરા વિસ્તારમાં માનવતાને શર્મસાર કરતી અને કાયદો-વ્યવસ્થા સામે સવાલો ઉઠાવતી એક અત્યંત સનસનીખેજ અને ક્રૂર ઘટના સામે આવી છે. ઓલપાડ-જહાંગીરપુરા રોડ પર વહેલી સવારે કચરો વીણી રહેલા એક ૬૦ વર્ષીય નિર્દોષ વૃદ્ધ પર એક અજાણ્યા પાપી શખસે લાકડાના ફટકા વડે તૂટી પડીને ક્રૂરતાપૂર્વક મોતને ઘાટ ઉતારી દીધા છે. હૃદય હચમચાવી મૂકનારો આ સમગ્ર હત્યાકાંડ નજીકની એક દુકાનમાં લાગેલા સીસીટીવી (CCTV) કેમેરામાં કેદ થઈ ગયો છે.
Surat Horror on Camera: આજીજી કરતા રહ્યા છતાં ૩૦ સેકન્ડમાં ૧૩ વાર ફટકા માર્યા
મળતી વિગતો અનુસાર, આ લોહીલુહાણ ઘટના ગત ૨૦ જૂનના રોજ વહેલી સવારે આશરે ૩:૨૨થી ૩:૨૬ વાગ્યાના અરસામાં બની હતી. જહાંગીરપુરા ઓલપાડ રોડ પર આવેલી ‘મહાજન આમલેટ’ નામની દુકાનની સામે જાહેર જગ્યામાં એક વૃદ્ધ કચરો વીણી રહ્યા હતા. આ દરમિયાન ત્યાં હાથમાં મોટો લાકડાનો ધોકો (ફટકો) લઈને એક અજાણ્યો શખસ ધસી આવ્યો હતો.
તેણે કાંઈ પણ વિચાર્યા વગર વૃદ્ધ પર આડેધડ હુમલો કરી દીધો હતો. સીસીટીવીમાં દેખાય છે કે માત્ર ૩૦ સેકન્ડની અંદર જ નરાધમે વૃદ્ધના માથા, હાથ અને પગના ભાગે એકપછી એક ૧૩ જેટલા જીવલેણ ઘા ઝીંક્યા હતા. વૃદ્ધ નીચે પડી ગયા અને જીવ બચાવવા આજીજી કરતા રહ્યા છતાં પણ પાપી યુવક અટક્યો નહોતો અને માથા પર સતત પ્રહાર કરી માત્ર ૪ મિનિટમાં ખેલ ખતમ કરી ત્યાંથી નાસી છૂટ્યો હતો.
Surat Horror on Camera: હોસ્પિટલમાં સારવાર દરમિયાન તોડ્યો દમ
બનાવની સવારે આશરે ૮:૦૦ વાગ્યે રોડ પરથી પસાર થતા એક રાહદારીની નજર લોહીલુહાણ હાલતમાં તરફડિયા મારતા વૃદ્ધ પર પડતા તેણે તાત્કાલિક ૧૦૮ ઈમરજન્સી એમ્બ્યુલન્સને જાણ કરી હતી. ૧૦૮ના ઈએમટી દેવીકાબેન ઘાયલ વૃદ્ધને ગંભીર હાલતમાં સુરતની નવી સિવિલ હોસ્પિટલ ખાતે લઈ આવ્યા હતા.
હોસ્પિટલના ચોપડે તપાસ કરતા વૃદ્ધનું નામ બાબુભાઈ સાવંત (ઉં.વ. ૬૦) હોવાનું અને તેઓ સારોલી ખાતે ડિલક્ષ પાન ગોલ્ડ સ્ટોલ પાસે રહેતા હોવાનું ખુલ્યું હતું. જોકે, માથાના ભાગે મગજમાં ગંભીર ઈજાઓ અને અતિશય લોહી વહી જવાના કારણે સારવાર દરમિયાન એ જ સાંજે બાબુભાઈએ દમ તોડી દીધો હતો.
Surat Horror on Camera: વાલીવારસ ન મળતા આખરે પોલીસ પોતે ફરિયાદી બની
આ મામલે શરૂઆતમાં જહાંગીરપુરા પોલીસે અકસ્માતે મોતનો ગુનો નોંધી તપાસ શરૂ કરી હતી. મૃતક બાબુભાઈના સગા-વ્હાલા કે કોઈ વાલીવારસની શોધખોળ કરવા છતાં તેમની કોઈ ભાળ મળી શકી નહોતી. બીજી તરફ સિવિલના ફોરેન્સિક પીએમ (પોસ્ટમોર્ટમ) રિપોર્ટમાં સ્પષ્ટ થયું કે વૃદ્ધનું મોત કોઈ બોથડ પદાર્થના ભારે ફટકાના કારણે માથામાં થયેલી આંતરિક ઈજાઓને લીધે જ થયું છે.
બનાવ ગુનાહિત હોવાનું અને હત્યા થઈ હોવાનું સ્પષ્ટ જણાતા, આખરે કોઈ વારસદાર ન મળતા જહાંગીરપુરા પોલીસ સ્ટેશનના પીએસઆઈ (PSI) અભિજીતસિંહ ઘરિયા પોતે સરકાર તરફથી ફરિયાદી બન્યા છે.
Surat Horror on Camera: CCTV ફૂટેજના આધારે હત્યારાની શોધખોળ શરૂ
ઘટનાસ્થળ નજીક આવેલી ‘મામા ચીકન એન્ડ મટન’ નામની દુકાનના સીસીટીવી કેમેરામાં આ ભયાનક હત્યાકાંડ કેદ થયેલો જોવા મળ્યો છે. સીસીટીવી ફૂટેજ અને પીએમ રિપોર્ટને આધારે જહાંગીરપુરા પોલીસે અજાણ્યા હત્યારા સામે આખરે આઇપીસીની કલમ હેઠળ હત્યાનો ગુનો નોંધી આગળની તપાસ હાથ ધરી છે. આ ચકચારી મર્ડર કેસની સઘન તપાસ જહાંગીરપુરાના પોલીસ ઇન્સ્પેક્ટર બી.બી. પરમાર ચલાવી રહ્યા છે અને હત્યારાને ઝડપી પાડવા અલગ-અલગ ટીમો બનાવી ચક્રો ગતિમાન કર્યા છે. વહેલી સવારે બનેલી આ ઘટનાથી સ્થાનિકોમાં પણ ભારે ફફડાટ વ્યાપી ગયો છે.
વધુ સમાચાર વાંચવા માટે અંહી ક્લિક કરો
