Big Relief for Gujarat Govt Employees:રાજ્યના હજારો કર્મચારીઓ માટે દિવાળી જેવી ખુશીના સમાચાર સામે આવ્યા છે. લાંબા સમયથી જૂની પેન્શન યોજના (OPS)ની માંગ કરી રહેલા રાજ્ય સરકારના અંદાજે 60 હજાર કર્મચારીઓને હવે મોટી રાહત મળવાની શક્યતા છે. પેન્શન એન્ડ પ્રોવિડન્ટ ફંડ નિયામકની કચેરીએ તમામ વિભાગો પાસેથી પાત્ર કર્મચારીઓની માહિતી મગાવી છે, જે જૂની પેન્શન યોજનાનો લાભ મેળવવા માટે આશાનું કિરણ સાબિત થઈ રહી છે.
Big Relief for Gujarat Govt Employees:શું છે સમગ્ર મામલો?
રાજ્યમાં 1 એપ્રિલ, 2005 પછી નોકરીમાં જોડાયેલા કર્મચારીઓ માટે નવી પેન્શન યોજના (NPS) લાગુ કરવામાં આવી હતી. જોકે, ઘણા એવા કર્મચારીઓ છે જેમની ભરતી પ્રક્રિયા અથવા જાહેરાત 2005 પહેલા થઈ ગઈ હતી, પરંતુ વહીવટી વિલંબ, કોર્ટ કેસ કે અન્ય કાનૂની વિવાદોના કારણે તેમની નિમણૂક 2005 પછી થઈ હતી. આવા અંદાજિત 60 હજાર કર્મચારીઓ લાંબા સમયથી OPSના લાભથી વંચિત હતા, જે હવે તેમને મળવા પાત્ર બનશે.
Big Relief for Gujarat Govt Employees:કોને મળશે લાભ?
નાણા વિભાગના વર્ષ 2024ના ઠરાવ મુજબ, નીચે મુજબના કર્મચારીઓ OPS માટે પાત્ર ગણાશે:
- જેમની ભરતી પ્રક્રિયા કે જાહેરાત 1 એપ્રિલ, 2005 પહેલા પૂર્ણ થઈ ગઈ હતી.
- સ્પર્ધાત્મક પરીક્ષા દ્વારા પસંદગી પામેલા પણ વહીવટી કારણોસર મોડા નિમાયેલા કર્મચારીઓ.
- કોર્ટ કેસના કારણે નિમણૂકમાં વિલંબ થયો હોય તેવા કર્મચારીઓ.
- ફિક્સ પગારમાં સેવા આપ્યા બાદ નિયમિત થયેલા કેટલાક કર્મચારીઓ.
નોંધ: 1 એપ્રિલ, 2005 પછી નવી ભરતી પ્રક્રિયા હેઠળ જોડાયેલા કર્મચારીઓને આ યોજનાનો લાભ મળશે નહીં.
વિભાગોને અપાઈ તાકીદ
પેન્શન નિયામક કચેરીએ તમામ વિભાગોને નિર્દેશ આપ્યા છે કે તેઓ પાત્ર કર્મચારીઓની યાદી તૈયાર કરી એક્સલ ફોર્મેટમાં તાત્કાલિક મોકલે. આ યાદીમાં કર્મચારીઓના PRAN/PPAN નંબર, GPF ખાતાની વિગતો, નિવૃત્તિની તારીખ અને અન્ય જરૂરી દસ્તાવેજોની ઝીણવટભરી ચકાસણી કરવા સૂચના આપવામાં આવી છે. આ માહિતી “અર્જન્ટ” કેટેગરીમાં મોકલવા જણાવાયું છે, જેથી પાત્રતા ધરાવતા કર્મચારીઓને સમયસર નિવૃત્તિનો લાભ મળી શકે.
કર્મચારીઓમાં ઉત્સાહ
સરકારના આ નિર્ણયથી લાંબા સમયથી સંગઠિત રીતે અવાજ ઉઠાવતા કર્મચારીઓમાં આનંદની લાગણી જોવા મળી છે. વિવિધ વિભાગોમાં માહિતી એકત્રિત કરવાની પ્રક્રિયા તેજ બનતા હવે પાત્ર કર્મચારીઓ માટે જૂની પેન્શન યોજનાનો માર્ગ સાફ થઈ ગયો છે. આ નિર્ણયથી હજારો પરિવારોને નિવૃત્તિ બાદ સુરક્ષિત આર્થિક ભવિષ્ય મળવાની ખાતરી મળી છે.
