Ahmedabad Thar Driver Detained: અમદાવાદના થલતેજ વિસ્તારમાં છેલ્લા બે મહિનાથી એક યુવક દ્વારા તોડફોડ, ગાળો, ધમકી અને મારામારી કરવામાં આવતી હોવાના આક્ષેપો સામે આવ્યા છે. આકાશ ઠાકોર નામનો યુવક થાર કાર લઈને સોસાયટી તથા આસપાસના વિસ્તારમાં ફરતો અને લોકો સાથે માથાકૂટ કરતો હોવાની ફરિયાદો મળી છે. આ સમગ્ર મામલાના કેટલાક CCTV ફૂટેજ પણ સામે આવ્યા છે.
સ્થાનિકોના જણાવ્યા અનુસાર, યુવક સોસાયટીમાં આડેધડ અને બેફામ ડ્રાઇવિંગ કરતો હતો. રસ્તા પરથી પસાર થતા વાહનચાલકોને રોકીને ગાળો ભાંડવી, ધમકાવવી અને તેમની સાથે ઝઘડો કરવો જેવી ઘટનાઓ પણ બની હોવાનો આક્ષેપ છે. કેટલાક કિસ્સામાં તેણે લોકો સાથે હાથાપાઈ પણ કરી હોવાની ફરિયાદ છે. જેના કારણે આસપાસના લોકોમાં ભયનો માહોલ ઊભો થયો હતો.
Ahmedabad Thar Driver Detained: સ્ટ્રીટ લાઇટના થાંભલામાં તોડફોડ બાદ આગ લગાવ્યાનો આક્ષેપ
તાજેતરમાં સોસાયટીની બહાર AMCની સ્ટ્રીટ લાઇટના થાંભલામાં હથિયાર વડે તોડફોડ કરવામાં આવી હતી. ત્યારબાદ ત્યાં આગ લગાવવામાં આવી હોવાનો પણ આક્ષેપ છે. આગની ઘટનામાં સોસાયટીમાં મૂકવામાં આવેલું કચરાનું ડ્રમ પણ સળગી ગયું હતું. આ સમગ્ર ઘટનાના CCTV ફૂટેજ સામે આવ્યા હોવાનું જણાવાયું છે.
સ્થાનિક સોસાયટીના સભ્યોએ આ મામલે બોડકદેવ પોલીસ સ્ટેશનમાં અરજી કરી હતી. પરિવારને પણ યુવકના વર્તન અંગે જાણ કરવામાં આવી હતી. જોકે, ફરિયાદો અને રજૂઆતો છતાં સ્થિતિમાં સુધારો ન થતાં મામલો પોલીસ સુધી પહોંચ્યો હતો.
Ahmedabad Thar Driver Detained: રસ્તા પર વાહનચાલકો સાથે પણ માથાકૂટ
આકાશ ઠાકોર સામે રસ્તા પર જતા લોકોને રોકીને ગાળો ભાંડવા અને ધમકી આપવાના પણ આક્ષેપો છે. એક ઘટનામાં રિક્ષામાં બેઠેલા વ્યક્તિ પાસે જઈને તેને લાફા મારવામાં આવ્યા હોવાના આક્ષેપ સાથે CCTV ફૂટેજ પણ સામે આવ્યું છે. અન્ય એક ઘટનામાં ટ્રકચાલકને ગાળો ભાંડી દરવાજો ખોલીને ધમકાવવામાં આવ્યો હોવાનો દાવો કરવામાં આવ્યો છે.
સ્થાનિક લોકોનું કહેવું છે કે વારંવારની આવી ઘટનાઓને કારણે લોકો યુવકનો સામનો કરવાથી પણ ડરતા હતા. સોસાયટીમાં રહેતા લોકોના ઘરે જઈને ધમકી અને ઝઘડા કર્યાની ફરિયાદો પણ સામે આવી છે.
Ahmedabad Thar Driver Detained: મેયરે પોલીસનું ધ્યાન દોર્યું
આ મામલે અમદાવાદના મેયર અને થલતેજ વોર્ડના કોર્પોરેટર હિતેશ બારોટે જણાવ્યું કે, આ અંગે અગાઉ પણ ફરિયાદ મળી હતી. ત્યારબાદ ફરીથી જાણ થતાં પોલીસનું તાત્કાલિક ધ્યાન દોરવામાં આવ્યું હતું. તેમના જણાવ્યા મુજબ, યુવકને અગાઉ સુરતના રિહેબ સેન્ટરમાં મૂકવામાં આવ્યો હતો અને આ મામલે પોલીસ દ્વારા હવે જરૂરી કાર્યવાહી કરવામાં આવશે.
Ahmedabad Thar Driver Detained: પરિવારે માનસિક સારવારના દસ્તાવેજો રજૂ કર્યા
બોડકદેવ પોલીસ સ્ટેશનના પીઆઈ સંદીપ ખાંભલાના જણાવ્યા મુજબ, અરજી મળ્યા બાદ પોલીસ યુવકના ઘરે તપાસ માટે પહોંચી હતી. પરિવાર દ્વારા યુવકની માનસિક સારવાર સંબંધિત દવાના કાગળો પોલીસ સમક્ષ રજૂ કરવામાં આવ્યા હોવાનું જણાવાયું છે. પોલીસે પરિવારને પણ સમજાવ્યું હતું.
જોકે, ત્યારબાદ ફરીથી ફરિયાદ મળતાં બોડકદેવ પોલીસે 4 ઓક્ટોબરના રોજ આકાશ ઠાકોરની અટકાયત કરી છે. હવે પોલીસ દ્વારા સમગ્ર મામલે CCTV ફૂટેજ, સ્થાનિકોની ફરિયાદો અને અન્ય વિગતોના આધારે આગળની કાર્યવાહી કરવામાં આવી રહી છે.
આ મામલે યુવક સામે લગાવવામાં આવેલા આક્ષેપો અંગે કાયદેસરની તપાસ અને કાર્યવાહી બાદ જ સમગ્ર હકીકત સ્પષ્ટ થશે. હાલ પોલીસે અટકાયત કરી વધુ તપાસ હાથ ધરી છે.
વધુ સમાચાર વાંચવા માટે અંહી ક્લિક કરો: UCCની અસર, વર્ષો જૂના લગ્નનું સર્ટિફિકેટ કઢાવવા ગુજરાતીઓમાં દોડધામ, અમદાવાદમાં અરજીઓમાં મોટો વધારો
