AI Cyber Threat Alert: આર્ટિફિશિયલ ઇન્ટેલિજન્સ એટલે કે AI ટેક્નોલોજીથી કામ કરવાની ઝડપ અને ક્ષમતા વધી છે, પરંતુ તેની સાથે સાયબર હુમલાઓનો ખતરો પણ વધુ ગંભીર બની રહ્યો છે. માઇક્રોસોફ્ટના 2026 ડિજિટલ ડિફેન્સ રિપોર્ટ અનુસાર, હુમલાખોરો AIનો ઉપયોગ રિકોનિસન્સ, ફિશિંગ, માલવેર, વલ્નરેબિલિટી શોધવા અને હુમલાની પ્રક્રિયાને ઓટોમેટ કરવા માટે કરી રહ્યા છે. માઇક્રોસોફ્ટના મૂલ્યાંકનમાં નિયંત્રિત વાતાવરણમાં AI સિસ્ટમ્સે 32 તબક્કાને જોડીને જટિલ હુમલાની પ્રક્રિયા ચલાવવાની ક્ષમતા દર્શાવી છે.
રિપોર્ટમાં જણાવાયું છે કે હવે સાયબર હુમલાની ગતિ એટલી વધી રહી છે કે સોફ્ટવેરની નબળાઈ જાહેર અથવા શોધાયા બાદ તેને હથિયાર બનાવી હુમલો કરવામાં 24 કલાકથી પણ ઓછો સમય લાગી શકે છે. એટલે કંપનીઓ અને સંસ્થાઓ પાસે સુરક્ષા ખામી દૂર કરવા માટેનો સમય વધુને વધુ ઘટી રહ્યો છે.
AI Cyber Threat Alert: QR કોડ ફિશિંગમાં મોટો વધારો
સાયબર ગુનેગારો હવે ઈમેલ કે PDFમાં QR કોડ મોકલીને લોકોને ફસાવવાનો પ્રયાસ કરી રહ્યા છે. QR કોડ સ્કેન કરતાની સાથે જ યુઝરને નકલી વેબસાઇટ પર લઈ જઈને પાસવર્ડ, બેંકિંગ વિગતો અથવા અન્ય સંવેદનશીલ માહિતી મેળવવાનો પ્રયાસ થઈ શકે છે.
માઇક્રોસોફ્ટના આંકડા મુજબ જુલાઈ 2025થી જૂન 2026 વચ્ચે Microsoft Defender for Office 365 દ્વારા 14.5 કરોડથી વધુ QR-code phishing attacks શોધવામાં આવ્યા હતા.
માઇક્રોસોફ્ટે 2026ના પ્રથમ ત્રિમાસિક ગાળામાં પણ QR ફિશિંગમાં ઝડપી વધારો નોંધાવ્યો હતો. જાન્યુઆરીમાં 76 લાખથી વધીને માર્ચમાં 1.87 કરોડ સુધી હુમલાની સંખ્યા પહોંચી હતી.
AI Cyber Threat Alert: Fake CAPTCHAથી પણ સાવધાન
સાયબર હુમલાખોરો હવે ‘I am not a robot’ જેવા દેખાતા Fake CAPTCHAનો ઉપયોગ કરી રહ્યા છે. યુઝરને વિશ્વાસ અપાવવામાં આવે છે કે તે સામાન્ય સુરક્ષા ચકાસણી કરી રહ્યો છે, પરંતુ પાછળથી તેને જોખમી કમાન્ડ ચલાવવા અથવા માહિતી શેર કરવા તરફ દોરી શકાય છે.
માઇક્રોસોફ્ટે 2026 દરમિયાન ClickFix પ્રકારની પ્રવૃત્તિમાં 11 લાખથી વધુ અનોખા ડિવાઇસ પર હુમલાખોરો દ્વારા આપેલા કમાન્ડ એક્ઝિક્યુટ થયેલા જોયા હતા, જે અગાઉની સરખામણીએ લગભગ આઠ ગણો વધારો હતો.
AI Cyber Threat Alert: AI એજન્ટો વધશે તો જોખમ પણ વધશે
કંપનીઓમાં AI એજન્ટનો ઉપયોગ ઝડપથી વધી રહ્યો છે. AI એજન્ટ ઈમેલ, કેલેન્ડર, ડેટા, સિસ્ટમ અને અન્ય ડિજિટલ ટૂલ્સ સાથે કામ કરી શકે છે. પરંતુ જો આવા એજન્ટને જરૂર કરતાં વધારે પરવાનગી આપવામાં આવે અથવા તેની ઓળખ અને ઍક્સેસ સુરક્ષિત ન હોય, તો હુમલાખોર તેના માધ્યમથી અન્ય સિસ્ટમ સુધી પહોંચવાનો પ્રયાસ કરી શકે છે.
માઇક્રોસોફ્ટે પણ ચેતવણી આપી છે કે AI એજન્ટને અલગ ડિજિટલ ઓળખ, મર્યાદિત પરવાનગીઓ અને યોગ્ય ઍક્સેસ કંટ્રોલ સાથે સુરક્ષિત કરવો જરૂરી છે.
AI Cyber Threat Alert: સામાન્ય નાગરિકોએ શું ધ્યાન રાખવું?
નકલી QR કોડ, શંકાસ્પદ CAPTCHA, અજાણ્યા ઈમેલ, અજાણી લિંક અથવા કોઈ વ્યક્તિ દ્વારા કરવામાં આવતી અચાનક ઓળખની નકલથી સાવધાન રહેવું જરૂરી છે. કોઈપણ QR કોડ સ્કેન કરતાં પહેલાં તે ક્યાં લઈ જાય છે તેની ખાતરી કરવી, અજાણી કમાન્ડ કૉપી-પેસ્ટ ન કરવી અને સંવેદનશીલ માહિતી શેર કરતાં પહેલાં મોકલનારની ઓળખ ચકાસવી જરૂરી છે.
AI સાયબર સુરક્ષા માટે શક્તિશાળી સાધન બની શકે છે, પરંતુ તેનો દુરુપયોગ પણ એટલી જ ઝડપથી વધી રહ્યો છે. માઇક્રોસોફ્ટના રિપોર્ટનું મુખ્ય તારણ એ છે કે AIના યુગમાં હુમલા અને બચાવ બંને વધુ ઝડપી બની રહ્યા છે. તેથી સરકાર, કંપનીઓ અને સામાન્ય નાગરિકો માટે સાયબર સુરક્ષા હવે માત્ર ટેક્નિકલ મુદ્દો નહીં, પરંતુ રોજિંદા ડિજિટલ જીવનનો મહત્વપૂર્ણ ભાગ બની ગઈ છે.
વધુ સમાચાર વાંચવા માટે અંહી ક્લિક કરો: ચાલુ મેચમાં કોહલીએ જયસ્વાલને શીખવ્યો ડાન્સ, VIDEO વાઇરલ
