Veraval Rain Havoc: ગીર સોમનાથ જિલ્લાના મુખ્ય મથક વેરાવળ શહેરમાં શુક્રવારે મેઘરાજાએ વિરામ લીધો હોવા છતાં, સ્થાનિક નગરપાલિકાની કથળેલી ડ્રેનેજ વ્યવસ્થાને કારણે શહેર હજુ પણ જળમગ્ન છે. વરસાદ બંધ થયાના અંદાજે 12 કલાકથી વધુ સમય વીતી ગયો હોવા છતાં, શહેરના મુખ્ય માર્ગો અને બજારોમાં ઘૂંટણસમા પાણી ભરાયેલા છે. પ્રી-મોન્સૂન કામગીરીના નામે દર વર્ષે લાખો રૂપિયાનું આંધણ કરવા છતાં, સિઝનના પહેલા જ રાઉન્ડમાં આખી ગટર વ્યવસ્થા ચોકઅપ થઈ જતાં પાલિકા તંત્રના નબળા આયોજન અને કથિત ભ્રષ્ટાચાર સામે સ્થાનિકોમાં પ્રચંડ આક્રોશ ફાટી નીકળ્યો છે.
Veraval Rain Havoc: મુખ્ય બજારોમાં બેક મારી રહી છે ગટરો, ટ્રાફિક જામથી જનજીવન ઠપ્પ
વેરાવળનો સૌથી વ્યસ્ત અને હાર્દ સમાન ગણાતો વ્યાપારી વિસ્તાર રાજેન્દ્ર ભુવન રોડ સંપૂર્ણપણે તળાવમાં ફેરવાઈ ગયો છે. અડધા દિવસથી વધુ સમય થવા છતાં પાણી ઓસરવાનું નામ નથી લઈ રહ્યા. ધોરીમાર્ગો અને આંતરિક રસ્તાઓ પર નદીઓ વહેતી હોય તેવા દ્રશ્યો સર્જાતા વાહનવ્યવહાર ખોરવાયો છે. ઓફિસે જતા કર્મચારીઓ, મુસાફરો અને ખરીદી માટે નીકળેલા નાગરિકો કલાકો સુધી ટ્રાફિક જામ અને ગંદા પાણીમાં ફસાયા હતા, જેના કારણે સમગ્ર શહેરનું જનજીવન અસ્તવ્યસ્ત થઈ ગયું છે.
Veraval Rain Havoc: દુકાનો-ઓફિસોમાં પાણી ઘૂસતા વેપારીઓને મોટો આર્થિક ફટકો
રાજેન્દ્ર ભુવન રોડ સહિતના વેપારી મથકો પર આવેલી અસંખ્ય દુકાનો અને વ્યાવસાયિક ઓફિસોમાં વરસાદી પાણી ઘૂસી જતાં વેપારીઓને રાતા પાણીએ રોવાનો વારો આવ્યો છે. સ્થાનિક વેપારીઓના જણાવ્યા અનુસાર:
- દુકાનોમાં રાખેલા કિંમતી ઇલેક્ટ્રોનિક સાધનો, ફર્નિચર અને અન્ય માલસામાન પાણીમાં પલળી જતાં મોટું આર્થિક નુકસાન થયું છે.
- મહત્વના કાનૂની અને ધંધાકીય દસ્તાવેજો નાશ પામ્યા છે.
- પાણી ભરાવાને કારણે વેપારીઓને આખો દિવસ ધંધા-રોજગાર બંધ રાખવાની ફરજ પડી હતી.
Veraval Rain Havoc: કુદરતી વહેણમાં ગેરકાયદે બાંધકામો અને રોગચાળાનો ભય
શહેરના ગ્રાઉન્ડ ઝીરો રિપોર્ટિંગમાં ચોંકાવનારી વિગતો સામે આવી છે કે, અનેક વિસ્તારોમાં વરસાદી પાણીના કુદરતી વહેણમાં ગેરકાયદે બાંધકામો અથવા કચરાના ગંજ ખડકાયેલા હોવાથી પાણીનો નિકાલ થતો નથી. પરિણામે ગટરો બેક મારીને ઓવરફ્લો થઈ રહી છે. વરસાદી પાણી સાથે ગટરના ગંદા અને દૂષિત પાણી મિક્સ થઈને રોડ પર ફરી વળ્યા છે. કલાકો સુધી આ ગંદકી જમા રહેવાના કારણે મચ્છરોનો ઉપદ્રવ વધ્યો છે અને શહેરમાં ભયંકર રોગચાળો ફાટી નીકળવાની દહેશત વર્તાઈ રહી છે.
વેપારીઓની વળતર અને કાયમી ઉકેલની માંગ: ભારે આર્થિક નુકસાન વેઠી રહેલા પીડિત વેપારીઓએ વહીવટી તંત્ર પાસે નુકસાનીનું યોગ્ય સર્વેક્ષણ કરાવીને તાત્કાલિક વળતર ચૂકવવાની માંગ કરી છે. આ સાથે જ દર ચોમાસે સર્જાતી આ કાયમી મુશ્કેલીમાંથી મુક્તિ અપાવવા માટે વૈજ્ઞાનિક ઢબે નવી ડ્રેનેજ લાઇન નાખવાની અપીલ કરાઈ છે. હવે જોવાનું એ રહેશે કે જનઆક્રોશ બાદ પાલિકા તંત્ર જાગશે કે પછી વેરાવળ વાસીઓને આમ જ હાલાકી ભોગવવી પડશે.
વધુ સમાચાર વાંચવા માટે અંહી ક્લિક કરો
