Telegram Piracy Ban: જો તમે પણ ટેલિગ્રામ પરથી નવી ફિલ્મો કે વેબ સિરીઝ મફતમાં ડાઉનલોડ કરીને જોતા હોવ, તો તમારા માટે આ મોટા સમાચાર છે. કેન્દ્ર સરકારે પ્રખ્યાત મેસેજિંગ એપ ટેલિગ્રામ (Telegram) વિરુદ્ધ કડક વલણ અપનાવ્યું છે. માહિતી અને પ્રસારણ મંત્રાલયે ટેલિગ્રામને તેના પ્લેટફોર્મ પરથી તમામ પાઇરેટેડ કન્ટેન્ટ, ફિલ્મો અને OTT શો ઉપલબ્ધ કરાવતી ચેનલો તથા ગ્રુપ્સને તાત્કાલિક હટાવવા આદેશ આપ્યો છે. સરકાર તરફથી કંપનીને માત્ર 3 દિવસમાં આ બીજી નોટિસ ફટકારવામાં આવી છે.
Telegram Piracy Ban: 15 દિવસમાં એક્શન રિપોર્ટ સોંપવા આદેશ
સરકારે નોટિસમાં સ્પષ્ટ જણાવ્યું છે કે, ટેલિગ્રામ પોતાના પ્લેટફોર્મ પરથી પાઇરેટેડ ફિલ્મો અને વેબ સિરીઝનું સર્ક્યુલેશન તાત્કાલિક ધોરણે રોકે. આ સાથે જ આગામી 15 દિવસમાં આ ગેરકાયદે પ્રવૃત્તિઓ પર શું એક્શન લેવાયા, તેનો વિગતવાર રિપોર્ટ સરકારને સુપરત કરવો પડશે.
Telegram Piracy Ban: પ્લેટફોર્મ લેવલ પર બનાવવી પડશે મજબૂત સિસ્ટમ
સૂત્રોના જણાવ્યા અનુસાર, સરકારે કડક શબ્દોમાં કહ્યું છે કે ટેલિગ્રામ હવે માત્ર યુઝર્સની ફરિયાદોની રાહ જોઈને બેસી ન શકે. એક-એક ચેનલ બ્લોક કરવાને બદલે પ્લેટફોર્મ સ્તરે જ એવી મજબૂત સિસ્ટમ (ફિલ્ટર) બનાવવી પડશે જેથી આવી સામગ્રી અપલોડ જ ન થઈ શકે. સરકારના મતે, ટેલિગ્રામની અત્યાર સુધીની ધીમી કામગીરી ઇન્ફોર્મેશન ટેકનોલોજી એક્ટ, 2000 અને IT નિયમો, 2021 હેઠળ ‘ડ્યુ ડિલિજન્સ’ (યોગ્ય તકેદારી) ની શરતોનું ઉલ્લંઘન કરે છે.
Telegram Piracy Ban: કાયદાકીય ગાળિયો કસાશે: જેલની સજા પણ થઈ શકે
સરકારે ચેતવણી આપી છે કે કોપીરાઈટનું ઉલ્લંઘન એ માત્ર દીવાની (સિવિલ) વિવાદ નથી. જો ભવિષ્યમાં પણ આવી પાઇરેસી ચાલુ રહેશે અથવા કંપની તરફથી અધૂરો જવાબ મળશે, તો કોપીરાઈટ એક્ટ 1957 અને સિનેમેટોગ્રાફ એક્ટ 1952 હેઠળ ગુનાહિત જવાબદારી (Criminal Liability) નક્કી કરવામાં આવશે, જેમાં જેલની સજાની જોગવાઈ પણ સામેલ છે.
- 3000થી વધુ ચેનલો થઈ ચૂકી છે બ્લોક: સરકારે આ અગાઉ પણ પાઇરેટેડ કન્ટેન્ટ ફેલાવતી 3000થી વધુ ટેલિગ્રામ ચેનલોને બ્લોક કરી દીધી છે.
- નિયમ તોડનારા પર નજર: વારંવાર નિયમોનું ઉલ્લંઘન કરતા ચેનલો, ગ્રુપ્સ, ઓટોમેટેડ બોટ્સ, એકાઉન્ટ્સ અને તેના એડમિનિસ્ટ્રેટર્સ વિરુદ્ધ કાયદાકીય કાર્યવાહી કરાશે.
Telegram Piracy Ban: જૂન મહિનામાં પણ ટેલિગ્રામ પર લાગ્યો હતો પ્રતિબંધ
અત્રે ઉલ્લેખનીય છે કે, ટેલિગ્રામ અગાઉ પણ વિવાદોમાં રહ્યું છે. જૂન મહિનામાં નેશનલ ટેસ્ટિંગ એજન્સી (NTA) ની ભલામણ પર પેપર લીક મામલે સરકારે 16 જૂનથી 22 જૂન સુધી ટેલિગ્રામ પર પ્રતિબંધ મૂક્યો હતો. આ ઉપરાંત, 21 જૂને યોજાયેલી NEET 2026ની ફરીથી પરીક્ષાને ધ્યાનમાં રાખીને, સરકારે ટેલિગ્રામને 30 જૂન સુધી પોતાનું ‘મેસેજ-એડિટિંગ’ ફીચર બંધ રાખવાનો પણ આદેશ આપ્યો હતો. હવે પાઇરેસી મામલે સરકાર ડિજિટલ સ્ટ્રાઈકના મૂડમાં દેખાઈ રહી છે.
વધુ સમાચાર વાંચવા માટે અંહી ક્લિક કરો
