Maruti Suzuki Price Hike: કાર ખરીદવાનું વિચારી રહેલા ગ્રાહકો માટે એક માઠા સમાચાર સામે આવ્યા છે. દેશની અગ્રેસર પેસેન્જર વાહન નિર્માતા કંપની મારુતિ સુઝુકીએ ફરી એકવાર પોતાની ગાડીઓના ભાવ વધારવાની સત્તાવાર જાહેરાત કરી છે. કંપનીએ 21 જુલાઈ, મંગળવારે શેરબજારને મોકલેલા રેગ્યુલેટરી ફાઇલિંગમાં આ માહિતી આપી છે. અલગ-અલગ મોડેલ અને વેરિઅન્ટ મુજબ કારના ભાવમાં ₹30,000 સુધીનો વધારો જોવા મળશે.
Maruti Suzuki Price Hike: બે મહિનામાં બીજી વખત ભાવ વધારો
મારુતિ સુઝુકી દ્વારા આ વર્ષે ટૂંકા ગાળામાં જ આ બીજી વખત ભાવ વધારવામાં આવ્યા છે. અગાઉ કંપનીએ જૂન 2026માં પણ તેના તમામ મોડેલ્સની કિંમતોમાં ₹30,000 સુધીનો વધારો કર્યો હતો, જેની જાહેરાત 21 મેના રોજ કરવામાં આવી હતી. હવે ઓગસ્ટથી લાગુ થનારો આ નવો ભાવ વધારો અગાઉના વધારા ઉપરાંતનો રહેશે, જેના કારણે ગ્રાહકોના ખિસ્સા પર વધુ ભાર પડશે.
Maruti Suzuki Price Hike: ઇનપુટ કોસ્ટ વધવાને કારણે લેવાયો નિર્ણય
કંપનીના જણાવ્યા અનુસાર, સતત વધતી મોંઘવારી અને ઇનપુટ કોસ્ટ (કાચા માલનો ખર્ચ) ઊંચી રહેવાથી આર્થિક દબાણ વધ્યું છે. છેલ્લા કેટલાક મહિનાઓથી કંપનીએ પોતાના સ્તરે ખર્ચ ઘટાડીને ગ્રાહકોને રાહત આપવાનો પ્રયાસ કર્યો હતો, પરંતુ અનુકૂળ વ્યાપારી વાતાવરણ ન હોવાને કારણે વધેલા ઉત્પાદન ખર્ચનો બોਝ આંશિક રીતે ગ્રાહકો પર નાખવો અનિવાર્ય બન્યો છે.
Maruti Suzuki Price Hike: કયા સેગમેન્ટની ગાડીઓ મોંઘી થશે?
મારુતિ સુઝુકી ભારતીય બજારમાં એન્ટ્રી-લેવલ હેચબેકથી લઈને પ્રીમિયમ સેગમેન્ટ સુધીના વાહનો વેચે છે. કંપનીના પોર્ટફોલિયોમાં એન્ટ્રી-લેવલ કાર ‘S-Presso’થી લઈને પ્રીમિયમ MPV ‘ઇનવિક્ટો’ સુધીની ગાડીઓ સામેલ છે, જેની એક્સ-શોરૂમ કિંમતો હાલમાં ₹3.50 લાખથી લઈને ₹25 લાખ સુધીની છે. ઓગસ્ટથી અમલી બનનારા આ નવા ભાવ વધારા બાદ એન્ટ્રી-લેવલ અને પ્રીમિયમ બંને શ્રેણીની તમામ કારો વધુ મોંઘી થઈ જશે.
વધુ સમાચાર વાંચવા માટે અંહી ક્લિક કરો
