Filmy Drama in Vadodara: વડોદરા જિલ્લાના શિનોરમાં ચાર વર્ષની બાળકીની ઘાતકી હત્યા અને પોક્સો (POCSO)ના ગુનામાં પકડાયેલા નરાધમ આરોપીએ પોલીસ વાહનમાં જ મોટો હોબાળો મચાવ્યો છે. પોલીસ કસ્ટડી દરમિયાન સેગવાથી શિનોર પોલીસ સ્ટેશન લઈ જતી વખતે આરોપીએ પિસ્તોલ/રિવોલ્વર ઝૂંટવીને અંધાધૂંધ બે રાઉન્ડ ફાયરિંગ કરી દીધું હતું. આ ઝપાઝપીમાં એક ગોળી ડ્રાઈવરની સાવ નજીકથી પસાર થઈ ગઈ હતી, જ્યારે બીજી ગોળી ખુદ આરોપીના જમણા પગમાં આરપાર નીકળી ગઈ હતી.
Filmy Drama in Vadodara: ચાલુ પોલીસ વાનમાં સર્જાયો મોતનો ખેલ
પોલીસના જણાવ્યા અનુસાર, શિનોર તાલુકાના સતીષાણા ગામે ગત અઠવાડિયે માસૂમ બાળકીની હત્યા કરનાર આરોપી અજય (અનિલ) રાઠોડિયાના રિમાન્ડ આજે પૂરા થઈ રહ્યા હતા. લોકલ ક્રાઈમ બ્રાન્ચ (LCB) અને પોલીસની ટીમ તેને વધુ તપાસ અર્થે સેગવા આઉટપોસ્ટથી શિનોર પોલીસ સ્ટેશન લઈ જઈ રહી હતી.
રાત્રે આશરે ૮ વાગ્યાની આસપાસ પોલીસ જીપ જ્યારે સીમળી ગામ નજીકથી પસાર થઈ રહી હતી, ત્યારે અચાનક જ આરોપી અજયે બાજુમાં બેઠેલા પોલીસ ઇન્સ્પેક્ટર (PSI) ના વેપન બેલ્ટમાંથી સર્વિસ રિવોલ્વર ઝૂંટવી લેવાનો પ્રયાસ કર્યો હતો.
Filmy Drama in Vadodara: બે રાઉન્ડ ફાયરિંગ: ડ્રાઈવરનો આબાદ બચાવ
આરોપીએ રિવોલ્વર હાથમાં લેતા જ પોલીસકર્મીઓ તેની પર તૂટી પડ્યા હતા. ચાલુ ગાડીએ થયેલી આ ઉગ્ર ઝપાઝપી દરમિયાન આરોપીના હાથે બે રાઉન્ડ ફાયરિંગ થઈ ગયું:
- પ્રથમ ફાયરિંગ: ગોળી સીધી આગળ બેઠેલા પોલીસ વાનના ડ્રાઈવરની એકદમ નજીકથી પસાર થઈને ગાડીની બહાર નીકળી ગઈ હતી, જેમાં ડ્રાઈવરનો આબાદ બચાવ થયો હતો.
- બીજું ફાયરિંગ: હથિયાર મેળવવાના આ ફસાદમાં બીજી ગોળી ખુદ આરોપીના જ જમણા પગમાં વાગીને આરપાર થઈ ગઈ હતી, જેના કારણે તે લોહીલુહાણ થઈ ગયો હતો.
Filmy Drama in Vadodara: હોસ્પિટલ પોલીસ છાવણીમાં ફેરવાઈ
ઘટના બાદ તરત જ પોલીસે ૧૦૮ એમ્બ્યુલન્સને જાણ કરી હતી અને ઇજાગ્રસ્ત આરોપીને તાત્કાલિક મોટા ફોફળિયા સ્થિત સામૂહિક આરોગ્ય કેન્દ્ર (CHC) ખાતે ખસેડ્યો હતો. ઘટનાની ગંભીરતાને જોતા વડોદરા જિલ્લા એસ.પી. (SP) સુશીલ અગ્રવાલ સહિતના ઉચ્ચ અધિકારીઓ ઘટનાસ્થળે અને હોસ્પિટલ દોડી આવ્યા હતા. હાલ હોસ્પિટલને પોલીસ છાવણીમાં ફેરવી દેવામાં આવી છે અને કોઈ પણ બહારની વ્યક્તિના પ્રવેશ પર પ્રતિબંધ લગાવી દેવાયો છે.
શું હતી સમગ્ર ઘટના? આરોપી અજય રાઠોડિયાને બાળકીની માતા સાથે પ્રેમ પ્રકરણ હતું. જોકે, કોઈ કારણસર માતાએ વાત કરવાનું બંધ કરી દેતા, પ્રેમીએ બદલો લેવાના ઈરાદે તેની ૪ વર્ષની નિર્દોષ બાળકીનું અપહરણ કરી તેની નિર્મમ હત્યા કરી નાખી હતી.
હાલમાં પોલીસ ડ્રાઈવર પર હુમલો અને સરકારી હથિયાર છીનવી સત્તાવાર ફરજમાં રુકાવટ લાવવા બદલ આરોપી સામે વધુ એક ગુનો દાખલ કરી કાયદેસરની કાર્યવાહી હાથ ધરી રહી છે.
વધુ સમાચાર વાંચવા માટે અંહી ક્લિક કરો
પેટલાદના પાળજ ગામની દૂધ મંડળીમાં ભેળસેળિયા તત્વોનો પર્દાફાશ, સભાસદોનો ઉગ્ર હોબાળો, પોલીસ બોલાવવી પડી
