Rain Alert in South Gujarat: દેશમાં દક્ષિણ-પશ્ચિમ ચોમાસું ખૂબ જ ઝડપથી આગળ વધી રહ્યું છે. મહારાષ્ટ્ર, તેલંગાણા, છત્તીસગઢ અને બિહારના વધુ વિસ્તારોમાં પ્રવેશ્યા બાદ આગામી 48 કલાકમાં ચોમાસું મુંબઈ સહિત મહારાષ્ટ્રના બાકીના ભાગોને આવરી લેશે. ગુજરાતમાં પણ ચોમાસાની વિધિવત શરૂઆત પહેલાં પ્રિ-મોન્સૂન એક્ટિવિટીના ભાગરૂપે મેઘરાજાએ ધમાકેદાર હાજરી પુરાવી દીધી છે. છેલ્લા 24 કલાકમાં રાજ્યના 52 તાલુકાઓમાં નોંધપાત્ર વરસાદ નોંધાયો છે, જેમાં સૌથી વધુ ભાવનગરમાં 1.85 ઇંચ અને સુરતના ઉમરપાડામાં 1.77 ઇંચ વરસાદ ખાબક્યો છે.
જોકે, રાજ્યમાં હાલ બેવડી ઋતુનો અહેસાસ થઈ રહ્યો છે. દક્ષિણ ગુજરાતમાં વરસાદી માહોલને કારણે લોકોને ગરમીથી મોટી રાહત મળી છે, જ્યારે ઉત્તર ગુજરાત અને સૌરાષ્ટ્રના પંથકો હજુ પણ અસહ્ય ગરમી અને બફારાનો સામનો કરી રહ્યા છે. સોમવારે ગાંધીનગર 41.0°C તાપમાન સાથે રાજ્યનું સૌથી ગરમ શહેર નોંધાયું હતું.
Rain Alert in South Gujarat: વલસાડ-નવસારીમાં સાર્વત્રિક વરસાદથી નદીઓ-ડેમમાં નવા નીર
- વલસાડ જિલ્લો: છેલ્લા ત્રણ દિવસના વાદળછાયા વાતાવરણ બાદ વહેલી સવારે 4થી 6 વાગ્યાના માત્ર બે કલાકમાં જ ઉમરગામ સહિતના વિસ્તારોમાં 17 mm જેટલો વરસાદ ખાબક્યો હતો. અસહ્ય બફારાથી પરેશાન લોકોને આનાથી મોટી રાહત મળી છે.
- નવસારી જિલ્લો: જિલ્લામાં સતત બીજા દિવસે અષાઢી માહોલ જામ્યો છે. તોફાની પવન સાથે શરૂ થયેલા વરસાદને કારણે જલાલપોર પંથકમાં સવા ઇંચ કરતાં વધુ વરસાદ નોંધાયો છે. ઉપરવાસમાં ભારે વરસાદને કારણે જિલ્લાની મુખ્ય નદીઓ અને ડેમની સપાટીમાં સતત વધારો થઈ રહ્યો છે:
- પૂર્ણા નદી: વર્તમાન સપાટી 8 ફૂટ (ભયજનક સપાટી: 23 ફૂટ)
- અંબિકા નદી: વર્તમાન સપાટી 11 ફૂટ (ભયજનક સપાટી: 28 ફૂટ)
- જૂજ ડેમ: વર્તમાન સપાટી 147.80 ફૂટ (ઓવરફ્લો લેવલ: 167.5 ફૂટ)
- કેલીયા ડેમ: વર્તમાન સપાટી 99.13 ફૂટ (ઓવરફ્લો લેવલ: 113.5 ફૂટ)
Rain Alert in South Gujarat: સુરતમાં પારો 3.5°C ગગડ્યો, અન્ય શહેરોમાં રાત્રે પણ ભારે અકળામણ
વરસાદી માહોલ વચ્ચે સુરતમાં મહત્તમ તાપમાનમાં 3.5°Cનો મોટો ઘટાડો નોંધાતા પારો 32.4°C પર આવી ગયો છે, જે રાજ્યનું સૌથી ઓછું મહત્તમ તાપમાન ધરાવતું કેન્દ્ર બન્યું છે. જ્યારે અમદાવાદમાં પારો 40.5°C નોંધાયો હોવા છતાં, લઘુત્તમ તાપમાન 29.6°C રહેતાં રાત્રે પણ લોકોએ ભારે ઉકળાટ સહન કરવો પડ્યો હતો.
Rain Alert in South Gujarat: મુખ્ય શહેરોના તાપમાનની સ્થિતિ:
- ગાંધીનગર: 41.0°C (રાજ્યમાં સૌથી વધુ)
- અમદાવાદ: 40.5°C
- સુરેન્દ્રનગર: 40.5°C
- રાજકોટ: 40.3°C
- ડીસા: 39.7°C
- વડોદરા: 38.4°C
- ભાવનગર: 35.7°C (1.3°C નો ઘટાડો)
Rain Alert in South Gujarat: હવામાન વિભાગની આગામી 7 દિવસની આગાહી
- 23 જૂન: અમદાવાદ, ખેડા, આણંદ, પંચમહાલ, દાહોદ તેમજ વડોદરા, છોટાઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, દમણ, દાદરા અને નગર હવેલીમાં હળવાથી મધ્યમ વરસાદની શક્યતા છે. સૌરાષ્ટ્રના રાજકોટ, જૂનાગઢ, અમરેલી, ભાવનગર, બોટાદ, ગીર સોમનાથ અને દીવમાં પણ છૂટાછવાયા સ્થળોએ વરસાદ પડી શકે છે.
- 24 અને 25 જૂન: ઉત્તર ગુજરાત અને કચ્છમાં હવામાન સંપૂર્ણ સૂકું થઈ જશે. વરસાદનું જોર માત્ર દક્ષિણ ગુજરાત અને સૌરાષ્ટ્રના અમરેલી, ભાવનગર, ગીર સોમનાથ તથા દીવ પૂરતું મર્યાદિત રહેશે.
- 26થી 29 જૂન: અઠવાડિયાના અંતમાં વરસાદ ફરી વ્યાપ પકડશે. દક્ષિણ ગુજરાતના તમામ જિલ્લાઓ અને સૌરાષ્ટ્રના દરિયાકાંઠાના વિસ્તારોમાં હળવોથી મધ્યમ વરસાદ વરસી શકે છે. બાકીના ભાગોમાં ગરમી યથાવત રહેશે.
અમદાવાદમાં વાદળછાયું વાતાવરણ: અમદાવાદ અને આસપાસના વિસ્તારોમાં આજે સાંજના સમયે ગાજવીજ સાથે વરસાદના એક-બે રાઉન્ડ પડી શકે છે, પરંતુ તાપમાન 41 ડિગ્રી આસપાસ રહેવાની શક્યતા હોવાથી બફારાનું જોર ચાલુ રહેશે.
વધુ સમાચાર વાંચવા માટે અંહી ક્લિક કરો
સુરતમાં બ્રિજ ધરાશાયી થવાનો વીડિયો સોશિયલ મીડિયા પર વાયરલ; તંત્રએ અફવા ગણાવી કરી સ્પષ્ટતા
