286 Days at Sea: અમેરિકી નૌસેનાના વિમાનવાહક યુદ્ધજહાજ USS Abraham Lincoln સાથે જોડાયેલા કેરિયર સ્ટ્રાઈક ગ્રુપમાં તૈનાત નૌસૈનિકોના માનસિક સ્વાસ્થ્યને લઈને ચિંતાજનક માહિતી સામે આવી છે. અમેરિકી નૌસેનાના કાર્યકારી સચિવ હંગ કાઓએ સેનેટર કર્સ્ટન ગિલિબ્રાન્ડને મોકલેલા પત્રમાં જણાવ્યું છે કે તૈનાતીની શરૂઆતથી સમગ્ર સ્ટ્રાઈક ગ્રુપમાં કુલ 8 આત્મહત્યાના પ્રયાસો નોંધાયા છે. આ આંકડામાં માત્ર વિમાનવાહક જહાજના ક્રૂ જ નહીં, પરંતુ કેરિયર એર વિંગ, એસ્કોર્ટિંગ ડિસ્ટ્રોયર્સ અને અન્ય સ્ટ્રાઈક ગ્રુપ યુનિટ્સના કર્મચારીઓનો પણ સમાવેશ થાય છે.
286 Days at Sea: એક નૌસૈનિક સમુદ્રમાં કૂદ્યો
નૌસેનાના પત્ર મુજબ, માર્ચમાં એક નૌસૈનિકે ઓવરબોર્ડ જવાનો પ્રયાસ કર્યો હતો, પરંતુ સાથી નૌસૈનિકોએ તેને રોકી લીધો હતો. ઓગસ્ટમાં અન્ય એક નૌસૈનિક જહાજ પરથી સમુદ્રમાં કૂદી ગયો હતો. તેને રેસ્ક્યુ કરીને તબીબી સારવાર આપવામાં આવી અને ત્યારબાદ વધુ સારવાર માટે જહાજ પરથી ખસેડવામાં આવ્યો હતો. નૌસેનાએ સ્પષ્ટ કર્યું છે કે આ તૈનાતી દરમિયાન કોઈ નૌસૈનિકનું આત્મહત્યાથી મૃત્યુ થયું નથી.
286 Days at Sea: 286 દિવસ સુધી સતત સમુદ્રમાં તૈનાતી
USS Abraham Lincolnનું લાંબું ડિપ્લોયમેન્ટ પણ ચર્ચામાં રહ્યું છે. અહેવાલો અનુસાર, જહાજ લગભગ 286 દિવસ સુધી સમુદ્રમાં રહ્યું હતું અને લાંબા સમય સુધી બંદરે રોકાયા વિના કામગીરી કરી હતી. આ દરમિયાન સ્ટ્રાઈક ગ્રુપે ઈરાન સામેની અમેરિકી લશ્કરી કામગીરીને સમર્થન આપ્યું હતું. જહાજ પર લગભગ 5,000 લોકો હોવાની માહિતી છે, જ્યારે સમગ્ર સ્ટ્રાઈક ગ્રુપમાં હજારો નૌસૈનિકો સામેલ હતા.
286 Days at Sea: માનસિક સ્વાસ્થ્ય અને જીવનશૈલી અંગે ચિંતા
લાંબી તૈનાતી દરમિયાન જહાજ પર ખોરાક, સપ્લાય અને અન્ય જીવનજરૂરી સુવિધાઓ અંગે પણ પ્રશ્નો ઉઠ્યા હતા. નૌસેનાએ જોકે જણાવ્યું છે કે જહાજ પર ચેપલિન, મનોવિજ્ઞાની, ક્લિનિકલ સોશિયલ વર્કર અને અન્ય માનસિક સ્વાસ્થ્ય સહાય ઉપલબ્ધ હતી.
સેનેટર ગિલિબ્રાન્ડે નૌસૈનિકોની સ્થિતિ અને માનસિક સ્વાસ્થ્ય અંગે નૌસેના પાસેથી માહિતી માંગી હતી. તેના જવાબમાં આંકડા જાહેર થયા છે. બીજી તરફ, નૌસેનાના અધિકારીઓએ લાંબી તૈનાતીથી પડતા દબાણને સ્વીકાર્યું છે, પરંતુ જહાજની સ્થિતિ અંગેના કેટલાક અહેવાલોને લઈને અલગ મત પણ વ્યક્ત કરવામાં આવ્યા છે.
વધુ સમાચાર વાંચવા માટે અંહી ક્લિક કરો: શિયાળા પહેલાં મોટું હવામાન સંકટ: El Niño વધુ મજબૂત બનવાની આગાહી, દિલ્હી સહિત ઉત્તર ભારતમાં પ્રદૂષણની ચિંતા
