Valsad Shocker: કહેવાય છે કે ઘર એ શાંતિનું ધામ હોય છે, પરંતુ વલસાડના અબ્રામા વિસ્તારમાં રહેતા એક નિવૃત્ત રેલવે કર્મચારી માટે તેમનું જ ઘર નરક સમાન બની ગયું છે. ૨૦ વર્ષથી દારૂડિયા પુત્રના શારીરિક અને માનસિક ત્રાસથી કંટાળીને અંતે વૃદ્ધ પિતાએ સમગ્ર પરિવાર માટે કલેક્ટર પાસે ‘ઈચ્છા મૃત્યુ’ની પરવાનગી માંગતા ચકચાર મચી ગઈ છે.
Valsad Shocker: મુખ્ય અંશો:
- પીડિત પરિવાર: સુરેશભાઈ નાઈક (નિવૃત્ત રેલવે કર્મચારી), તેમની પત્ની અને ૯૫% દિવ્યાંગ પુત્રી.
- આરોપી પુત્ર: હેમંત નાઈક (૪૩ વર્ષ), જે છેલ્લા ૨૦ વર્ષથી દારૂના વ્યસનમાં ડૂબેલો છે.
- ઘટના સ્થળ: અબ્રામા, વલસાડ.
- માંગણી: પુત્રના ત્રાસમાંથી મુક્તિ અથવા આખા પરિવારને ઝેર આપી દેવાની (ઈચ્છા મૃત્યુ) મંજૂરી.
Valsad Shocker: નરક જેવી જિંદગી: ૨૦ વર્ષનો અસહ્ય ત્રાસ
સુરેશભાઈએ કલેક્ટરને આપેલી અરજીમાં હૈયું ઠાલવતા જણાવ્યું હતું કે, તેમનો નાનો પુત્ર હેમંત દરરોજ દારૂ પીને આવે છે અને ઘરમાં તોડફોડ કરે છે. તે માત્ર માતા-પિતાને જ નહીં, પણ પોતાની જન્મથી દિવ્યાંગ બહેનને પણ છોડતો નથી. ગંદકી કરવી, અશ્લીલ ગાળો ભાંડવી અને શાંતિથી જમવા પણ ન દેવું – આ હેમંતનો નિત્યક્રમ બની ગયો છે. પિતાએ ભીની આંખે કહ્યું, “અમે ૨૦ વર્ષથી આ બધું સહન કરીએ છીએ, હવે અમારે જીવવું નથી.”
Valsad Shocker: પોલીસ કાર્યવાહી પણ નિષ્ફળ
પરિવારે અનેકવાર પોલીસની મદદ લીધી છે. પોલીસે હેમંત પાસે ઘણીવાર માફી પત્ર લખાવ્યા છે, પરંતુ જેવો તે પોલીસ સ્ટેશનથી બહાર આવે કે જેલમાંથી છૂટે, તેનો ત્રાસ બમણા વેગથી શરૂ થઈ જાય છે. સમાજના આગેવાનોની સમજાવટ પણ વ્યસની પુત્ર સામે નિષ્ફળ સાબિત થઈ છે.
કલેક્ટરનો આદેશ: સિનિયર સિટીઝન એક્ટ હેઠળ થશે કાર્યવાહી
આ મામલે જિલ્લા કલેક્ટર ભવ્ય વર્માએ જણાવ્યું હતું કે, ભારતીય સંવિધાનમાં ઈચ્છા મૃત્યુની કોઈ જોગવાઈ નથી, તેથી પરિવારને સમજાવવામાં આવ્યો છે. જોકે, આ ગંભીર બાબતને ધ્યાને લઈ તેમણે તપાસના આદેશ આપ્યા છે:
- પ્રાંત અધિકારીની મુલાકાત: અધિકારી જાતે ઘરે જઈ પરિસ્થિતિની સમીક્ષા કરશે.
- કડક પગલાં: જો પુત્ર સુધરશે નહીં, તો તેની સામે ‘સીનિયર સિટીઝન એક્ટ’ હેઠળ કાર્યવાહી કરવામાં આવશે.
- પોલીસ એક્શન: CRPC ની કલમ ૧૦૬ થી ૧૧૦ હેઠળ તેને પાબંદ કરવામાં આવશે અને જરૂર પડ્યે કડક પોલીસ ફરિયાદ પણ કરવામાં આવશે.
વધુ સમાચાર વાંચવા માટે અંહી ક્લિક કરો: ‘દુનિયાની કોઈ શક્તિ ભારતને દબાવી શકે નહીં’;સોમનાથના આંગણે PM મોદીએ ગજવ્યો હર હર મહાદેવનો નાદ
