US Independence Day: અમેરિકા આજે તેના ઇતિહાસના સૌથી મોટા પડાવ પર પહોંચ્યું છે. ૪ જુલાઈ ૧૭૭૬ના રોજ બ્રિટિશ શાસનથી મુક્ત થયેલા યુનાઇટેડ સ્ટેટ્સ ઓફ અમેરિકા (USA)ની આઝાદીના ૨૫૦ વર્ષ પૂરા થવાના અવસરે સમગ્ર દેશમાં ‘અમેરિકા ૨૫૦’ (America 250) ઉત્સવની અભૂતપૂર્વ ઉજવણી શરૂ થઈ ગઈ છે. ફિલાડેલ્ફિયા, ન્યૂયોર્ક, અને વોશિંગ્ટન ડીસી સહિત અમેરિકાના તમામ ૫૦ રાજ્યોમાં ભવ્ય પરેડ, ઐતિહાસિક કાર્યક્રમો અને મ્યુઝિક કોન્સર્ટનું આયોજન કરવામાં આવ્યું છે.
ભીષણ ગરમી અને ખરાબ હવામાનની આશંકા હોવા છતાં, લાખોની સંખ્યામાં અમેરિકી નાગરિકો રસ્તાઓ પર ઉતરી આવ્યા છે. વોશિંગ્ટનના ઐતિહાસિક નેશનલ મોલ ખાતે રાષ્ટ્રપતિ ડોનાલ્ડ ટ્રમ્પનું રાષ્ટ્રજોગ સંબોધન શરૂ થઈ ગયું છે, જેમના ભાષણ બાદ વ્હાઇટ હાઉસના જણાવ્યા અનુસાર ઇતિહાસની સૌથી મોટી આતશબાજી (Fireworks) કરવામાં આવશે.
US Independence Day: સામ્યવાદ પર ડોનાલ્ડ ટ્રમ્પના આકરા પ્રહારો: “અમેરિકામાં સામ્યવાદીઓ નથી જોઈતા”
પોતાના સંબોધનની શરૂઆતમાં જ ઐતિહાસિક અમેરિકી ધ્વજોનો ઉલ્લેખ કરીને રાષ્ટ્રપતિ ડોનાલ્ડ ટ્રમ્પે વૈશ્વિક વિચારધારા અને આંતરિક રાજકારણ પર આકરા પ્રહારો કર્યા હતા. તેમણે સ્પષ્ટ શબ્દોમાં જણાવ્યું કે:
“સામ્યવાદ હંમેશા હારનારી વિચારધારા રહી છે અને આગળ પણ હારતી રહેશે. સામ્યવાદી વ્યવસ્થા અમેરિકી વ્યવસ્થાથી બિલકુલ વિપરીત છે. અમેરિકાની ઓળખ આઝાદી, લોકશાહી અને વ્યક્તિગત અધિકારોથી છે, જ્યારે સામ્યવાદ આ મૂલ્યોનો દુશ્મન છે. અમે અમારા દેશમાં સામ્યવાદીઓ નથી ઈચ્છતા.”
તેમણે વધુમાં ઉમેર્યું કે, “આપણા બહાદુર સૈનિકોએ દુનિયાભરના યુદ્ધક્ષેત્રોમાં સામ્યવાદ સામે લડાઈ લડી છે. તેમણે આ લડાઈ એટલા માટે નહોતી લડી કે એ જ ખતરો ફરીથી અમેરિકાની અંદર પાછો આવે.”
US Independence Day: ૪ જુલાઈ ૧૭૭૬ થી ૪ જુલાઈ ૨૦૨૬: અમેરિકા દુનિયા માટે આશા અને રોશની
ટ્રમ્પે છેલ્લા અઢીસો વર્ષની સફરને યાદ કરતા દાવો કર્યો હતો કે આજે અમેરિકા ઇતિહાસમાં સૌથી વધુ મજબૂત સ્થિતિમાં છે.
- દુનિયાનું ગૌરવ: છેલ્લા ૨૫૦ વર્ષથી અમેરિકા વિશ્વ માટે આશા, વિશ્વાસ, રોશની અને ગૌરવનું પ્રતીક રહ્યું છે અને ઈશ્વરની કૃપાથી ભવિષ્યમાં પણ રહેશે.
- તાનાશાહી પર વિજય: ૪ જુલાઈ ૧૭૭૬થી ૪ જુલાઈ ૨૦૨૬ સુધી અમેરિકાએ આઝાદીની તાનાશાહી પર જીત અને અમેરિકી ભાવનાની તાકાતને દુનિયા સામે સાબિત કરી બતાવી છે.
- વર્તમાન સ્થિતિ: આજે આપણો દેશ પહેલા કરતા ક્યાંય વધુ મજબૂત, વધુ સ્વતંત્ર, વધુ સમૃદ્ધ, વધુ સુરક્ષિત અને ગર્વથી ભરેલો છે.
US Independence Day: “આપણે બધા ભગવાનના સંતાન છીએ”
ભાષણ દરમિયાન ટ્રમ્પે એક મહત્વપૂર્ણ આધ્યાત્મિક અને રાજકીય નિવેદન આપતા કહ્યું કે, “આપણે બધા એક સર્વશક્તિમાન ઈશ્વરના સંતાન છીએ, પણ કોઈ સામ્યવાદી આવું ક્યારેય નહીં કહે.” ટ્રમ્પના આ નિવેદન પર નેશનલ મોલમાં હાજર હજારો સમર્થકોએ તાળીઓના ગડગડાટ અને નારાઓ સાથે તેમને વધાવી લીધા હતા. કાર્યક્રમ દરમિયાન લોકો ખુરશીઓ પર ઊભા રહીને પોતાના મોબાઈલ ફોનમાં આ ઐતિહાસિક ક્ષણને કેદ કરતા જોવા મળ્યા હતા.
US Independence Day: ફિલાડેલ્ફિયામાં ગુંજી ઐતિહાસિક ઘંટડીઓ
આઝાદીના આ મહાપર્વ નિમિત્તે ફિલાડેલ્ફિયામાં બપોરે બરાબર ૧૨ વાગ્યે ઐતિહાસિક ઘંટડીઓ વગાડીને ઉત્સવની સત્તાવાર શરૂઆત કરાઈ હતી. અહીંના ઇન્ડિપેન્ડન્સ મોલમાં અમેરિકાના સ્વતંત્રતા સંગ્રામ સાથે સંકળાયેલા ખાસ વિઝ્યુઅલ્સ રજૂ કરવામાં આવ્યા હતા, જેણે લોકોને ભાવુક કરી દીધા હતા.
ઉલ્લેખનીય છે કે, ૪ જુલાઈ ૧૭૭૬ના રોજ નોર્થ અમેરિકાની ૧૩ બ્રિટિશ કોલોનીઓએ ‘ડિક્લેરેશન ઓફ ઇન્ડિપેન્ડન્સ’ (સ્વતંત્રતાની જાહેરાત) પર હસ્તાક્ષર કરીને બ્રિટનથી સત્તાવાર રીતે અલગ થવાનો ઐતિહાસિક નિર્ણય કર્યો હતો, જેના આજે ૨૫૦ વર્ષ પૂર્ણ થયા છે.
વધુ સમાચાર વાંચવા માટે અંહી ક્લિક કરો
ગુજરાતમાં મેઘતાંડવ, ગીર-અમરેલીમાં પૂરની સ્થિતિ, ડેમ ઓવરફ્લો અને 8 જિલ્લામાં રેડ એલર્ટની ચેતવણી
