US Crackdown: અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્રે અનડૉક્યુમેન્ટેડ (દસ્તાવેજ વિનાના) પ્રવાસીઓ સામે અત્યાર સુધીનું સૌથી કડક અભિયાન છેડ્યું છે. આ કડક ઇમિગ્રેશન નીતિની સીધી અસર ભારતીય નાગરિકો પર પડી રહી છે. હાલના અહેવાલો મુજબ, અમેરિકામાં વસતા આશરે 18,000 ભારતીયો ડિપોર્ટેશનના જોખમમાં છે.
US Crackdown: “ન અપીલ, ન દલીલ, ન વકીલ”
ટ્રમ્પ પ્રશાસનની નવી રણનીતિ મુજબ, પકડાયેલા લોકો પાસે પોતાનો પક્ષ રજૂ કરવાનો કે કાનૂની લડાઈ લડવાનો કોઈ વિકલ્પ બાકી રહ્યો નથી. ICE (ઇમિગ્રેશન કસ્ટમ્સ એન્ડ એન્ફોર્સમેન્ટ)ની ટીમો દ્વારા કરવામાં આવી રહેલા સતત દરોડામાં લોકોને પકડીને સીધા ડિટેન્શન સેન્ટરોમાં ધકેલી દેવામાં આવી રહ્યા છે.
ન્યૂયોર્કના જાણીતા ઇમિગ્રેશન એટર્ની ગ્રેગ સિસ્કિન્ડના જણાવ્યા અનુસાર, “30 વર્ષના અનુભવમાં મેં ક્યારેય આવી સ્થિતિ જોઈ નથી. અગાઉ દરેકને પોતાની વાત રજૂ કરવાની સુનાવણીની તક મળતી હતી, પરંતુ હવે ICE સીધી કાર્યવાહી કરી રહી છે.”
US Crackdown: કરોડોના ખર્ચે નવા ડિટેન્શન સેન્ટર
ડિપોર્ટેશનની પ્રક્રિયાને વેગ આપવા માટે ટ્રમ્પ સરકારે અત્યાર સુધીમાં લગભગ 16,500 કરોડ રૂપિયાનો ખર્ચ કર્યો છે. આ રકમથી એલ પાસો અને કેલિફોર્નિયામાં વિશાળ વેરહાઉસ ખરીદીને તેને ડિટેન્શન સેન્ટરમાં ફેરવવામાં આવ્યા છે. હાલમાં આ કેન્દ્રોમાં લગભગ 12,000 પ્રવાસીઓને રાખવામાં આવ્યા છે.
US Crackdown: આંકડા શું કહે છે?
ભારતના વિદેશ મંત્રાલય (MEA) દ્વારા જૂન 2026માં જાહેર કરવામાં આવેલા ચોંકાવનારા આંકડા નીચે મુજબ છે:
- 2025માં ડિપોર્ટેશન: 3,567 ભારતીયોને અમેરિકાથી હાંકી કાઢવામાં આવ્યા હતા.
- 2026માં સ્થિતિ: જૂન 2026 સુધીમાં 1,076 ભારતીયોને ડિપોર્ટ કરવામાં આવ્યા છે.
માનવીય સ્થિતિ પર સવાલો
5 ફેબ્રુઆરી 2025ના રોજ 104 ભારતીયોને સૈન્ય વિમાન દ્વારા હાથકડી અને પગમાં બેડીઓ પહેરાવી અમૃતસર મોકલવાની ઘટના બાદ ભારે વિવાદ થયો હતો. ત્યારબાદ પણ સૈન્ય વિમાનોનો ઉપયોગ કરીને ડિપોર્ટેશન કરવાની પ્રક્રિયા ચાલુ રાખવામાં આવતા સ્થિતિ વધુ ગંભીર બની છે. ન્યૂયોર્ક, ટેક્સાસ, કેલિફોર્નિયા અને ન્યૂજર્સી જેવા રાજ્યોમાંથી સામે આવેલા ગ્રાઉન્ડ રિપોર્ટ્સ મુજબ, ડિટેન્શન સેન્ટરોમાં રાખવામાં આવેલા લોકો સાથે દુર્વ્યવહારની ફરિયાદો પણ વધી રહી છે.
વધુ સમાચાર વાંચવા માટે અંહી ક્લિક કરો
સુરતના માંડવી જંગલમાં વન્યજીવ સંરક્ષણની નવી આશા, માનવ-દીપડા સંઘર્ષ ઘટાડવા ૫૦ ચિત્તલ છોડાયા
