The Great Monsoon Wait: દેશભરમાં આતુરતાપૂર્વક જેની રાહ જોવાઈ રહી છે તે દક્ષિણ-પશ્ચિમ ચોમાસાની ગતિ હાલમાં નબળી પડી ગઈ છે. સોમવાર, 15 જૂનની સેટેલાઇટ તસવીરોએ ચિંતા વધારી છે, કારણ કે દેશના મોટાભાગના વિસ્તારોમાંથી ચોમાસાના વાદળો ગાયબ જોવા મળ્યા છે. હવામાન વિભાગ (IMD) ના જણાવ્યા અનુસાર, 4 થી 15 જૂન વચ્ચે દેશમાં સામાન્ય રીતે 53.7 મિમી વરસાદ થવો જોઈતો હતો, તેના બદલે માત્ર 19.2 મિમી વરસાદ નોંધાયો છે. આમ, ચોમાસાના પ્રારંભિક ગાળામાં જ 64% નો મોટો ઘટાડો જોવા મળ્યો છે.
ચોમાસું દક્ષિણ ભારતથી આગળ વધીને હાલ મહારાષ્ટ્ર, તેલંગાણા અને આંધ્રપ્રદેશની આસપાસ અટકી ગયું છે. બીજી તરફ, પૂર્વોત્તર રાજ્યોને આવરી લીધા પછી તે બિહાર, ઝારખંડ અને પશ્ચિમ બંગાળ પાસે પણ થંભી ગયું છે. આ સ્થિતિના કારણે ગુજરાત, રાજસ્થાન, મધ્ય પ્રદેશ અને દિલ્હી સહિત દેશના 16 રાજ્યોમાં વરસાદની રાહ વધુ લાંબી બની છે.
The Great Monsoon Wait: આગામી બે દિવસ દેશમાં કેવું રહેશે હવામાન?
- 16 જૂન: બિહાર, ઝારખંડ, ઓડિશા, પશ્ચિમ બંગાળ અને સિક્કિમમાં વરસાદની સંભાવના છે. બિહારમાં 50-70 કિમીની ઝડપે પવન ફૂંકાઈ શકે છે. આસામ, મેઘાલય, અરુણાચલ પ્રદેશ, તમિલનાડુ અને કર્ણાટકમાં ભારે વરસાદની આશંકા છે. જ્યારે રાજસ્થાન, એમપી અને છત્તીસગઢમાં ગાજવીજ સાથે પવન ફૂંકાશે.
- 17 જૂન: સિક્કિમ, ઉત્તર બંગાળ અને પૂર્વોત્તર રાજ્યોમાં ભારે વરસાદ ચાલુ રહેશે. ઝારખંડ, ઓડિશા, પશ્ચિમ બંગાળ, તમિલનાડુ અને મહારાષ્ટ્રના કેટલાક ભાગોમાં વરસાદી માહોલ રહેશે. રાજસ્થાન અને એમપીમાં 40-60 કિમીની ઝડપે તેજ પવન સાથે વરસાદ પડી શકે છે.
The Great Monsoon Wait: મહારાષ્ટ્રમાં હીટવેવની આશંકા
ચોમાસાના વિલંબ વચ્ચે મહારાષ્ટ્રના મરાઠવાડામાં 17 જૂન સુધી અને વિદર્ભમાં 16 જૂન સુધી લૂ (હીટવેવ) ની સ્થિતિ રહેશે. કોંકણ અને ગોવામાં ગરમીની સાથે અસહ્ય ભેજવાળું હવામાન અને રાત્રિના સમયે પણ ગરમી ચાલુ રહેશે.
The Great Monsoon Wait: મુખ્ય રાજ્યોના હવામાન અહેવાલ પર એક નજર:
૧. ગુજરાત, રાજસ્થાન અને મધ્ય પ્રદેશ
- ગુજરાત: ચોમાસાના વાદળો ગાયબ થતાં હજુ વરસાદ માટે રાહ જોવી પડશે.
- મધ્ય પ્રદેશ: રાજ્યમાં પ્રી-મોન્સુન એક્ટિવિટી ચાલુ છે. ભોપાલ અને ઇન્દોરમાં 70 કિમીની ઝડપે પવન ફૂંકાયો હતો. આજે ઉજ્જૈન-વિદિશા સહિત 30 જિલ્લામાં વરસાદ અને ભોપાલ-ગ્વાલિયરમાં આગામી 2 દિવસ વાવાઝોડાનું એલર્ટ છે.
- રાજસ્થાન: આજે 15 જિલ્લાઓમાં વરસાદનું એલર્ટ છે. રવિવારે ચિત્તોડગઢમાં એક ઇંચ વરસાદ પડ્યો હતો, જ્યારે ફલોદી 42.8°C સાથે સૌથી ગરમ શહેર રહ્યું હતું.
૨. ઉત્તર પ્રદેશ અને બિહાર
- ઉત્તર પ્રદેશ: આજે 32 જિલ્લાઓમાં 60 કિમીની ઝડપે વાવાઝોડા અને વરસાદનું એલર્ટ છે. જોકે, આગામી 4 દિવસમાં તાપમાન 5 થી 7°C વધી શકે છે. યુપીમાં ચોમાસું 17 થી 20 જૂન વચ્ચે સોનભદ્ર અને લલિતપુરના રસ્તે પ્રવેશે તેવી શક્યતા છે.
- બિહાર: રાજ્યના 19 જિલ્લામાં વરસાદનું યલો એલર્ટ છે. ચોમાસાની એન્ટ્રી થઈ ચૂકી હોવા છતાં ગરમી યથાવત છે. રવિવારે શેખપુરામાં 40°C તાપમાન નોંધાયું હતું.
૩. પંજાબ અને હરિયાણા
- પંજાબ: ચંદીગઢ સહિત પંજાબમાં એક જ દિવસમાં તાપમાન 5.4°C વધ્યું છે. આજે 6 જિલ્લામાં 40-50 કિમીની ઝડપે પવન સાથે વરસાદની સંભાવના છે. પટિયાલામાં સૌથી વધુ 38.1°C તાપમાન રહ્યું હતું.
- હરિયાણા: 15 જિલ્લામાં વરસાદ અને 50 કિમીની ઝડપે પવન ફૂંકાવાની શક્યતા છે. જોકે, આગામી 5 દિવસમાં મહત્તમ તાપમાન 4 થી 6°C વધી શકે છે.
૪. પહાડી રાજ્યો (હિમાચલ અને ઉત્તરાખંડ)
- હિમાચલ પ્રદેશ: રાજ્યમાં આગામી 6 દિવસ વરસાદની સંભાવના છે. સામાન્ય રીતે 22-25 જૂને આવતું ચોમાસું આ વખતે 20 જૂન પછી ગમે ત્યારે દસ્તક દઈ શકે છે.
- ઉત્તરાખંડ: ઉત્તરકાશી અને ચમોલી સહિત 5 જિલ્લામાં વરસાદ અને તેજ પવનની આગાહી છે. જોકે, મેદાની વિસ્તારોમાં આગામી 4-5 દિવસમાં પારો 5°C સુધી વધી શકે છે, જેથી ગરમી અને ભેજનું પ્રમાણ વધશે.
વધુ સમાચાર વાંચવા માટે અંહી ક્લિક કરો: ડિઝલની ગંભીર અછતને પગલે ક્વોરી અને પરિવહન ઉદ્યોગ ઠપ્પ, કલેક્ટરને અપાયું આવેદનપત્ર
