Shocking Turn in Ahmedabad: સાબરમતી રિવરફ્રન્ટ પરથી થોડા દિવસો પહેલા મળી આવેલી અજાણ્યા યુવકની લાશના કેસમાં ચોંકાવનારો ખુલાસો થયો છે. શરૂઆતમાં જે ઘટના અકસ્માત કે ડૂબી જવાની લાગતી હતી, તે હકીકતમાં એક સુનિયોજિત અને ક્રૂર હત્યા હોવાનું પોલીસ તપાસમાં બહાર આવ્યું છે. પોલીસે DNA રિપોર્ટ અને મૃતકના હાથ પર ત્રોફાવેલા ટેટૂના આધારે તેની ઓળખ પ્રસ્થાપિત કરી છે.
Shocking Turn in Ahmedabad: ઓળખ છુપાવવા ચહેરા પર કર્યા ઘા
પોલીસ તપાસમાં સામે આવ્યું છે કે, હત્યારાઓએ યુવકના માથા અને ચહેરાના ભાગે તીક્ષ્ણ તેમજ બોથડ હથિયારોના અસંખ્ય ઘા ઝીંકી તેને મોતને ઘાટ ઉતાર્યો હતો. હત્યા કર્યા બાદ પુરાવાનો નાશ કરવા અને મૃતકની ઓળખ ન થાય તે માટે લાશને સાબરમતી નદીમાં ફેંકી દેવામાં આવી હતી. પોસ્ટમોર્ટમ રિપોર્ટમાં આ ઈજાઓ હુમલાની હોવાનું સ્પષ્ટ થતા જ રિવરફ્રન્ટ ઈસ્ટ પોલીસે હત્યાનો ગુનો નોંધ્યો હતો.
Shocking Turn in Ahmedabad: હાથ પરના ટેટૂ અને DNA રિપોર્ટથી થઈ ઓળખ
મૃતક યુવકની ઓળખ ગાંધીનગરના રાંધેજા ગામના ધવલ રાવળ તરીકે થઈ છે. ધવલના હાથ પર ‘D, DG, ભાવેશ અને ધવલ’ જેવા નામોના ટેટૂ (ત્રોફાવેલા નામ) હતા, જે પોલીસ માટે સૌથી મોટી કડી સાબિત થયા હતા. ધવલ ગુમ થતા તેના પિતા સોમાભાઈએ પેથાપુર પોલીસ મથકે ફરિયાદ નોંધાવી હતી. પોલીસે લાશનો ફોટો બતાવતા પિતાએ શંકા વ્યક્ત કરી હતી અને અંતે DNA રિપોર્ટમાં લાશ ધવલની હોવાની પુષ્ટિ થઈ હતી.
Shocking Turn in Ahmedabad: પોલીસ તપાસનો ધમધમાટ
ધવલ રાવળને પાંચ વર્ષનો પુત્ર છે, જ્યારે તેની પત્ની છેલ્લા દોઢ વર્ષથી પિયરમાં અલગ રહેતી હોવાનું જાણવા મળ્યું છે. સાબરમતી રિવરફ્રન્ટ ઈસ્ટ પોલીસે અજાણ્યા હત્યારાઓ વિરુદ્ધ ગુનો નોંધીને તપાસના ચક્રો ગતિમાન કર્યા છે. પોલીસ હવે ધવલના અંગત મિત્રો અને તેની સાથે છેલ્લા કલાકોમાં સંપર્કમાં રહેલા લોકોની કડક પૂછપરછ કરી રહી છે, જેથી આ ઘાતકી હત્યા પાછળનું ચોક્કસ કારણ જાણી શકાય.
વધુ સમાચાર વાંચવા માટે અંહી ક્લિક કરો
જામનગરના જોડીયા-ધ્રોલ હાઈવે પર ટ્રક પાછળ બોલેરો ઘૂસી ગઈ, મેળામાં જતા યુવાનનું કરુણ મોત
