Shocking Theft In Surat Bank: સુરત જિલ્લાના કોસંબા વિસ્તારમાંથી બેંકની અંદર ચોરીની એક ચોંકાવનારી ઘટના સામે આવી છે. કોસંબા ખાતે આવેલી સ્ટેટ બેંક ઓફ ઈન્ડિયા (SBI)ની બ્રાન્ચમાં એક શાતિર વૃદ્ધે નજર ચૂકવીને એક યુવતીના પર્સની ચોરી કરી લીધી હતી. આ સમગ્ર ઘટના બેંકમાં લાગેલા CCTV કેમેરામાં કેદ થઈ ગઈ છે. યુવતી પોતાની બેગ ટેબલ પર મૂકીને કાઉન્ટર પર ગઈ, બસ આ થોડી સેકન્ડોની બેદરકારીનો લાભ ઉઠાવીને વૃદ્ધે હાથફેરો કરી લીધો હતો.
Shocking Theft In Surat Bank: ટેબલ પર બેગ મૂકવી ભારે પડી
મળતી માહિતી મુજબ, એક યુવતી પોતાના અંગત કામ અર્થે કોસંબાની SBI બેંકમાં આવી હતી. બેંકની અંદર કામકાજ દરમિયાન તેણે પોતાની બેગ ત્યાં નજીકમાં રાખેલા એક ટેબલ ઉપર મૂકી દીધી હતી. બેગ ટેબલ પર મૂક્યા બાદ યુવતી પોતાનું કામ પતાવવા માટે બેંકના કાઉન્ટર તરફ ગઈ હતી. યુવતીનું ધ્યાન કાઉન્ટર પર હતું, ત્યારે જ ત્યાં હાજર એક વૃદ્ધની નજર આ બેગ પર પડી હતી.
Shocking Theft In Surat Bank: સોફા પર બેઠેલા વૃદ્ધની શાતિર ચાલ
બેંકના ટેબલની બિલકુલ નજીક આવેલા સોફા પર એક વૃદ્ધ બેઠો હતો. યુવતીને કાઉન્ટર પર વ્યસ્ત જોઈને આ વૃદ્ધે ચોરીનો પ્લાન બનાવ્યો. તેણે આજુબાજુ નજર દોડાવીને કોઈ જોઈ રહ્યું નથી તેની ખાતરી કરી અને સોફા પર બેઠા-બેઠા જ ટેબલ પર રાખેલી યુવતીની બેગની ચેઈન ખોલી નાખી હતી. વૃદ્ધે અત્યંત શાતિરતાથી બેગની અંદર હાથ નાખી તેમાંથી કિંમતી પર્સ બહાર કાઢી લીધું હતું અને પર્સ પોતાના ખિસ્સામાં સરકાવીને બેંકમાંથી રફુચક્કર થઈ ગયો હતો.
યુવતી કામ પતાવીને પરત આવી ત્યારે બેગ ખુલ્લી હતી અને અંદરથી પર્સ ગાયબ હતું. આજુબાજુ પૂછપરછ કરવા છતાં કોઈ ભાળ મળી ન હતી.
Shocking Theft In Surat Bank: રોકડા ૧૦ હજાર અને દસ્તાવેજો ચોરાયા
ભોગ બનનાર યુવતી જ્યારે કાઉન્ટર પરથી પરત ફરી ત્યારે તેની આંખો પહોળી થઈ ગઈ હતી. બેગમાં તપાસ કરતા માલુમ પડ્યું કે તેનું પર્સ ગાયબ હતું. આ પર્સમાં ૧૦,૦૦૦ રૂપિયાની રોકડ રકમ તેમજ યુવતીના અત્યંત મહત્વના અને જરૂરી સરકારી દસ્તાવેજો (ડોક્યુમેન્ટ્સ) હતા. પર્સ ન મળતા બેંકમાં થોડીવાર માટે અફરાતફરીનો માહોલ સર્જાયો હતો.
Shocking Theft In Surat Bank: CCTV એ ખોલી વૃદ્ધની પોલ, પોલીસ તપાસ શરૂ
પર્સ ચોરી થયાની શંકા જતા તાત્કાલિક બેંક મેનેજમેન્ટને જાણ કરવામાં આવી હતી. ત્યારબાદ બેંકમાં લાગેલા સીસીટીવી (CCTV) ફૂટેજ ચેક કરવામાં આવ્યા હતા. સીસીટીવી જોતા જ સૌ કોઈ સ્તબ્ધ થઈ ગયા હતા. ફૂટેજમાં સોફા પર બેઠેલો વૃદ્ધ ચોરી કરતો સ્પષ્ટપણે નજરે પડ્યો હતો. ધોળા વાળ ધરાવતા આ વૃદ્ધે જે રીતે આખી ચોરીને અંજામ આપ્યો તે જોઈને બેંકના કર્મચારીઓ પણ ચોંકી ગયા હતા.
આ સમગ્ર મામલે ભોગ બનનાર યુવતી દ્વારા સીસીટીવી ફૂટેજના આધારે કોસંબા પોલીસ સ્ટેશનમાં ફરિયાદ નોંધાવવામાં આવી છે. કોસંબા પોલીસે સીસીટીવી ફૂટેજ કબજે કરીને કાયદેસરની કાર્યવાહી હાથ ધરી છે અને આ ‘સફેદ વાળ વાળા’ શાતિર ચોર વૃદ્ધને પકડી પાડવા ચક્રો ગતિમાન કર્યા છે.
વધુ સમાચાર વાંચવા માટે અંહી ક્લિક કરો
