SURAT SCHOOL PROTEST: ડાયમંડ સિટી સુરતના મોટા વરાછા વિસ્તારમાં સરકારી શાળાના તંત્ર સામે વાલીઓએ મોરચો માંડ્યો છે. શાળા નંબર 354 માં ભણતા અંગ્રેજી માધ્યમના વિદ્યાર્થીઓને અન્ય શાળામાં સ્થળાંતર (શિફ્ટ) કરવાના મનસ્વી નિર્ણય સામે વાલીઓનો રોષ ફાટી નીકળ્યો છે. પોતાના બાળકોના ભવિષ્ય અને શિક્ષણની સુરક્ષા માટે મોટી સંખ્યામાં વાલીઓ શાળા પરિસરમાં જ ઉપવાસ પર ઉતરી ગયા છે, જેને પગલે સમગ્ર પંથકમાં ચર્ચા જાગી છે.
SURAT SCHOOL PROTEST: ૫ વર્ષથી ભણતા ૩૨૦ બાળકોના ભવિષ્ય સાથે ચેડાં?
મળતી વિગતો મુજબ, મોટા વરાછાની શાળા નંબર 354 માં છેલ્લા 5 વર્ષથી આશરે 320 જેટલા વિદ્યાર્થીઓ અંગ્રેજી માધ્યમમાં અભ્યાસ કરી રહ્યા છે. આ બાળકોનો શાળા અને ત્યાંના વાતાવરણ સાથે એક લાગણીસભર સંબંધ બંધાયેલો છે. જોકે, શિક્ષણ સમિતિ દ્વારા આ તમામ વિદ્યાર્થીઓને અચાનક જ શાળા નંબર 309 માં સ્થળાંતર કરવાનો આદેશ અપાતા વાલીઓ ચોંકી ઉઠ્યા છે.
વાલીઓનો સૌથી મોટો આક્ષેપ એ છે કે તંત્ર દ્વારા આ નિર્ણય 14 મે, 2026 ના રોજ જ લઈ લેવામાં આવ્યો હતો. આમ છતાં, 2 જૂને શાળા શરૂ થવાના માત્ર 5 દિવસ પહેલાં જ વાલીઓને આ અંગેની જાણ કરવામાં આવી. તંત્રની આ ગુપ્ત કાર્યપદ્ધતિ સામે વાલીઓએ સવાલ ઉઠાવતા આક્રોશભેર કહ્યું કે, “બાળકોના ભણતર માટે વાલીઓને ઉપવાસ પર બેસવું પડે તેનાથી વધુ શરમજનક શાસકો માટે બીજું શું હોઈ શકે?”
SURAT SCHOOL PROTEST: વાલીઓના મુખ્ય આક્ષેપો અને ચિંતા
- સંમતિનો અભાવ: આટલો મોટો નિર્ણય લેતા પહેલાં તંત્ર દ્વારા કોઈ પણ વાલીની સંમતિ લેવામાં આવી નથી.
- મીટિંગ વગર નિર્ણય: વહીવટી તંત્ર દ્વારા નિયમ મુજબ કોઈ વાલી મીટિંગ (PTA) કે જાહેર સુનાવણી યોજવામાં આવી નથી.
- અંતરની સમસ્યા: નવી શાળા દૂર હોવાથી નાના ભૂલકાઓને ઉનાળા-ચોમાસામાં વધુ અંતર કાપવું પડશે, જેનાથી તેમની સુરક્ષા જોખમાશે.
- સુવિધાઓનો અભાવ: નવી શાળા નંબર 309 માં પૂરતી માળખાકીય સુવિધાઓ છે કે નહીં તે અંગે કોઈ સ્પષ્ટતા કરવામાં આવી નથી.
- માનસિક અસર: ચાલુ શૈક્ષણિક વર્ષે અચાનક શાળા બદલાવાથી બાળકોના શિક્ષણ અને તેમના માનસિક વિકાસ પર નકારાત્મક અસર થવાની ભીતિ છે.
“અમે કોઈ રાજકીય વિરોધ નથી કરી રહ્યા, અમે શાંતિપૂર્ણ અને કાયદેસરની રીતે અમારા બાળકોના શિક્ષણ અને ભવિષ્યની સુરક્ષા માટે લડી રહ્યા છીએ.” – વિરોધ કરી રહેલા વાલીઓ
SURAT SCHOOL PROTEST: વાલીઓની મુખ્ય માંગણીઓ:
૧. વિદ્યાર્થીઓના હિતમાં સ્થળાંતરનો આ નિર્ણય તાત્કાલિક ધોરણે સ્થગિત કરવામાં આવે. ૨. અંગ્રેજી માધ્યમના તમામ વર્ગો હાલની શાળા નંબર 354 ખાતે જ યથાવત ચાલુ રાખવામાં આવે. ૩. શિક્ષણ વિભાગના અધિકારીઓ તાત્કાલિક તમામ વાલીઓ સાથે ખુલ્લી બેઠક યોજીને ચર્ચા કરે. ૪. વેકેશન દરમિયાન લેવાયેલા આ મનસ્વી નિર્ણયની યોગ્ય તપાસ કરી જવાબદાર અધિકારીઓ સામે કડક કાર્યવાહી થાય.
હાલ તો મોટા વરાછામાં વાલીઓ મક્કમતા પૂર્વક ઉપવાસ આંદોલન ચલાવી રહ્યા છે. હવે જોવાનું એ રહેશે કે સુરત મહાનગરપાલિકાનું શિક્ષણ વિભાગ જનતાના આક્રોશ સામે નમીને નિર્ણય બદલે છે કે પછી વાલીઓએ પોતાના હક માટે આંદોલન વધુ તેજ કરવું પડશે.
વધુ સમાચાર વાંચવા માટે અંહી ક્લિક કરો
કોસંબાની SBI બેંકમાં ચોરીની લાઈવ કરતૂત, યુવતી નજર ચૂકવી વૃદ્ધ ૧૦ હજાર રોકડા ભરેલું પર્સ સરકાવી ગયો
