Santej Factory Fire: અમદાવાદ નજીક ગાંધીનગર જિલ્લાની હદમાં આવેલા સાંતેજ ઇન્ડસ્ટ્રિયલ એરિયામાં શુક્રવારે સાંજે લાગેલી ભયાનક આગે ભારે તબાહી મચાવી છે. શુક્રવાર સાંજથી શરૂ થયેલા આગના આ તાંડવ પર માંડ કાબૂ મેળવાયો હતો, ત્યાં શનિવારે સવારે ફેક્ટરી પરિસરમાંથી એક વ્યક્તિનો સળગી ગયેલો મૃતદેહ મળી આવતા સમગ્ર વિસ્તારમાં અરેરાટી વ્યાપી ગઈ છે. પ્રાથમિક અંદાજ મુજબ, આ આગના કારણે કંપનીને અંદાજે 80 કરોડ રૂપિયાનું મોટું આર્થિક નુકસાન થયું હોવાનું સામે આવ્યું છે.
Santej Factory Fire: કેમિકલના કારણે આગે વિકરાળ સ્વરૂપ ધારણ કર્યું
સાંતેજ ઇન્ડસ્ટ્રિયલ એરિયામાં આવેલી ‘ફેઇથ ઇન્ડસ્ટ્રિયલ લિમિટેડ’ નામની કેમિકલ અને પ્લાસ્ટિક મેન્યુફેક્ચરિંગ ફેક્ટરીમાં શુક્રવારે સાંજે 05:00 વાગ્યે અચાનક આગ ફાટી નીકળી હતી. ફેક્ટરીમાં કેમિકલ અને પ્લાસ્ટિકના ઉત્પાદન માટે રાખવામાં આવેલો અતિ જ્વલનશીલ કાચો માલ હાજર હોવાથી આગે મિનિટોમાં જ આખી બિલ્ડિંગને લપેટમાં લઈ લીધી હતી. આગ એટલી ભીષણ હતી કે તે બાજુમાં આવેલી ‘ટેક્નો ઇન્સ્ટ્રુમેન્ટ’ ફેક્ટરીમાં પણ ફેલાઈ ગઈ હતી અને તેને પણ મોટું નુકસાન પહોંચાડ્યું હતું. આગને પગલે આસપાસના કામદારોમાં ભારે નાસભાગ અને અફરાતફરી મચી ગઈ હતી.
Santej Factory Fire: 98 જવાનો અને 15 વાહનોનું મેગા ઓપરેશન
આગની ગંભીરતાને જોતા ફાયર બ્રિગેડ દ્વારા મેગા ફાઇટીંગ ઓપરેશન શરૂ કરાયું હતું. થલતેજ અને ચાંદખેડા ફાયર સ્ટેશન સહિત આસપાસની ટીમો તાત્કાલિક ઘટનાસ્થળે દોડી ગઈ હતી.
- સાધનોની તૈનાતી: આ ઓપરેશનમાં 20 કિલોલીટરની ક્ષમતા ધરાવતા 6 વોટર બાઉઝર, 1 ઇમરજન્સી મેડિકલ વ્હીકલ અને 8 ફર્સ્ટ રિસ્પોન્ડર વાહનો કામે લગાડાયા હતા.
- જવાનોની જહેમત: એડિશનલ ચીફ ફાયર ઓફિસરની આગેવાનીમાં 64 ફાયરમેન, 6 જમાદાર, 20 ડ્રાઇવર અને અધિકારીઓ સહિત કુલ 98 લોકોની ટીમે રાત-દિવસ એક કરીને કલાકોની ભારે જહેમત બાદ આગ પર સંપૂર્ણ કાબૂ મેળવ્યો હતો.
Santej Factory Fire: બીજા દિવસે મૃતદેહ મળ્યો, FSL તપાસ શરૂ
આ દુર્ઘટનામાં શુક્રવારે કોઈ જાનહાનિની આશંકા નહોતી, પરંતુ શનિવારે સવારે 7 વાગ્યે સર્ચ ઓપરેશન દરમિયાન ફેક્ટરીમાંથી એક અજાણ્યો મૃતદેહ મળી આવ્યો હતો. પોલીસે મૃતદેહને પોસ્ટમોર્ટમ અને ઓળખ વિધિ માટે હોસ્પિટલ ખસેડ્યો છે. ફેક્ટરીની અંદર મોંઘીદાટ મશીનરી અને કેમિકલનો જથ્થો બળીને ખાખ થઈ જતા અંદાજે 80 કરોડનું નુકસાન અંકાયું છે. આગ લાગવાનું ચોક્કસ કારણ હજુ જાણી શકાયું નથી, પરંતુ પોલીસ અને એફએસએલ (FSL) ની ટીમ દ્વારા ટેકનિકલ તપાસ હાથ ધરવામાં આવી છે.
વધુ સમાચાર વાંચવા માટે અંહી ક્લિક કરો
