Porbandar Breaking: પોરબંદર લોકલ ક્રાઈમ બ્રાન્ચ (LCB) એ એક મોટી સફળતા મેળવીને કમલાબાગ પોલીસ સ્ટેશન વિસ્તારમાં ચાલતી નકલી ઇંગ્લીશ દારૂ બનાવવાની ફેક્ટરીનો પર્દાફાશ કર્યો છે. પોલીસે વીઆઈપી વિસ્તાર ગણાતા કલેક્ટર ઇન્સ્પેક્શન બંગલાની પાછળ, સંદીપની રોડ પર ઓચિંતી રેડ પાડીને આ કૌભાંડ ઝડપી પાડ્યું છે. આ મામલે પોલીસે ૪ લાખથી વધુની કિંમતનો મુદ્દામાલ જપ્ત કરી મુખ્ય આરોપીની ધરપકડ કરી છે, જ્યારે અન્ય ત્રણ ફરાર આરોપીઓની શોધખોળ શરૂ કરી છે.
Porbandar Breaking: બ્રાન્ડેડ કંપનીના નામે થતું હતું નકલી દારૂનું પેકિંગ
લોકલ ક્રાઈમ બ્રાન્ચને ચોક્કસ બાતમી મળી હતી કે સંદીપની રોડ પર અંદરની બાજુએ મોટા પાયે નકલી ‘ઇન્ડિયન મેડ ફોરેન લિકર’ (IMFL) બનાવવાનું નેટવર્ક ચાલી રહ્યું છે. આ બાતમીના આધારે પોલીસે મોડી રાત્રે દરોડો પાડ્યો હતો. આરોપીઓ જાણીતી બ્રાન્ડના નામે ડુપ્લીકેટ દારૂ તૈયાર કરતા હતા. ફેક્ટરીમાંથી રોયલ ચેલેન્જ વ્હીસ્કીની ૪૫૬ બોટલો (૩૮ પેટી નકલી દારૂ), દારૂ બનાવવા માટેનું કેમિકલ, પ્રવાહી, ઇન્જેક્શન અને બોટલ પેક કરવાની મશીનરી સહિત કુલ રૂ. ૪,૦૧,૧૦૬ નો મુદ્દામાલ જપ્ત કરવામાં આવ્યો છે.
Porbandar Breaking: મુખ્ય આરોપી રંગેહાથ ઝડપાયો
પોલીસે રેડ દરમિયાન ઘટનાસ્થળેથી મુખ્ય આરોપી બાબુ કેશવ ઓડેદરાને રંગેહાથ ઝડપી લીધો હતો. જો કે, આ કૌભાંડમાં સંડોવાયેલા અન્ય ત્રણ સાગરીતો નાસી છૂટવામાં સફળ રહ્યા હતા.
Porbandar Breaking: વોન્ટેડ આરોપીઓનો ગુનાહિત ઇતિહાસ
આ ગુનામાં સામેલ અને હાલ ફરાર આરોપીઓમાં (૧) રણજીત લીલા ભુતીયા, (૨) ભરત લીલા ભુતીયા (બંને રહે. રાણા કંડોર્ણા) અને (૩) ભોલા દીપક ખુંટી (રેહે. એરડા) નો સમાવેશ થાય છે. પોલીસ તપાસમાં સામે આવ્યું છે કે આ ત્રણેય આરોપીઓ અગાઉ ભાયાવદર પોલીસ સ્ટેશનના પ્રોહિબિશનના ગુનામાં પણ સંડોવાયેલા રીઢા ગુનેગારો છે.
હાલ આ સમગ્ર મામલે કમલાબાગ પોલીસ સ્ટેશનમાં પ્રોહિબિશન એક્ટની વિવિધ કલમો હેઠળ ગુનો નોંધીને ફરાર ત્રણેય આરોપીઓને પકડવા માટે ચક્રો ગતિમાન કરવામાં આવ્યા છે.
વધુ સમાચાર વાંચવા માટે અંહી ક્લિક કરો: ઓઢવ બ્રેકિંગ: ૬ કલાકની ભારે જહેમત બાદ આગ પર કાબૂ, ‘અંબિકા પ્લાસ્ટિક’માં લાગેલી આગે લીધો એકનો ભોગ.
