Jabalpur Cruise Horror: મધ્યપ્રદેશના જબલપુરમાં બરગી ડેમમાં સર્જાયેલી ક્રૂઝ દુર્ઘટનાએ માનવતા અને માતૃત્વની એક એવી કરુણ ગાથા રજૂ કરી છે, જેણે સૌ કોઈની આંખો ભીની કરી દીધી છે. બચાવ કામગીરી દરમિયાન જ્યારે ગોતાખોરો ક્રૂઝની અંદર પહોંચ્યા, ત્યારે એક એવું દ્રશ્ય જોવા મળ્યું કે કઠણ કાળજાના જવાનો પણ ધ્રુસકે ને ધ્રુસકે રડી પડ્યા હતા.
Jabalpur Cruise Horror: અંતિમ શ્વાસ સુધી પુત્રને બચાવવાનો પ્રયાસ
બચાવ દળની તપાસ દરમિયાન ક્રૂઝના કાટમાળ નીચેથી એક મહિલાનો મૃતદેહ મળી આવ્યો હતો. આ મહિલાએ પોતાના 4 વર્ષના માસૂમ દીકરાને પોતાની છાતી સરસો એટલો મજબૂતીથી જકડી રાખ્યો હતો કે જાણે તે તેને મોતના પંજામાંથી બચાવવા માંગતી હોય. કાળના કરૂણ પંજામાં પણ માતાએ પુત્રનો સાથ છોડ્યો ન હતો. આ દ્રશ્ય જોઈને બચાવ કામગીરીનું નિરીક્ષણ કરી રહેલા કેબિનેટ મંત્રી રાકેશ સિંહ અને અન્ય અધિકારીઓ પણ ભાવુક થઈ ગયા હતા.
Jabalpur Cruise Horror: ગોતાખોરો માટે પડકારજનક ઓપરેશન
આગ્રાથી આવેલી અર્ધસૈનિક દળની ખાસ ટીમે આ ઓપરેશન પાર પાડ્યું હતું. ગોતાખોરોએ જણાવ્યું કે:
- પાણીની અંદર વિઝિબિલિટી (દ્રશ્યતા) શૂન્ય સમાન હતી.
- ક્રૂઝનું માળખું ધરાશાયી થતાં અંદર જવાના રસ્તા સાંકડા થઈ ગયા હતા, જેને હથોડા વડે તોડીને રસ્તો બનાવવો પડ્યો હતો.
- એક તબક્કે તો એક ગોતાખોર પોતે પણ લોખંડના સળિયામાં ફસાઈ ગયો હતો, જેને ભારે જહેમત બાદ બચાવી લેવાયો હતો.
Jabalpur Cruise Horror: બેદરકારીએ લીધો ભોગ
ગુરુવારે સાંજે આવેલા ભયાનક વાવાઝોડાને કારણે આ અકસ્માત સર્જાયો હતો. અત્યાર સુધીમાં આ દુર્ઘટનામાં 9 લોકોના મોત થયા છે, જ્યારે 22 લોકોને સુરક્ષિત બહાર કાઢવામાં આવ્યા છે. આરોપ છે કે ભારે પવન હોવા છતાં ક્રૂઝ ચાલકે ચેતવણીની અવગણના કરી હતી અને મુસાફરોને લાઇફ જેકેટ પણ પહેરાવવામાં આવ્યા ન હતા.
આ ઘટના માત્ર એક અકસ્માત નથી, પરંતુ વહીવટી તંત્ર અને સંચાલકોની બેદરકારીનું પરિણામ છે, જેણે એક હસતા-રમતા પરિવારને જળસમાધિ આપી દીધી.
વધુ સમાચાર વાંચવા માટે અંહી ક્લિક કરો
