Inferno in Sanand: અમદાવાદ ગ્રામ્ય વિસ્તારના અગ્રણી ઔદ્યોગિક હબ ગણાતા સાણંદમાં આજે એક મોટી દુર્ઘટના સામે આવી છે. સાણંદના મોરૈયા વિસ્તારમાં આવેલી એક ખાનગી કલર બનાવતી કંપનીમાં અચાનક ભીષણ આગ ફાટી નીકળતાં સમગ્ર વિસ્તારમાં અફરાતફરી મચી ગઈ હતી. આગ એટલી ભયાવહ હતી કે ફેક્ટરીમાંથી નીકળતા કાળા ધુમાડાના ગોટેગોટા કેટલાય કિલોમીટર દૂર સુધી આકાશમાં જોવા મળ્યા હતા.
Inferno in Sanand: કેમિકલના જથ્થાને કારણે આગ ઝડપથી પ્રસરી
મળતી માહિતી અનુસાર, આ ફેક્ટરીમાં કલર અને તેમાં વપરાતા જ્વલનશીલ કેમિકલનો મોટો જથ્થો રાખવામાં આવ્યો હતો. કેમિકલ હોવાના કારણે આગે જોતજોતામાં આખી ફેક્ટરીને પોતાની લપેટમાં લઈ લીધી હતી અને રૌદ્ર સ્વરૂપ ધારણ કર્યું હતું. ફેક્ટરીની અંદરથી આગની મોટી-મોટી જ્વાળાઓ નીકળતી જોઈને ત્યાં કામ કરતા શ્રમિકો અને આસપાસની કંપનીના લોકો જીવ બચાવવા બહાર દોડી આવ્યા હતા.
Inferno in Sanand: ફાયર બ્રિગેડનો કાફલો ઘટનાસ્થળે, યુદ્ધના ધોરણે કામગીરી
ઘટનાની જાણ થતાં જ સાણંદ અને આજુબાજુના ફાયર સ્ટેશનો પરથી ફાયર ફાઈટરોની ગાડીઓનો મોટો કાફલો તાત્કાલિક ઘટનાસ્થળે દોડી ગયો હતો. કેમિકલની આગ હોવાથી ફાયર વિભાગના જવાનોએ પાણી અને ખાસ ‘ફોમ’ (Foam) નો મારો ચલાવીને આગ પર કાબૂ મેળવવાની કામગીરી યુદ્ધના ધોરણે શરૂ કરી દીધી છે.
Inferno in Sanand: આગનું કારણ હજુ અકબંધ
આગ કયા કારણોસર લાગી (શોર્ટ સર્કિટ કે અન્ય કોઈ ટેકનિકલ ખામી) તેની સત્તાવાર વિગતો હજુ સુધી જાણી શકાઈ નથી. આ સાથે જ દુર્ઘટના સમયે ફેક્ટરીની અંદર કોઈ મજૂર કે સ્ટાફ ફસાયેલો છે કે કેમ, તે અંગે પણ હજુ સત્તાવાર માહિતીની રાહ જોવાઈ રહી છે. પોલીસ અને ફાયર વિભાગ હાલ પ્રાથમિક રીતે આગ પર કાબૂ મેળવવા અને રેસ્કયૂ કામગીરી પર જ પૂરતું ધ્યાન આપી રહ્યા છે.
વધુ સમાચાર વાંચવા માટે અંહી ક્લિક કરો
