Hard Work Wins: “મનમાં જો કંઈક કરી છૂટવાની તમન્ના હોય, તો ગરીબી કે અંતરિયાળ વિસ્તાર ક્યારેય આડે આવતા નથી” — આ ઉક્તિને સુરેન્દ્રનગર જિલ્લાના સાયલા તાલુકાના ગરાંભડી ગામના એક તેજસ્વી તારલાએ અક્ષરશઃ સાચી સાબિત કરી બતાવી છે. એક સામાન્ય ખેતી પર નિર્ભર પરિવારમાંથી આવતા અક્ષય કુકડીયાએ ધોરણ-10ની બોર્ડની પરીક્ષામાં ઝળહળતી સફળતા મેળવીને સમગ્ર ગુજરાતના ટોપ-10 વિદ્યાર્થીઓમાં પોતાનું સ્થાન અંકિત કર્યું છે.
Hard Work Wins: 99.92 PR સાથે મેળવ્યો સ્ટેટ રેન્ક-8
ગરાંભડી ગામમાં રહેતા અને સામાન્ય ખેતીકામ કરતા પ્રવીણભાઈના પુત્ર અક્ષય પ્રવીણભાઈ કુકડીયાએ ધોરણ-10ના જાહેર થયેલા પરિણામોમાં 99.92 પર્સન્ટાઈલ રેન્ક (PR) મેળવીને ઇતિહાસ રચી દીધો છે. અક્ષયે કઠિન પરિશ્રમના બળે સમગ્ર ગુજરાત રાજ્યમાં 8મો રેન્ક હાંસલ કર્યો છે. તેની આ સિદ્ધિએ સાબિત કરી દીધું છે કે સફળતા મેળવવા માટે ઊંચી સુવિધાઓની નહીં, પણ સખત મહેનત અને દ્રઢ મનોબળની જરૂર હોય છે.
Hard Work Wins: અંતરિયાળ ગામથી સફળતાના શિખર સુધીની સફર
અક્ષય પોતાના ગામથી દૂર બોટાદ જિલ્લાના સાકરડી મુકામે રહીને અભ્યાસ કરતો હતો. પિતા આખો દિવસ ખેતરમાં પરસેવો પાડીને ઘરનું ગુજરાન ચલાવતા હોવા છતાં, અક્ષયે ક્યારેય સંસાધનો કે આર્થિક મર્યાદાઓને પોતાના ભણતરમાં અવરોધ બનવા દીધા નહોતા. કોઈ પણ જાતના મોંઘા ટ્યુશન વગર, શાળાના માર્ગદર્શન અને સ્વ-મહેનતના જોરે તેણે આ અદભૂત સફળતાના શિખરો સર કર્યા છે.
Hard Work Wins: ગરાંભડી ગામ સહિત સમગ્ર સાયલા પંથકમાં ખુશીનો માહોલ
અક્ષયના આ ઝળહળતા પરિણામના સમાચાર વાયુવેગે પ્રસરતા જ ગરાંભડી ગામમાં ઉત્સવ જેવો માહોલ સર્જાયો હતો. પરિવારજનો, મિત્રો અને ગ્રામજનોએ અક્ષયને ફૂલહાર પહેરાવી અને મોં મીઠું કરાવીને વધાવી લીધો હતો. એક સામાન્ય ખેડૂતનો દીકરો આજે દેશના સૌથી મોટા બોર્ડના પરિણામોમાં ટોપર્સની યાદીમાં ચમકતા સમગ્ર સાયલા પંથકનું મસ્તક ગૌરવથી ઊંચું થઈ ગયું છે. અંતરિયાળ વિસ્તારમાં રહીને મેળવેલી આ ભવ્ય સફળતા આજે ગુજરાતના લાખો ગ્રામીણ વિદ્યાર્થીઓ માટે પ્રેરણાનો સ્ત્રોત બની છે.
વધુ સમાચાર વાંચવા માટે અંહી ક્લિક કરો
