Borrowers Brace for Higher EMIs: આગામી દિવસોમાં દેશના સામાન્ય નાગરિકો માટે ઘર અને વાહન ખરીદવું મોંઘું સાબિત થઈ શકે છે. સ્ટેટ બેંક ઓફ ઇન્ડિયા (SBI)ના એક તાજેતરના રિસર્ચ રિપોર્ટમાં દાવો કરવામાં આવ્યો છે કે રિઝર્વ બેંક ઓફ ઇન્ડિયા (RBI) મોંઘવારી પર અંકુશ મેળવવા માટે પોતાના નીતિગત વ્યાજ દરો એટલે કે રેપો રેટમાં 0.50% સુધીનો વધારો કરી શકે છે. જો આ અનુમાન સાચું ઠરશે તો કરોડો લોનધારકોના માસિક હપ્તા (EMI)માં નોંધપાત્ર વધારો થશે.
Borrowers Brace for Higher EMIs: ઓક્ટોબર અને ડિસેમ્બરની બેઠકમાં દર વધારાની શક્યતા
રિપોર્ટ મુજબ, RBI આગામી 5થી 7 ઓક્ટોબર દરમિયાન યોજાનારી મોનેટરી પોલિસી કમિટી (MPC)ની બેઠકમાં રેપો રેટમાં 0.25%નો વધારો કરી શકે છે. ત્યારબાદ ડિસેમ્બર મહિનાની બેઠકમાં પણ વધુ 0.25%નો વધારો થવાની ધારણા છે. અગાઉ ઓગસ્ટમાં મળેલી MPC બેઠકમાં મધ્યસ્થ બેંકે રેપો રેટને સતત ચોથી વખત 5.25% પર યથાવત રાખ્યો હતો. જોકે, વૈશ્વિક અને આંતરિક આર્થિક પરિસ્થિતિઓમાં આવેલા બદલાવને કારણે હવે દરો વધારવા લગભગ અનિવાર્ય મનાઈ રહ્યા છે.
Borrowers Brace for Higher EMIs: શા માટે રેપો રેટ વધારવો જરૂરી બન્યો?
SBI રિપોર્ટમાં વ્યાજ દરો વધારવા પાછળ મુખ્યત્વે બે મહત્વના કારણો રજૂ કરવામાં આવ્યા છે:
- ક્રૂડ ઓઇલમાં તેજી: મિડલ ઇસ્ટમાં સતત વકરી રહેલા તણાવ અને યુદ્ધની સ્થિતિને કારણે આંતરરાષ્ટ્રીય બજારમાં કાચું તેલ (ક્રૂડ ઓઇલ) પ્રતિ બેરલ $100ને વટાવી ગયું છે. નિષ્ણાતોના મતે તે ટૂંક સમયમાં $105થી $123 સુધી પહોંચી શકે છે.
- મોંઘવારીનો વધતો વ્યાપ: કન્ઝ્યુમર પ્રાઇસ ઇન્ડેક્સ (CPI)માં 90% યોગદાન આપતી આવશ્યક ચીજવસ્તુઓ પૈકી જે વસ્તુઓના ભાવ વધ્યા હોય તેની સંખ્યા જાન્યુઆરીમાં માત્ર 22 હતી, જે જુલાઈ સુધીમાં વધીને 53 પર પહોંચી ગઈ છે. ઇંધણ, રાંધણ ગેસ, દવાઓ અને જીવનજરૂરી સામાનના ઉત્પાદન ખર્ચમાં વધારો થતાં સ્થાનિક મોંઘવારી દર પર દબાણ વધ્યું છે.
Borrowers Brace for Higher EMIs: સામાન્ય માણસના ખિસ્સા અને બજેટ પર શું અસર પડશે?
રેપો રેટમાં થતા કોઈપણ ફેરફારની સીધી અસર બેંકો અને ગ્રાહકોના નાણાકીય વ્યવહાર પર પડે છે:
- ફ્લોટિંગ રેટ લોનધારકો: મોટાભાગની બેંકોના લોન દરો સીધા રેપો રેટ સાથે જોડાયેલા હોય છે. તેથી રેપો રેટ વધતાં જ બેંકો વ્યાજ દર વધારશે, જેના કારણે હાલ ચાલુ હોય તેવી ફ્લોટિંગ હોમ કે ઓટો લોનની EMI સીધી વધી જશે.
- નવા લોનધારકો: નવી હોમ લોન, કાર લોન કે પર્સનલ લોન લેનારા ગ્રાહકોને ઊંચા વ્યાજ દરે ધિરાણ મળશે. જોકે, ફિક્સ્ડ-રેટ લોન ધરાવતા લોકોને આ ફેરફારની કોઈ અસર નહીં થાય.
- FD રોકાણકારોને ફાયદો: રેપો રેટ વધવાનો લાભ બચતકારોને મળશે. લોન મોંઘી કરવાની સાથે બેંકો ફિક્સ્ડ ડિપોઝિટ (FD) પરના વ્યાજ દરોમાં પણ વધારો કરશે.
Borrowers Brace for Higher EMIs: ₹50 લાખની હોમ લોન પર EMIનું ગણિત
જો કોઈ ગ્રાહકે ₹50 લાખની હોમ લોન 20 વર્ષની મુદત માટે 8.25%ના ફ્લોટિંગ દરે લીધી હોય, તો અત્યારે તેનો માસિક હપ્તો આશરે ₹42,603 થાય છે. હવે જો બેંકો 0.50% વ્યાજ દર વધારે અને દર 8.75% થાય, તો નવી EMI વધીને ₹44,186 થઈ જશે. આ સ્થિતિમાં લોનધારકે દર મહિને ₹1,583 વધુ ચૂકવવા પડશે, જે વાર્ષિક ધોરણે ₹18,996નો વધારાનો આર્થિક બોજ ઊભો કરશે.
Borrowers Brace for Higher EMIs: રેપો રેટ વધારીને મોંઘવારી કેવી રીતે નિયંત્રિત થાય છે?
રેપો રેટ એ મધ્યસ્થ બેંકનું મોંઘવારી નિયંત્રણ માટેનું મુખ્ય હથિયાર છે. જ્યારે સેન્ટ્રલ બેંક પોલિસી રેટ વધારે છે, ત્યારે કોમર્શિયલ બેંકો માટે રિઝર્વ બેંક પાસેથી નાણાં મેળવવા મોંઘા બને છે. પરિણામે બેંકો સામાન્ય ગ્રાહકો અને ઉદ્યોગો માટે ધિરાણ મોંઘું કરી દે છે. લોન મોંઘી થવાથી બજારમાં નાણાંનો પ્રવાહ ઘટે છે, ગ્રાહકો ખરીદી મર્યાદિત કરે છે અને માંગ ઘટવાને કારણે છેવટે મોંઘવારી અંકુશમાં આવે છે.
વધુ સમાચાર વાંચવા માટે અંહી ક્લિક કરો
