Asian Games 2026: ભારતીય મહિલા ક્રિકેટ ટીમે એશિયન ગેમ્સ-2026માં ભારત માટે પહેલો ગોલ્ડ મેડલ જીતાવીને શાનદાર શરૂઆત કરાવી છે. મંગળવારે રમાયેલી ગોલ્ડ મેડલ મેચમાં હરમનપ્રીત કૌરની આગેવાની હેઠળની ભારતીય ટીમે શ્રીલંકાને 147 રનના વિશાળ અંતરથી હરાવ્યું. આ સાથે ભારતે 2023ની હાંગઝોઉ એશિયન ગેમ્સમાં જીતેલું મહિલા ક્રિકેટનું ગોલ્ડ ફરી પોતાના નામે કર્યું છે.
Asian Games 2026: ભારતે બનાવ્યો 216 રનનો વિશાળ સ્કોર
ટોસ જીતીને પ્રથમ બેટિંગ કરવા ઉતરેલી ભારતીય ટીમે 20 ઓવરમાં 3 વિકેટે 216 રન બનાવ્યા. આ એશિયન ગેમ્સના મહિલા ક્રિકેટમાં અત્યાર સુધીનો સૌથી મોટો સ્કોર રહ્યો. ભારત તરફથી સ્મૃતિ મંધાનાએ ધમાકેદાર 79 રન બનાવ્યા, જ્યારે રિચા ઘોષે અંતિમ ઓવરોમાં ઝડપી બેટિંગ કરીને 49 રનની અણનમ ઇનિંગ રમી.
સ્મૃતિ મંધાનાએ 45 બોલમાં 5 ચોગ્ગા અને 7 છગ્ગા ફટકાર્યા. બીજી તરફ શેફાલી વર્માએ 29 બોલમાં 48 રન બનાવ્યા. મંધાના અને શેફાલીએ પ્રથમ વિકેટ માટે 99 રનની ભાગીદારી કરીને ભારતને જોરદાર શરૂઆત અપાવી.
Asian Games 2026: શ્રીલંકાની ટીમ 69 રનમાં સમેટાઈ
217 રનના વિશાળ લક્ષ્યનો પીછો કરવા ઉતરેલી શ્રીલંકાની ટીમ ભારતીય બોલિંગ સામે ટકી શકી નહોતી. શ્રીલંકાની આખી ટીમ 15.4 ઓવરમાં માત્ર 69 રનમાં ઓલઆઉટ થઈ ગઈ. પરિણામે ભારતે 147 રનની એકતરફી જીત મેળવી અને ગોલ્ડ મેડલ પોતાના નામે કર્યો.
ભારત તરફથી સ્પિનરો અને ઝડપી બોલર્સે સતત વિકેટો ઝડપી. શ્રીલંકાની ઇનિંગ દરમિયાન દીપ્તિ શર્મા અને શ્રી ચરણીએ મહત્વપૂર્ણ વિકેટો મેળવીને બેટર્સ પર દબાણ જાળવી રાખ્યું.
Asian Games 2026: ભારતે સતત બીજી વખત એશિયન ગેમ્સમાં ગોલ્ડ જીત્યું
ભારતીય મહિલા ટીમે અગાઉ હાંગઝોઉ 2023માં પણ ગોલ્ડ મેડલ જીત્યો હતો. હવે 2026માં પણ ટાઇટલ જાળવી રાખીને ભારતે મહિલા ક્રિકેટમાં પોતાની સ્થિતિ મજબૂત કરી છે. ભારત અને શ્રીલંકા વચ્ચે આ એશિયન ગેમ્સની ફાઇનલ પહેલાં તાજેતરમાં મહિલા એશિયા કપની ફાઇનલમાં પણ મુકાબલો થયો હતો, જેમાં ભારતે શ્રીલંકાને હરાવ્યું હતું.
Asian Games 2026: ભારત માટે ઐતિહાસિક શરૂઆત
એશિયન ગેમ્સ-2026ના ચોથા દિવસે ભારતે પ્રથમ ગોલ્ડ મેડલ જીત્યો છે. મહિલા ક્રિકેટ ટીમની આ શાનદાર જીતથી ભારતીય મેડલ અભિયાનને મોટો વેગ મળ્યો છે. ભારતીય ટીમે સમગ્ર ટૂર્નામેન્ટમાં સતત આક્રમક ક્રિકેટ રમ્યું અને ફાઇનલમાં બેટિંગ તથા બોલિંગ બંને વિભાગમાં પ્રભુત્વ જમાવ્યું.
ભારતની શાનદાર સફર
ભારતે ક્વાર્ટર ફાઇનલમાં જાપાનને હરાવ્યું હતું અને ત્યારબાદ સેમિફાઇનલમાં બાંગ્લાદેશને 114 રનથી હરાવીને ફાઇનલમાં પ્રવેશ કર્યો હતો. શ્રીલંકાએ પણ પાકિસ્તાનને હરાવીને ગોલ્ડ મેડલ મેચમાં સ્થાન મેળવ્યું હતું.
વધુ સમાચાર વાંચવા માટે અંહી ક્લિક કરો: સોનિયા ગાંધીના 1980 મતદાર યાદી કેસમાં મોટો વળાંક, 29 સપ્ટેમ્બરે ફરી સુનાવણી
