Rise of ‘Mini India’ in US: અમેરિકામાં વસતા ભારતીય સમુદાય માટે ‘અમેરિકન ડ્રીમ’ આજે પણ એટલું જ પ્રબળ અને સફળ સાબિત થઈ રહ્યું છે. રાષ્ટ્રપતિ ડોનાલ્ડ ટ્રમ્પની વિઝા, ટ્રેડ અને ગ્રીન કાર્ડ સંબંધિત કડક નીતિઓ અને નિયમો છતાં ભારતીયોનું અમેરિકા જવું અને ત્યાં સ્થાયી થવાનું વલણ અવિરતપણે ચાલુ છે. છેલ્લા 20 વર્ષના ગાળામાં અમેરિકાના વિવિધ રાજ્યોમાં 50થી વધુ ‘મિની ઇન્ડિયા’ એટલે કે ભારતીયોની મોટી વસાહતો વિકસિત થઈ ચૂકી છે. આંકડાકીય અંદાજ મુજબ, આગામી પાંચ વર્ષમાં આવી વસાહતોની સંખ્યા વધીને 75 સુધી પહોંચી જશે. ટેકનોલોજી, હેલ્થકેર અને ફાર્માસ્યુટિકલ સેક્ટરમાં સતત વધી રહેલી કારકિર્દીની ઉત્તમ તકોને પગલે ભારતીય પરિવારો હવે જૂના ભીડભાડવાળા વિસ્તારો છોડીને શહેરોની નજીક આવેલા નવા અને આધુનિક વિસ્તારોમાં સ્થાયી થઈ રહ્યા છે.
Rise of ‘Mini India’ in US: સ્થાનિક અમેરિકનો કરતાં ભારતીય પરિવારોની કમાણી લગભગ બમણી
અમેરિકામાં વસતા ભારતીય મૂળના લોકોની આર્થિક સદ્ધરતા અન્ય સમુદાયોની તુલનાએ ઘણી આગળ છે. તાજેતરના અહેવાલ મુજબ, આ વિસ્તારોમાં રહેતા ભારતીય પરિવારોની સરેરાશ વાર્ષિક આવક આશરે રૂ. 1.54 કરોડ ($180,000+) નોંધાઈ છે, જે સ્થાનિક અમેરિકન પરિવારોની સરેરાશ આવક (આશરે રૂ. 80 લાખ) કરતાં લગભગ બમણી છે. ઉચ્ચ કૌશલ્ય, વ્યાવસાયિક કુશળતા અને મહેનતના દમ પર ભારતીયો અને સ્થાનિકો વચ્ચેનો આ આર્થિક તફાવત આગામી વર્ષોમાં હજુ પણ વધુ વધવાની શક્યતા નિષ્ણાતો વ્યક્ત કરી રહ્યા છે.
Rise of ‘Mini India’ in US: કેલિફોર્નિયા અને ટેક્સાસમાં ભારતીયોનો સૌથી મોટો ગઢ
અમેરિકામાં ભારતીય વસ્તીની દ્રષ્ટિએ કેલિફોર્નિયા રાજ્ય પ્રથમ સ્થાને છે. મજબૂત IT સેક્ટર અને સિલિકોન વેલીને કારણે એકલા કેલિફોર્નિયામાં 9.3 લાખથી વધુ ભારતીય વંશના લોકો વસવાટ કરે છે. આ યાદીમાં બીજા સ્થાને ટેક્સાસ રાજ્ય આવે છે, જ્યાં લગભગ 5.4 લાખ ભારતીયો સ્થાયી થયા છે.
શિક્ષણના ક્ષેત્રમાં પણ ભારતીયોનો દબદબો સ્પષ્ટપણે જોવા મળે છે. સમગ્ર અમેરિકામાં જ્યાં સામાન્ય વસ્તીમાં માત્ર 25% લોકો પાસે સ્નાતક (ગ્રેજ્યુએટ) ડિગ્રી છે, ત્યાં ભારતીય મૂળના લોકોમાં આ આંકડો 54% જેટલો ઊંચો છે. આ ઉપરાંત, માસ્ટર્સ કે પીએચડી (PhD) જેવી ઉચ્ચ ડિગ્રીઓ ધરાવતા લોકોમાં પણ ભારતીયોનો હિસ્સો 60%ની આસપાસ પહોંચે છે, જે કોઈપણ પ્રવાસી કે સ્થાનિક સમુદાયમાં સૌથી વધુ છે.
Rise of ‘Mini India’ in US: ટેક્સાસના ફ્રિસ્કોથી લઈને કેલિફોર્નિયાના ડબલિન સુધી ભારતીય રંગ
ટેક્સાસનું ફ્રિસ્કો શહેર 25 વર્ષ પહેલાં મોટાભાગે ખેતરોવાળો સાદો વિસ્તાર ગણાતો હતો. આજે ત્યાંની વસ્તી 2.5 લાખને વટાવી ગઈ છે, જેમાં લગભગ 19% લોકો માત્ર ભારતીય મૂળના છે. વર્ષ 2008માં નિર્માણ પામેલું કાર્ય સિદ્ધિ હનુમાન મંદિર આજે સમગ્ર વિસ્તારમાં ભારતીય સમુદાય માટે આસ્થા અને સામાજિક ગતિવિધિઓનું કેન્દ્રબિંદુ બન્યું છે. ફ્રિસ્કોની આસપાસ આવેલા પ્લેનો અને એલન જેવા શહેરોમાં પણ ભારતીય મંદિરો, રેસ્ટોરન્ટ્સ અને કરિયાણાની દુકાનો ઝડપથી ખૂલી રહી છે.
કેલિફોર્નિયાના ડબલિન અને સેન રેમન વિસ્તારમાં પણ ભારતીય વસ્તીનું પ્રમાણ 18% આસપાસ છે. આશ્ચર્યજનક બાબત એ છે કે ડબલિનની સ્થાનિક શાળાઓમાં અભ્યાસ કરતા કુલ વિદ્યાર્થીઓમાંથી 41% વિદ્યાર્થીઓ ભારતીય મૂળના છે. અહીંની નવી પેઢી અમેરિકન લાઇફસ્ટાઇલ સાથે દિવાળી જેવા તહેવારો ધામધૂમથી ઉજવે છે અને વીકએન્ડમાં ક્રિકેટની રમતો રમે છે. ભારતીય વાનગીઓની ભારે માંગને કારણે અહીં મોટા પાયે ભારતીય ડ્રાઇવ-થ્રુ ફૂડ આઉટલેટ્સ પણ શરૂ થઈ ચૂક્યા છે.
Rise of ‘Mini India’ in US: સિલિકોન વેલીમાં વધતો પ્રભાવ અને અમેરિકી અર્થતંત્રમાં યોગદાન
ભાસ્કર એક્સપર્ટ વિલિયમ ફ્રેના વિશ્લેષણ મુજબ, સિલિકોન વેલીમાં ભારતીયોની ભૂમિકા આવનારા સમયમાં હજુ વધુ મજબૂત અને નિર્ણાયક બનશે. ભારતીયોની આ યાત્રા આશરે 25 વર્ષ પહેલાં શરૂ થઈ હતી અને આજે તે બમણી ઝડપે આગળ વધી રહી છે. સિલિકોન વેલીના અંદાજે 35% સ્ટાર્ટઅપ્સમાં ઓછામાં ઓછો એક સહ-સ્થાપક (કો-ફાઉન્ડર) ભારતીય મૂળનો છે. આઈટી ક્ષેત્રે ભારતીયોની અસાધારણ પકડના કારણે અમેરિકાના અન્ય રાજ્યોમાં પણ ઝડપથી નવા ‘મિની ઇન્ડિયા’ કલ્સ્ટર વિકસી રહ્યા છે, જે અમેરિકી અર્થતંત્રમાં સૌથી મોટું અને સ્થિર યોગદાન આપી રહ્યા છે.
વધુ સમાચાર વાંચવા માટે અંહી ક્લિક કરો
