Nasirnagar Demolition Case:સુરતના ચર્ચિત અને વિવાદિત નાસીરનગર ડિમોલિશન કેસમાં રાજ્ય સરકારે એક મોટો અને મહત્વપૂર્ણ વહીવટી નિર્ણય લીધો છે. ગુજરાત હાઈકોર્ટના આ કેસમાં અપનાવાયેલા કડક વલણને ધ્યાનમાં રાખીને આ પગલું ભરવામાં આવ્યું છે. સુરત મહાનગરપાલિકાના કમિશનર એમ. નાગરાજની તાત્કાલિક અસરથી બદલી કરવામાં આવી છે અને તેમને ગાંધીનગર ખાતે ‘સમગ્ર શિક્ષા અભિયાન’ના સ્ટેટ પ્રોજેક્ટ ડાયરેક્ટર તરીકેની જવાબદારી સોંપવામાં આવી છે. તેમના સ્થાને સુરત જિલ્લા કલેક્ટર તેજસ પરમારને સુરત મનપા કમિશનરનો વધારાનો ચાર્જ સોંપવામાં આવ્યો છે.
Nasirnagar Demolition Case:હાઈકોર્ટની કડકાઈ અને અગાઉની કાર્યવાહી
નાસીરનગરમાં હાથ ધરવામાં આવેલી ડિમોલિશનની આક્રમક કાર્યવાહી અને તેમાં સામેલ જવાબદાર અધિકારીઓની શંકાસ્પદ ભૂમિકાને લઈને ગુજરાત હાઈકોર્ટે અત્યંત ગંભીર સવાલો ઉઠાવ્યા હતા. ન્યાયાલયની નારાજગી અને ફિટકાર બાદ તંત્ર હરકતમાં આવ્યું હતું. આ વિવાદિત કેસમાં અગાઉ બે કાર્યપાલક ઈજનેરો સહિત કુલ પાંચ જેટલા જવાબદાર અધિકારીઓને સસ્પેન્ડ કરી દેવામાં આવ્યા હતા. હવે મ્યુનિસિપલ કમિશનર સ્તરના ઉચ્ચ અધિકારીની બદલી થવાને કારણે આ સમગ્ર પ્રકરણને એક નવો જ વળાંક મળ્યો છે.
Nasirnagar Demolition Case:પ્રશાસનિક સ્તરે હલચલ
આ હાઈ-પ્રોફાઈલ બદલી અને વધારાના ચાર્જના આદેશને કારણે સુરતના રાજકીય અને પ્રશાસનિક વર્તુળોમાં ભારે ચર્ચા જાગી છે. કલેક્ટર તેજસ પરમાર હવે જિલ્લા વહીવટી તંત્રની સાથે-સાથે સુરત મહાનગરપાલિકાના વહીવટી કાર્યોની પણ દોર સંભાળશે. હાઈકોર્ટના આદેશો અને કડક રુખ સામે નગરપાલિકા તથા સરકાર દ્વારા લેવાયેલા આ પગલાંથી ભવિષ્યમાં શહેરી વિકાસ અને દબાણ હટાવ ઝુંબેશ બાબતે વહીવટી તંત્ર વધુ સાવચેત બને તેવી પૂરી સંભાવના છે. એમ. નાગરાજનની ગાંધીનગર સ્થિત શિક્ષણ વિભાગમાં થયેલી આ ટ્રાન્સફર અને કલેક્ટરને સોંપાયેલી વધારાની જવાબદારી આગામી સમયમાં કેવા નિર્ણયો લાવે છે તેના પર સૌની નજર રહેશે.
આ પણ વાંચો :સખ્તાઈના મૂડમાં CM ભૂપેન્દ્ર પટેલ, ‘જે કરવું હોય તે કરો પણ સ્વચ્છતા જોઈએ જ, નહીં તો સીધી ગ્રાન્ટ બંધ કરશું!’
