PM Modi in Rajasthan: વડાપ્રધાન નરેન્દ્ર મોદી શનિવારે રાજસ્થાનના એકદિવસીય પ્રવાસે હતા, જ્યાં તેમણે રાજ્યને કરોડો રૂપિયાના વિકાસ કાર્યોની ભેટ આપી છે. પીએમ મોદીએ બાલોતરાના પચપદરા ખાતે દેશની સૌથી આધુનિક ઓઇલ રિફાઇનરીનું ઉદ્ઘાટન કર્યું હતું અને જોધપુરમાં એરપોર્ટના નવા આધુનિક ટર્મિનલ બિલ્ડિંગનું લોકાર્પણ કર્યું હતું. આ પ્રસંગે જનમેદનીને સંબોધિત કરતા વડાપ્રધાને વૈશ્વિક તંગદિલી વચ્ચે ભારતની મજબૂત ડિપ્લોમેસી અને આર્થિક વ્યવસ્થાપનનો ચિતાર આપ્યો હતો.
PM Modi in Rajasthan: પીએમ મોદીના ભાષણની મુખ્ય વાતો: એક નજરે
- 40 દેશો પાસેથી મેળવ્યું ઈંધણ: પશ્ચિમ એશિયામાં યુદ્ધના કારણે વિશ્વભરમાં સર્જાયેલા ઊર્જા સંકટ છતાં ભારતે મજબૂત રણનીતિ અપનાવી. પહેલાં ભારત માત્ર 25-26 દેશો પાસેથી ઈંધણ ખરીદતું હતું, પરંતુ સંકટના સમયે ડિપ્લોમેસીનો ઉપયોગ કરીને 40 દેશોમાંથી તેલ આયાત કર્યું અને દેશમાં અછત સર્જાવા દીધી નહીં.
- ₹950માં રાંધણ ગેસ સિલિન્ડર: વૈશ્વિક પરિસ્થિતિઓને કારણે ગેસ સિલિન્ડરના ભાવ ₹2,000 સુધી પહોંચી શકે તેમ હતા. પરંતુ સરકારના શ્રેષ્ઠ મેનેજમેન્ટને કારણે આજે દેશમાં સિલિન્ડર ₹950ની આસપાસ મળી રહ્યો છે.
- ₹75,000 કરોડનું નુકસાન સરકારે ભોગવ્યું: એપ્રિલથી જૂન વચ્ચે આંતરરાષ્ટ્રીય બજારમાં તેલના ભાવ વધતાં પેટ્રોલ-ડીઝલ કંપનીઓને ₹75,000 કરોડનું મોટું નુકસાન થયું હતું (જેમાં એક આખી નવી રિફાઇનરી બની શકે). આ નુકસાનનો બોજ જનતા પર નાખવાને બદલે સરકારે પોતાની તિજોરીમાંથી ચૂકવ્યો હતો.
- પડકારો સામે નવું ભારત: આ વર્ષે 20 એપ્રિલે ઉદ્ઘાટનના બરાબર એક દિવસ પહેલાં રિફાઇનરીમાં આગ લાગવાની દુર્ઘટના ઘટી હતી. આ પડકાર છતાં કર્મચારીઓએ રાત-દિવસ એક કરીને ખૂબ જ ઝડપથી કામ પૂરું કર્યું. પીએમએ કહ્યું, “નવું ભારત પોતાના સંકલ્પોથી ક્યારેય પાછળ હટતું નથી કે ગતિ ધીમી કરતું નથી.”
PM Modi in Rajasthan: ‘કોઈપણ વિવાદ કે ઝઘડા વિના રાજસ્થાનને આપ્યું નર્મદાનું પાણી’
કોંગ્રેસની પૂર્વ સરકારો પર પ્રહાર કરતા પીએમ મોદીએ જણાવ્યું હતું કે, કોંગ્રેસે રાજસ્થાનના જળસંકટને દૂર કરવા માટે ક્યારેય કોઈ નક્કર કામ કર્યું નથી. ભાજપ પ્રાદેશિકતા કે ભાગલાવાદી રાજકારણમાં માનતું નથી, પણ ‘રાષ્ટ્ર પ્રથમ’ની ભાવના સાથે કામ કરે છે.
“જ્યારે હું ગુજરાતનો મુખ્યમંત્રી હતો અને રાજસ્થાનમાં બહેન વસુંધરા રાજે મુખ્યમંત્રી હતાં, ત્યારે દેશના ઘણા રાજ્યો વચ્ચે પાણી માટે લડાઈ ચાલતી હતી. રાજસ્થાનના લોકોને ચિંતા હતી કે ગુજરાત પાણી આપશે કે નહીં. પરંતુ અમે બંનેએ સાથે મળીને કોઈપણ વિવાદ, સંઘર્ષ કે ટકરાવ વિના ગુજરાતથી રાજસ્થાન સુધી નર્મદાના પાણીની વહેંચણી શક્ય બનાવી, જે આજે પણ ગામડાઓ સુધી પહોંચી રહ્યું છે.” – પીએમ નરેન્દ્ર મોદી
PM Modi in Rajasthan: જોધપુરમાં ‘UDAN-2.0’ નો પ્રારંભ અને જયપુર મેટ્રો ફેઝ-2
રિફાઇનરીના ઉદ્ઘાટન પહેલા વડાપ્રધાન સવારે જોધપુર પહોંચ્યા હતા, જ્યાં તેમણે એરપોર્ટના નવા આધુનિક ટર્મિનલ બિલ્ડિંગનું નિરીક્ષણ કરી તેનું ઉદ્ઘાટન કર્યું હતું. અહીંથી તેમણે દેશમાં હવાઈ કનેક્ટિવિટી વધારવા માટે ‘ઉડાન-2.0′ (UDAN-2.0) યોજનાનો પણ પ્રારંભ કરાવ્યો હતો. આ ઉપરાંત, તેમણે બાલોતરાથી જ વર્ચ્યુઅલ માધ્યમ દ્વારા જયપુર મેટ્રોના ફેઝ-2નો શિલાન્યાસ કર્યો હતો.
PM Modi in Rajasthan: મંચ પર ભવ્ય સ્વાગત અને યુવાનોને રોજગાર
પચપદરા ખાતે આયોજિત ભવ્ય રેલીમાં રાજસ્થાનના મુખ્યમંત્રી ભજનલાલ શર્માએ વડાપ્રધાનને શાલ ઓઢાડી અને પરંપરાગત ‘ઝરોખા’ ભેટ આપીને સ્વાગત કર્યું હતું. કાર્યક્રમ દરમિયાન પીએમ મોદીએ:
- રિફાઇનરીના કંટ્રોલ રૂમની મુલાકાત લઈને એન્જિનિયરો પાસેથી તેલ રિફાઇનિંગની પ્રક્રિયાની વિગતવાર માહિતી મેળવી.
- રિફાઇનરી પરિસરમાં એક છોડ રોપીને પર્યાવરણનો સંદેશ આપ્યો.
- સ્થાનિક યુવાનોને રોજગારીના ભાગરૂપે નિમણૂક પત્રો (Appointment Letters) સોંપ્યા.
- તેલના ટેન્કરોને લીલી ઝંડી આપીને રવાના કર્યા.
આ કાર્યક્રમમાં કેન્દ્રીય પેટ્રોલિયમ મંત્રી હરદીપ સિંહ પુરી, કેન્દ્રીય મંત્રી ગજેન્દ્ર સિંહ શેખાવત, નાગરિક ઉડ્ડયન મંત્રી રામમોહન નાયડુ અને પૂર્વ મુખ્યમંત્રી વસુંધરા રાજે સહિત મોટી સંખ્યામાં નેતાઓ અને જનમેદની ઉપસ્થિત રહ્યા હતા.
વધુ સમાચાર વાંચવા માટે અંહી ક્લિક કરો
