True Patriotism: જ્યારે લોકશાહીનું પર્વ એટલે કે ચૂંટણી આવે છે, ત્યારે નેતાઓ પક્ષપલટા અને આક્ષેપબાજીમાં વ્યસ્ત હોય છે. પરંતુ નર્મદા જિલ્લાના રસ્તાઓ પર અત્યારે એક એવો ‘લોકશાહીનો સાચો દૂત’ જોવા મળી રહ્યો છે, જેની પાસે રહેવા માટે પાકું મકાન નથી, પણ દેશ માટે અતૂટ સમજણ છે. કચરો વીણીને ગુજરાન ચલાવતા એક સામાન્ય શ્રમિકે પોતાની સાઈકલ લારીને જ મતદાન જાગૃતિનું હથિયાર બનાવી દીધું છે.
True Patriotism: પક્ષવાદથી પર, લોકશાહીનું જતન
નર્મદામાં આગામી સ્થાનિક સ્વરાજ્યની ચૂંટણીને લઈ ભાજપ, કોંગ્રેસ અને આપ (AAP) વચ્ચે ત્રિપાંખિયો જંગ જામ્યો છે. આ ગરમાગરમ માહોલ વચ્ચે આ શ્રમિકની સાઈકલ લારી સૌનું ધ્યાન ખેંચી રહી છે. તેમની લારી પર ત્રણેય મુખ્ય પક્ષોના ઝંડા એકસાથે લહેરાઈ રહ્યા છે. તેમનો ઉદ્દેશ્ય કોઈ પક્ષનો પ્રચાર કરવાનો નથી, પણ લોકોને મતદાન મથક સુધી પહોંચાડવાનો છે.
True Patriotism: “મને કોઈ પૈસા નથી આપતું, મારે જનતાને જગાડવી છે”
ચાર દીકરાના પિતા અને આખો દિવસ મહેનત કરીને રોટલો કમાતા આ શ્રમિકે હૃદયસ્પર્શી વાત કરી છે:
“મને કોઈ રાજકીય પક્ષ સાથે લેવાદેવા નથી. મને આ માટે કોઈ પૈસા પણ નથી મળતા. હું માત્ર એટલું ઈચ્છું છું કે લોકો આ ઝંડા જોઈને જાગૃત થાય અને યાદ કરે કે મતદાન કરવું આપણી ફરજ છે. દેશનું ભલું કરે તે પક્ષ સત્તામાં આવવો જોઈએ.”
True Patriotism: એસી રૂમમાં બેસતા લોકો માટે લપડાક
જે લોકો રજા માણીને મતદાન કરવા નથી જતા, તેમના માટે આ શ્રમિક એક જીવતું જાગતું ઉદાહરણ છે. ગંદકી અને કચરા વચ્ચે કામ કરવા છતાં તેમની લોકશાહી પ્રત્યેની નિષ્ઠાએ મોટા નેતાઓને પણ વિચારતા કરી દીધા છે. નર્મદામાં અત્યારે આ શ્રમિકના નિરપેક્ષ અભિયાનની ભારે પ્રશંસા થઈ રહી છે.
વધુ સમાચાર વાંચવા માટે અંહી ક્લિક કરો
અમેરિકામાં લોહીલુહાણ રવિવાર પિતાએ જ 7 સંતાનો સહિત 8 બાળકોને મોતને ઘાટ ઉતાર્યા
