ધર્મ પરિવર્તન મામલે પાકિસ્તાન કનેક્શન સામે આવ્યું
મામલાની ગંભીરતાને લઇ તપાસ શરુ, કેન્દ્રીય ગૃહમંત્રાલયે માંગ્યો રીપોર્ટ
ઉત્તર પ્રદેશના ગાઝિયાબાદમાં ધર્મ પરિવર્તનનો ચોંકાવનારો મામલો સામે આવ્યો છે. અહીં ઓનલાઈન ગેમ દ્વારા ધર્મ પરિવર્તનનો મામલો સામે આવ્યો છે. જેમાં ઓનલાઈન કર્નવઝેશન દ્વારા ત્રણ કિશોરો સહિત 4 લોકોનું ધર્મ પરિવર્તન કરવામાં આવ્યું હતું. આ મામલે ગાઝિયાબાદ પોલીસે તપાસ શરૂ કરી છે, જેમાં પાકિસ્તાન કનેક્શન હોવાના અહેવાલો મળી રહ્યા છે. આ દરમિયાન કેન્દ્રીય ગૃહમંત્રાલયે ગાઝિયાબાદ પોલીસ પાસે તપાસનો રીપોર્ટ માંગ્યો છે. પીડિતોની ફરિયાદ બાદ પોલીસને આ જાણકારી મળી છે. કારણ કે, આ કિશોરો 5 વખતની નમાજ અદા કરવા માટે ગુમ રહેતા હતા. આ કેસની તપાસ માટે ગાઝિયાબાદ પોલીસની 4 ટીમ મુંબઈના શાહનવાજને શોધવામાં લાગી ગઈ છે, જયારે અબ્દુલ રહેમાન નામના શખ્સની ધરપકડ કરવામાં આવી છે. સૂત્રો તરફથી જાણવા મળ્યું છે કે, આશરે અઢી વર્ષથી શાહનવાજ નકલી આઈડી બનાવી ધર્મ પરિવર્તનનું નેટવર્ક ચલાવી રહ્યો હતો. જેને પાકિસ્તાન તરફથી ફન્ડિંગ મળતું હોવાની પોલીસને આશંકા છે. આરોપી શાહનવાઝ સગીરોને છેતરતો હતો. સગીર ઈસ્લામ ધર્મથી આકર્ષાયો હોવાની તેને ખાતરી થઈ જાય, ત્યારે તે તેમને ઘરની નજીક મસ્જિદમાં નવાજ અદા કરવા માટે દબાણ કરતો હતો. નમાઝ અદા કરતી વખતે અન્ય કોઈ વ્યક્તિ સાથે વાત ન કરવી, પોતાના વિશે કોઈપણ માહિતી ન આપવી જેવી સૂચનાઓ પણ તેની તરફથી અપાતી હતી અને તે એવું પણ કહેતો હતો કે, 5 વખત નમાઝ અદા કર્યા બાદ જ તે યોગ્ય રીતે ઈસ્લામનો અનુયાયી બની શકશે.
