Shame in Vadodara: સંસ્કારી નગરી વડોદરા શહેરમાં કાયદો અને વ્યવસ્થાના ચિથરા ઉડાવતી અને સભ્ય સમાજની આંખો લાલ કરી દે તેવી શરમજનક ઘટના સામે આવી છે. વડોદરાના છાણી વિસ્તારમાં એક 55 વર્ષીય નરાધમે માત્ર 8 વર્ષની નિર્દોષ બાળકીને પોતાની હવસનો શિકાર બનાવી છે. આ મામલે પીડિતાના પરિવારની ફરિયાદના આધારે છાણી પોલીસે નરાધમ વિરૂદ્ધ પોક્સો (POCSO) એક્ટ હેઠળ ગુનો નોંધી કાયદેસરની કાર્યવાહી હાથ ધરી છે.
મળતી વિગતો અનુસાર, ભોગ બનનાર માસૂમ બાળકીના માતા-પિતા ગરીબ શ્રમિક પરિવારમાંથી આવે છે અને તેઓ છાણી વિસ્તારમાં ખુલ્લા ખેતરમાં ઝૂંપડું બાંધીને પોતાનું ગુજરાન ચલાવે છે. આ જ વિસ્તારમાં આવેલા એક વેર હાઉસ (ગોડાઉન)માં સફાઈ કામ કરતા 55 વર્ષીય જગદીશ ગોહિલ નામના નરાધમની નજર આ માસૂમ બાળકી પર બગડી હતી. આરોપી જગદીશ અવારનવાર માસૂમ બાળકીને ચોકલેટ અને અન્ય વસ્તુઓની લાલચ આપી પોતાની પાસે બોલાવતો હતો. આ લાલચની આડમાં નરાધમે બાળકી પર પિશાચી કૃત્ય આચર્યું હતું.
બાળકીએ સમગ્ર આપવીતી પોતાની માતાને જણાવતા પરિવારના પગ નીચેથી જમીન સરકી ગઈ હતી. આ મામલે પીડિતાની માતાએ ન્યાયની ગુહાર લગાવી છે. ઘટનાની ગંભીરતાને જોતા વડોદરા પોલીસ તુરંત એક્શનમાં આવી હતી.
Shame in Vadodara: શું કહેવું છે પોલીસ પ્રશાસનનું?
આ ચકચારી દુષ્કર્મ મામલે માહિતી આપતા વડોદરા ડીસીપી (DCP) ઝોન-2 મંજીતા વણઝારાએ જણાવ્યું હતું કે, “ઘટનાની જાણ થતાં જ છાણી પોલીસે ત્વરિત ધોરણે ગુનો નોંધી લીધો છે. માસૂમ બાળકી પર દુષ્કર્મ આચરનાર 55 વર્ષીય આરોપી જગદીશ ગોહિલ વિરૂદ્ધ કડક કલમો અને પોક્સો એક્ટ હેઠળ ગુનો દાખલ કરવામાં આવ્યો છે. પીડિતાને યોગ્ય તબીબી સારવાર અને ન્યાય અપાવવા માટે પોલીસની અલગ-અલગ ટીમો કાર્યરત છે અને આરોપીને કડકમાં કડક સજા થાય તે દિશામાં તપાસ તેજ કરવામાં આવી છે.”
વધુ સમાચાર વાંચવા માટે અંહી ક્લિક કરો
