Road Mishap in Savli: વડોદરા જિલ્લાના સાવલી તાલુકામાંથી એક અકસ્માતના મોટા સમાચાર સામે આવી રહ્યા છે. સાવલી તાલુકાના નિઝામપુર ગામ નજીક એક બેકાબૂ કાર અને રસ્તા પર આવી ગયેલા ઢોર વચ્ચે જોરદાર અકસ્માત સર્જાયો હતો. આ ગમખ્વાર અકસ્માતમાં એક ગાયનું ઘટનાસ્થળે જ કમકમાટીભર્યું મોત નીપજ્યું છે, જ્યારે કારમાં સવાર એક વ્યક્તિને ગંભીર ઈજાઓ પહોંચી છે.
Road Mishap in Savli: કારને ભારે નુકસાન, ઈજાગ્રસ્ત હોસ્પિટલ ખસેડાયા
મળતી માહિતી અનુસાર, અકસ્માત એટલો જોરદાર હતો કે કારના આગળના ભાગનો કચ્ચરઘાણ વળી ગયો હતો અને ગાડીને ભારે નુકસાન થયું છે. અકસ્માતને પગલે કારમાં સવાર વ્યક્તિ ઈજાગ્રસ્ત થતા સ્થાનિક લોકો તાત્કાલિક મદદ માટે દોડી આવ્યા હતા. ઈજાગ્રસ્ત વ્યક્તિને સારવાર અર્થે તાત્કાલિક સાવલીના સામુહિક આરોગ્ય કેન્દ્ર (CHC) ખાતે ખસેડવામાં આવ્યા છે.
Road Mishap in Savli: માર્ગ પર અફરાતફરી, પોલીસ તપાસ શરૂ
રાજમાર્ગ પર બનેલી આ ઘટનાને પગલે થોડા સમય માટે ટ્રાફિક જામ અને અફરાતફરીનો માહોલ સર્જાયો હતો. ઘટનાની જાણ થતાં જ પોલીસ કાફલો પણ ઘટનાસ્થળે પહોંચી ગયો હતો અને વાહનવ્યવહાર પૂર્વવત કરાવ્યો હતો. અકસ્માત કઈ પરિસ્થિતિમાં સર્જાયો તે અંગે પોલીસ દ્વારા વધુ તપાસ હાથ ધરવામાં આવી રહી છે. રસ્તાઓ પર રખડતા ઢોરના કારણે સર્જાતા અકસ્માતોને લઈને સ્થાનિકોમાં ફરી એકવાર ચિંતા જોવા મળી રહી છે.
વધુ સમાચાર વાંચવા માટે અંહી ક્લિક કરો: કતાર દુર્ઘટનામાં ગુમ થયેલા સુરતના સની પટેલનું મોત; ભાઈએ મૃતદેહ ઓળખ્યો, આવતીકાલે પાર્થિવ દેહ વતન લવાશે
