Rail Coach Restaurant : અમદાવાદના ખાનપાનના શોખીનો અને રેલવે મુસાફરો માટે એક આકર્ષક અને અનોખો અનુભવ સામે આવી રહ્યો છે. શહેરમાં રેલવે સ્ટેશનોને આધુનિક બનાવવાના ભાગરૂપે હવે નવતર ‘રેલ કોચ રેસ્ટોરન્ટ’ કન્સેપ્ટ ઝડપથી લોકપ્રિય થઈ રહ્યો છે. આંબલી રોડ રેલવે સ્ટેશન પર પ્રથમ રેલ કોચ રેસ્ટોરન્ટનું કામ પૂર્ણ થઈ ચૂક્યું છે અને તે આગામી એક સપ્તાહમાં લોકો માટે ખુલ્લું મુકાશે. આ ઉત્સાહ વચ્ચે પશ્ચિમ રેલવે દ્વારા શહેરીજનોને બીજી ભેટ આપતા ગાંધીગ્રામ રેલવે સ્ટેશને પણ આવું જ ભવ્ય રેલ કોચ રેસ્ટોરન્ટ શરૂ કરવાની તૈયારીઓ તેજ કરી દેવામાં આવી છે.
ગાંધીગ્રામ રેલવે સ્ટેશન ખાતે આ રેસ્ટોરન્ટ બનાવવા માટે જરૂરી જૂનો રેલવે કોચ લાવી દેવામાં આવ્યો છે. આ કોચને આધુનિક અને આકર્ષક ઇન્ટિરિયર સાથે રેસ્ટોરન્ટમાં પરિવર્તિત કરવાની કામગીરી ટૂંક સમયમાં શરૂ કરાશે. રેલવે પ્રશાસનના આયોજન મુજબ, દિવાળીના તહેવારો સુધીમાં આ બીજું રેસ્ટોરન્ટ શહેરીજનોની સેવામાં કાર્યરત કરી દેવામાં આવશે.
Rail Coach Restaurant : જૂના કોચને મળશે હેરીટેજ અને મોર્ડન ટચ
રેલવે દ્વારા બિનઉપયોગી બનેલા જૂના ડબ્બાઓને ભંગારમાં આપવાને બદલે તેનું સુંદર નવીનીકરણ કરવામાં આવી રહ્યું છે. મુસાફરો જ્યારે આ કોચમાં પ્રવેશે ત્યારે તેમને સાચે જ ચાલતી ટ્રેનમાં બેસીને ડાઇનિંગ કરી રહ્યા હોય તેવો રોમાંચક અહેસાસ મળશે. આ કોચની આંતરિક ડિઝાઇન એરકન્ડિશન્ડ, આરામદાયક બેઠક વ્યવસ્થા અને મનોહર લાઈટિંગ સાથે તૈયાર કરવામાં આવી રહી છે, જેથી પરિવાર અને મિત્રો સાથે ઉત્તમ સમય વિતાવી શકાય.
Rail Coach Restaurant : 24 કલાક મળશે સ્વાદિષ્ટ વાનગીઓનો વૈભવ
આંબલી રોડ પર શરૂ થનારું રેસ્ટોરન્ટ 24 કલાક ધમધમતું રહેશે. અહીં સ્થાનિક અમદાવાદીઓ અને મુસાફરો માટે ઉત્તર ભારતીય (પંજાબી), સ્વાદિષ્ટ ગુજરાતી થાળી, સાઉથ ઇન્ડિયન તેમજ ફાસ્ટ ફૂડની વિશાળ શ્રેણી ઉપલબ્ધ રહેશે. કોચની અંદર બેસીને ખાવા માટે ‘ઇન્ડોર ডાઇનિંગ’ ઉપરાંત બહાર ખુલ્લી હવામાં બેસી શકાય તેવી ‘આઉટડોર ડાઇનિંગ’ વ્યવસ્થા પણ ઊભી કરાઈ છે. આ ઉપરાંત મુસાફરો કે સ્થાનિક લોકો પોતાની પસંદગીનું ભોજન પેક કરાવી શકે તે માટે ‘ટેક-અવે’ અને પાર્સલ સુવિધા પણ ઉપલબ્ધ રહેશે.
Rail Coach Restaurant : ફેમિલી ડાઇનિંગ, ફન ઝોન અને સેલ્ફી પોઇન્ટ્સ
આ રેલ કોચ માત્ર જમવાનું સ્થળ ન રહેતાં એક સંપૂર્ણ ફેમિલી ડેસ્ટિનેશન બની રહે તે રીતે ડિઝાઇન કરાયું છે. બાળકો માટે ખાસ ‘ફન ઝોન’ ગેમિંગ એરિયા તૈયાર કરવામાં આવ્યો છે. યુવાનો અને મુલાકાતીઓ માટે સોશિયલ મીડિયા અનુકૂળ ‘સેલ્ફી પોઇન્ટ્સ’ પણ બનાવવામાં આવ્યા છે, જ્યાં લોકો રેલવે થીમ આધારિત યાદગાર તસવીરો લઈ શકશે. ગ્રાહકોની સુવિધા માટે સ્ટેશન પરિસરમાં પૂરતી પાર્કિંગ વ્યવસ્થા પણ રાખવામાં આવી છે.
Rail Coach Restaurant : અન્ય સ્ટેશનો પર પણ પ્રોજેક્ટનો વિસ્તાર થશે
આંબલી રોડ અને ગાંધીગ્રામ સ્ટેશનની સફળતા બાદ પશ્ચિમ રેલવે દ્વારા સાબરમતી, મહેસાણા અને ગાંધીધામ જેવા વ્યસ્ત સ્ટેશનો પર પણ આવા રેલ કોચ રેસ્ટોરન્ટ શરૂ કરવાની ભવિષ્યની યોજના છે. રેલવે તંત્ર આ પહેલ દ્વારા જૂના સંસાધનોનો શ્રેષ્ઠ પુનઃઉપયોગ કરીને ‘નોન-ફેર રેવન્યુ’ (ટિકિટ સિવાયની આવક) ઊભી કરશે અને સાથે-સાથે સ્ટેશનોના આકર્ષણમાં પણ નોંધપાત્ર વધારો કરશે. આ પ્રોજેક્ટથી અમદાવાદના ફૂડ કલ્ચરમાં એક નવું, અનોખું અને રોમાંચક પ્રકરણ ઉમેરાશે.
આ પણ વાંચો :વૈભવ અને તિલક વચ્ચે ચાલુ મેચમાં બબાલ: સ્લેજિંગ બાદ મામલો અમ્પાયર સુધી પહોંચ્યો
