Monsoon Update: રાજ્યમાં લાંબા વિરામ બાદ ફરી એકવાર મેઘરાજાએ ધમાકેદાર એન્ટ્રી કરી છે. બંગાળની ખાડીમાં સર્જાયેલા ‘વેલ-માર્ક્ડ લો પ્રેશર’ અને રાજસ્થાન પર સક્રિય સાયક્લોનિક સર્ક્યુલેશનને કારણે રાજ્યના 44 તાલુકાઓમાં વરસાદી માહોલ જામ્યો છે. જોકે, સીઝનના કુલ વરસાદની વાત કરીએ તો રાજ્યમાં હજુ પણ સામાન્ય કરતાં 31% જેટલી ઘટ જોવા મળી રહી છે.
Monsoon Update: સુરત અને ભાવનગરમાં વરસાદી મહેર
સુરતમાં દસ દિવસના લાંબા વિરામ બાદ અચાનક વાતાવરણમાં પલટો આવ્યો હતો. વેસુ સહિતના અનેક વિસ્તારોમાં વીજળીના કડાકા સાથે ધોધમાર વરસાદ વરસતા રસ્તાઓ પર પાણી ભરાઈ ગયા હતા. ભારે વરસાદને કારણે નાગરિકોને ઉકળાટમાંથી રાહત મળી છે, પરંતુ ગત સપ્તાહ જેવી જળબંબોળ સ્થિતિના પુનરાવર્તનના ડરથી શહેરીજનો ચિંતિત જોવા મળ્યા હતા. બીજી તરફ, ભાવનગરવાસીઓ પણ લાંબા સમયથી વરસાદની રાહ જોઈ રહ્યા હતા, જેનો આજે અંત આવ્યો છે. બપોર બાદ શરૂ થયેલા વરસાદને પગલે શહેરભરમાં ઠંડક પ્રસરી ગઈ છે.
Monsoon Update: વરસાદી આંકડાઓ પર એક નજર
1 જૂનથી આજ સુધીના રાજ્યના વરસાદના આંકડા ચિંતાજનક છે:
- રાજ્યમાં કુલ વાસ્તવિક વરસાદ: 170 મિમી (સામાન્ય રીતે 245 મિમી હોવો જોઈએ).
- રાજ્યમાં ઘટ: 31%.
- ગુજરાત રીજિયન: 25% ઘટ (235 મિમી વરસાદ).
- સૌરાષ્ટ્ર-કચ્છ: 38% ઘટ (122 મિમી વરસાદ).
હવામાન વિભાગની આગામી 23 જુલાઈ સુધીની આગાહી
હવામાન વિભાગના જણાવ્યા અનુસાર, હાલ રાજ્યમાં ભારે વરસાદ કે પૂર જેવી કોઈ સ્થિતિ નથી. કોઈ રેડ કે ઓરેન્જ એલર્ટ જાહેર કરાયું નથી.
| સમયગાળો | આગાહી |
| 17 જુલાઈ (આજે) | વડોદરા, સુરત, નવસારી, વલસાડ અને સૌરાષ્ટ્રમાં હળવાથી મધ્યમ વરસાદ. અમદાવાદ, ગાંધીનગર, ઉત્તર ગુજરાત અને કચ્છમાં છૂટાછવાયા વરસાદની સંભાવના. |
| 18 થી 20 જુલાઈ | સમગ્ર રાજ્યમાં ગાજવીજ સાથે હળવા થી મધ્યમ વરસાદી ઝાપટાંની શક્યતા. |
| 21 થી 23 જુલાઈ | દક્ષિણ ગુજરાતમાં વરસાદનું જોર થોડું વધી શકે છે, અન્ય વિસ્તારોમાં સ્થિતિ યથાવત્ રહેશે. |
વધુ સમાચાર વાંચવા માટે અંહી ક્લિક કરો: ઓલપાડના કીમ ગામમાં ગમખ્વાર અકસ્માત, ડમ્પરની અડફેટે આવતા મહિલા મોપેડ ચાલક ઘાયલ
