Middle East Crisis: અમેરિકા અને ઈરાન વચ્ચેનો સંઘર્ષ હવે ચરમસીમાએ પહોંચ્યો છે. જોર્ડન સ્થિત અમેરિકી સૈન્ય મથક પર થયેલા ઘાતક હુમલાના જવાબમાં અમેરિકાએ ઈરાન પર સતત આઠમી રાત્રે પણ આક્રમક હવાઈ હુમલા કર્યા છે. આ કાર્યવાહી અંગે રાષ્ટ્રપતિ ડોનાલ્ડ ટ્રમ્પે સ્પષ્ટતા કરી છે કે તેમણે પોતે આ હુમલાઓને મંજૂરી આપી છે.
Middle East Crisis: શું છે સમગ્ર મામલો?
જોર્ડનના મુવાફ્ફક સલ્તી એરબેઝ પર થયેલા મિસાઈલ હુમલામાં બે અમેરિકી સૈનિકોએ જીવ ગુમાવ્યા અને અનેક ઘાયલ થયા હતા. આ ઘટના બાદ અમેરિકાએ વળતો પ્રહાર કરતા ઈરાનના સૈન્ય ઠેકાણાં, શસ્ત્રોના ભંડાર અને લોજિસ્ટિક્સ સેન્ટરને નિશાન બનાવ્યા છે. અમેરિકી સેન્ટ્રલ કમાન્ડ (CENTCOM) ના જણાવ્યા અનુસાર, આ હુમલાઓનો મુખ્ય ઉદ્દેશ્ય હોર્મુઝ સ્ટ્રેટમાં જહાજોને ખતરો ઉભો કરવાની ઈરાની ક્ષમતાને નબળી પાડવાનો છે.
Middle East Crisis: છેલ્લા 24 કલાકના 5 મોટા અપડેટ્સ:
૧. કરારનો અંત: ઈરાને એક મહિના પહેલા થયેલા અમેરિકા સાથેના કરારમાંથી પીછેહઠ કરી છે. ઈરાને આરોપ લગાવ્યો છે કે અમેરિકાએ કરારનું ઉલ્લંઘન કર્યું છે. ૨. જાનહાનિ: ઈરાની સ્વાસ્થ્ય મંત્રાલયના દાવા મુજબ, ૨૭ જૂનથી ૧૮ જુલાઈ દરમિયાન થયેલા હવાઈ હુમલામાં ૫૦ લોકોના મોત થયા છે અને ૫૦૦થી વધુ લોકો ઈજાગ્રસ્ત થયા છે. ૩. ઈન્ફ્રાસ્ટ્રક્ચર પર હુમલા: બંદર અબ્બાસ-રૂદાન માર્ગ પરના બે પુલને ભારે નુકસાન થયું છે. આ ઉપરાંત, કુવૈત અને ઈરાનના ડિસેલિનેશન પ્લાન્ટ્સ પર હુમલાના અહેવાલો પણ સામે આવ્યા છે. ૪. હોર્મુઝ સ્ટ્રેટમાં અવરજવર: સુરક્ષાના કારણોસર હોર્મુઝ સ્ટ્રેટમાંથી પસાર થતા જહાજોની સંખ્યા ત્રણ સપ્તાહની સૌથી નીચલી સપાટીએ પહોંચી છે. ગુરુવારે માત્ર ૮ જહાજો જ ત્યાંથી પસાર થયા હતા. ૫. ઈરાનનો વળતો દાવો: ઈરાની સેનાએ દાવો કર્યો છે કે તેણે ડ્રોન વડે કુવૈતમાં અમેરિકી સૈન્યના દારૂગોળા ડેપો અને રડાર સિસ્ટમને નિશાન બનાવી છે, જોકે આ દાવાની સ્વતંત્ર પુષ્ટિ થઈ નથી.
Middle East Crisis: નાગરિકો માટે એલર્ટ
મધ્ય-પૂર્વમાં વધતા તણાવ અને પરિસ્થિતિ ગમે ત્યારે વણસી શકે તેવી આશંકાને જોતા, અમેરિકી વિદેશ મંત્રાલયે વિશ્વભરમાં રહેતા પોતાના નાગરિકો માટે ટ્રાવેલ એડવાઈઝરી જાહેર કરી છે અને વધારાની સાવચેતી રાખવા સૂચના આપી છે.
હાલમાં અમેરિકી સેન્ટ્રલ કમાન્ડે ઈરાન વિરુદ્ધના આ તબક્કાના હવાઈ હુમલા પૂરા થયાની જાહેરાત કરી છે, પરંતુ બંને દેશો વચ્ચેની તંગદિલી હજુ પણ યથાવત છે. આ સંઘર્ષમાં અત્યાર સુધીમાં કુલ ૧૬ અમેરિકી સૈનિકોએ જીવ ગુમાવ્યા છે, જે પરિસ્થિતિની ગંભીરતા દર્શાવે છે.
વધુ સમાચાર વાંચવા માટે અંહી ક્લિક કરો
