Market Bloodbath: વૈશ્વિક મોરચે અમેરિકા અને ઈરાન વચ્ચે યુદ્ધવિરામ કરાર (MoU) સત્તાવાર રીતે સમાપ્ત થવાની જાહેરાત થતાં જ આજે વૈશ્વિક બજારો સહિત ભારતીય શેરબજારમાં ભારે ગભરાટ ફેલાયો હતો. બુધવારના ટ્રેડિંગ સેશનમાં બજાર ખૂલતાની સાથે જ પ્રોફિટ બુકિંગ અને વેચવાલીનું ભારે દબાણ જોવા મળ્યું હતું. ખાસ કરીને બપોરે ૧ વાગ્યેને ૪૦ મિનિટે સેન્સેક્સ ૭૭,૬૦૦ ના સ્તરે હતો, જે માત્ર ૨૦ મિનિટમાં જ ૧,૦૦૦ પોઈન્ટ ગગડીને ૭૬,૭૦૦ ની નજીક પહોંચી ગયો હતો.
દિવસના અંતે, સેન્સેક્સ ૧,૬૭૭ પોઈન્ટ (૨.૧૫%) ના કડાકા સાથે ૭૬,૫૦૪ પર બંધ થયો હતો. જ્યારે નિફ્ટી પણ ૫૧૬ પોઈન્ટ (૨.૧૨%) ના મોટા ઘટાડા સાથે ૨૩,૮૮૨ ના સ્તરે બંધ રહ્યો હતો. આ પહેલા ગઈકાલે (૭ જુલાઈએ) પણ સેન્સેક્સ ૧૦૪ પોઈન્ટ અને નિફ્ટી ૩૨ પોઈન્ટ ઘટીને બંધ થયા હતા, પરંતુ આજનો કડાકો ઘણો મોટો સાબિત થયો છે.
Market Bloodbath: ક્રૂડ ઓઈલ 6% ઉછળ્યું, બંને દેશો વચ્ચે હુમલા તેજ
અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેની ડીલ ખતમ કરી રાત્રે શક્તિશાળી હુમલાની જાહેરાત કરી છે, જેના જવાબમાં ઈરાને પણ કુવૈત અને બહેરીનમાં અમેરિકી સૈન્ય ઠેકાણાઓને નિશાન બનાવ્યા છે. આ વૈશ્વિક તણાવના કારણે ક્રૂડ ઓઈલના ભાવમાં ૬% નો તોતિંગ ઉછાળો આવ્યો છે અને તે ફરી $૭૫ પ્રતિ બેરલની નજીક પહોંચી ગયું છે.
Market Bloodbath: સેક્ટર વાઇઝ માર્કેટ અપડેટ (Sector Performance)
આજના કડાકામાં સરકારી બેંકો (PSU Banks) અને FMCG શેર્સ સૌથી વધુ નુકસાનમાં રહ્યા હતા. વિવિધ સેક્ટર્સની સ્થિતિ નીચે મુજબ રહી:
| સેક્ટર (Sector) | બંધ લેવલ (Level) | પોઇન્ટ ફેરફાર | % ફેરફાર (% Change) |
| નિફ્ટી PSU બેંક | 8,072 | -226 | -2.72% |
| નિફ્ટી FMCG | 27,592 | -681 | -2.52% |
| નિફ્ટી બેંક | 56,743 | -1458 | -2.51% |
| નિફ્ટી પ્રાઇવેટ બેંક | 48,977 | -1248 | -2.49% |
| નિફ્ટી મીડિયા | 1,452 | -34 | -2.31% |
| નિફ્ટી રિયલ્ટી | 26,774 | -610 | -2.23% |
| નિફ્ટી ઓટો | 876 | -17 | -1.87% |
| નિફ્ટી આઇટી | 27,555 | -384 | -1.37% |
| નિફ્ટી ફાર્મા | 25,430 | -237 | -0.97% |
| નિફ્ટી મેટલ | 12,469 | -114 | -0.91% |
Market Bloodbath: વૈશ્વિક અને એશિયન બજારોની સ્થિતિ (Global Markets)
એશિયન બજારો:
એશિયાના મોટાભાગના બજારોમાં મિશ્ર અને નકારાત્મક માહોલ જોવા મળ્યો હતો, જેમાં સાઉથ કોરિયાના બજારમાં સૌથી મોટો કડાકો બોલાયો હતો.
- કોસ્પી (સાઉથ કોરિયા): 7,247 (-410 પોઈન્ટ, -5.35%)
- નિકેઈ (જાપાન): 66,819 (-1438 પોઈન્ટ, -2.11%)
- હેંગસેંગ (હોંગકોંગ): 24,199 (+703 પોઈન્ટ, +2.99%)
અમેરિકી બજાર (ગઈકાલનો બંધ):
- ડાઉ જોન્સ: 52,925 (-131 પોઈન્ટ, -0.25%)
- નૅસ્ડૅક: 25,819 (-302 પોઈન્ટ, -1.16%)
- S&P 500: 7,504 (-34 પોઈન્ટ, -0.45%)
વિદેશી રોકાણકારો (FII / DII) ની વિગત
ગઈકાલના ટ્રેડિંગ સેશનમાં વિદેશી રોકાણકારો નેટ બાયર્સ રહ્યા હતા, જ્યારે સ્થાનિક સંસ્થાગત રોકાણકારોએ વેચવાલી કરી હતી (આંકડા કરોડ રૂપિયામાં):
- DII (સ્થાનિક રોકાણકારો): તાજેતરમાં -384 | છેલ્લા 7 દિવસ: +3239 | છેલ્લા 30 દિવસ: +53100
- FII/FPI (વિદેશી રોકાણકારો): તાજેતરમાં +393 | છેલ્લા 7 દિવસ: +1680 | છેલ્લા 30 દિવસ: -11819
Market Bloodbath: બજારના કડાકાને સમજતા 4 મહત્ત્વપૂર્ણ પ્રશ્નો-જવાબો
પ્રશ્ન 1. શેરબજાર અચાનક કેમ ઘટ્યું?
જવાબ: અમેરિકા-ઈરાન તણાવ વધવાથી વૈશ્વિક સ્તરે ક્રૂડ ઓઈલના ભાવમાં 6% નો મોટો વધારો થયો છે. આનાથી રોકાણકારોને મોંઘવારી વધવાનો અને કંપનીઓનો પ્રોડક્શન કોસ્ટ (ખર્ચ) વધવાનો ડર લાગતા બજારમાં ચોમેરથી ભારે વેચવાલી આવી છે.
પ્રશ્ન 2. ક્રૂડ ઓઈલ મોંઘું થવાથી ભારત પર અસર કેમ થાય છે?
જવાબ: ભારત તેની જરૂરિયાતનું 85% થી વધુ ક્રૂડ ઓઇલ અન્ય દેશોમાંથી આયાત (Import) કરે છે. તેથી, આંતરરાષ્ટ્રીય બજારમાં તેલ મોંઘું થતાં દેશનું આયાત બિલ વધે છે અને દેશના અર્થતંત્ર તેમજ રૂપિયાના મૂલ્ય પર દબાણ આવે છે.
પ્રશ્ન 3. કયા ક્ષેત્રો પર સૌથી વધુ અસર થાય છે?
જવાબ: તેલ મોંઘું થવાથી એરલાઇન્સ, પેઇન્ટ, કેમિકલ, ટાયર, FMCG અને લોજિસ્ટિક્સ કંપનીઓનો કાચો માલ અને ટ્રાન્સપોર્ટેશન ખર્ચ વધી શકે છે. જો કે, ONGC અને ઓઇલ ઇન્ડિયા જેવી તેલ ઉત્પાદક કંપનીઓને ઊંચા ભાવનો સીધો ફાયદો મળી શકે છે.
પ્રશ્ન 4. શું પેટ્રોલ-ડીઝલ તરત મોંઘા થઈ જશે?
જવાબ: જરૂરી નથી. ભારતમાં પેટ્રોલ-ડીઝલની કિંમતો માત્ર આંતરરાષ્ટ્રીય તેલના ભાવ પર જ નહીં, પરંતુ કેન્દ્ર-રાજ્યના ટેક્સ, ડોલર સામે રૂપિયાની કિંમત અને દેશની ઓઇલ માર્કેટિંગ કંપનીઓના (OMCs) નિર્ણયો પર આધાર રાખે છે. જો કાચું તેલ લાંબા સમય સુધી મોંઘું રહેશે, તો જ કિંમતો વધવાની સંભાવના રહે છે.
વધુ સમાચાર વાંચવા માટે અંહી ક્લિક કરો
