Leopard Terror in Chhota Udaipur: જિલ્લાના પાવી જેતપુર તાલુકાના નાની રાસલી ગામે દીપડાના હુમલાની એક કંપારી છૂટી જાય તેવી ઘટના સામે આવી છે. સાંજના સમયે ઘરના આંગણે નહાઈ રહેલી એક માસૂમ બાળકી પર હિંસક દીપડાએ તરાપ મારતા સમગ્ર પંથકમાં ફફડાટ વ્યાપી ગયો છે. ગંભીર રીતે ઇજાગ્રસ્ત બાળકી હાલ હોસ્પિટલમાં સારવાર હેઠળ છે.
Leopard Terror in Chhota Udaipur: સાંજના સમયે ઓચિંતા ત્રાટક્યો કાળ
ઘટનાની વિગત એવી છે કે, નાની રાસલી ગામે રહેતા એક પરિવારની 4 વર્ષીય દીકરી શનિવારે સાંજે સાત વાગ્યાના અરસામાં ઘરના પાછળના ભાગે આવેલા વાડામાં નહાઈ રહી હતી. આ સમયે અંધારાનો લાભ લઈ ઝાડીઓમાંથી ઓચિંતા ધસી આવેલા દીપડાએ બાળકી પર જીવલેણ હુમલો કર્યો હતો. દીપડાએ બાળકીને પકડવાનો પ્રયાસ કરતા તેની ચીસાચીસથી આખું ગામ ગુંજી ઉઠ્યું હતું.
Leopard Terror in Chhota Udaipur: ગ્રામજનો દોડી આવતા બાળકીનો બચાવ
બાળકીની ચીસો સાંભળી પરિવારજનો અને આસપાસના ગ્રામજનો લાકડીઓ અને જે હાથમાં આવ્યું તે લઈને દોડી આવ્યા હતા. લોકોનું ટોળું જોઈ અને હોબાળો થતા દીપડો બાળકીને લોહીલુહાણ હાલતમાં છોડીને અંધારામાં જંગલ તરફ ભાગી છૂટ્યો હતો. જો ગ્રામજનો સમયસર ન પહોંચ્યા હોત તો મોટી જાનહાનિ થઈ શકી હોત.
Leopard Terror in Chhota Udaipur: સારવાર અને વર્તમાન સ્થિતિ
હુમલામાં બાળકીને ગંભીર ઈજાઓ પહોંચી હોવાથી તેને તાત્કાલિક પાવી જેતપુર પ્રાથમિક આરોગ્ય કેન્દ્ર ખાતે ખસેડાઈ હતી. જોકે, ઈજાઓ ઊંડી હોવાથી પ્રાથમિક સારવાર બાદ તેને વધુ સારવાર માટે બોડેલીની ખાનગી હોસ્પિટલમાં રિફર કરવામાં આવી છે.
વન વિભાગ પાસે પાંજરું ગોઠવવાની માંગ
આ ઘટનાને પગલે વન વિભાગને જાણ કરવામાં આવી છે. નાની રાસલી અને આસપાસના ગ્રામ્ય વિસ્તારોમાં હાલ ભારે ભયનો માહોલ છે. ગ્રામજનોમાં રોષ સાથે માંગ ઉઠી છે કે:
- વન વિભાગ તાત્કાલિક વિસ્તારમાં પાંજરું ગોઠવે.
- હિંસક દીપડાને વહેલી તકે પાંજરે પૂરી અન્ય વિસ્તારમાં ખસેડવામાં આવે.
- સાંજના સમયે વન વિભાગ દ્વારા પેટ્રોલિંગ વધારવામાં આવે.
વધુ સમાચાર વાંચવા માટે અંહી ક્લિક કરો
