Historic 600th Test: ભારતે પોતાની 600મી ટેસ્ટ મેચને યાદગાર બનાવતા શ્રીલંકાને 165 રનથી હરાવી શાનદાર વિજય મેળવ્યો છે. ગૉલમાં રમાયેલી પ્રથમ ટેસ્ટમાં ભારતે શ્રીલંકા સામે 372 રનનો પડકારજનક લક્ષ્યાંક રાખ્યો હતો, પરંતુ યજમાન ટીમની બીજી ઇનિંગ્સ 206 રનમાં સમેટાઈ ગઈ. આ જીત સાથે ભારતીય ટીમે ઐતિહાસિક 600મી ટેસ્ટને વિજય સાથે યાદગાર બનાવી છે.
Historic 600th Test: પડિકલની સદીથી ભારતને મજબૂત શરૂઆત
ભારતની જીતમાં દેવદત્ત પડિકલની શાનદાર બેટિંગ અને માનવ સુથારની ઘાતક બોલિંગ મુખ્ય હાઇલાઇટ રહી. પડિકલે પ્રથમ ઇનિંગ્સમાં 167 રનની શાનદાર ઇનિંગ્સ રમીને પોતાની પ્રથમ ટેસ્ટ સદી ફટકારી હતી. તેની ઇનિંગ્સમાં 15 ચોગ્ગા અને એક છગ્ગો સામેલ હતો.
ભારતે પ્રથમ ઇનિંગ્સમાં 462 રનનો મોટો સ્કોર ઉભો કર્યો હતો. તેના જવાબમાં શ્રીલંકાની ટીમ 284 રનમાં ઓલઆઉટ થઈ હતી. પરિણામે ભારતને પ્રથમ ઇનિંગ્સમાં 178 રનની મહત્વપૂર્ણ લીડ મળી હતી. બીજી ઇનિંગ્સમાં ભારતે 193 રન બનાવી શ્રીલંકા સામે 372 રનનો ટાર્ગેટ મૂક્યો હતો.
Historic 600th Test: માનવ સુથારની ઘાતક બોલિંગ
372 રનના લક્ષ્યાંકનો પીછો કરવા ઉતરેલી શ્રીલંકાની ટીમ શરૂઆતથી જ દબાણમાં જોવા મળી હતી. ભારતના સ્પિનર માનવ સુથારે શાનદાર બોલિંગ કરતાં બીજી ઇનિંગ્સમાં 6 વિકેટ ઝડપી હતી. પ્રથમ ઇનિંગ્સમાં પણ તેણે 4 વિકેટ ઝડપી હતી. આમ, મેચમાં સુથારે કુલ 10 વિકેટ ઝડપી ભારતની જીતમાં મહત્વપૂર્ણ ભૂમિકા ભજવી હતી.
શ્રીલંકાની બીજી ઇનિંગ્સ દરમિયાન એક સમયે ભારતે વિકેટની ઝડી લગાવી દીધી હતી. સુથારે એક જ ઓવરમાં ત્રણ વિકેટ ઝડપી શ્રીલંકાની બેટિંગની કમર તોડી નાખી હતી. અંતે યજમાન ટીમ 206 રનમાં ઓલઆઉટ થતાં ભારતે 165 રનથી મેચ જીતી લીધી હતી.
Historic 600th Test: 600મી ટેસ્ટ બની ખાસ
ગૉલ ટેસ્ટ ભારત માટે ઐતિહાસિક હતી. 15 ઓગસ્ટે શરૂ થયેલી આ મેચ ભારતની 600મી ટેસ્ટ હતી. ભારતે 1932માં ટેસ્ટ ક્રિકેટમાં પ્રવેશ કર્યો હતો અને 94 વર્ષ બાદ 600 ટેસ્ટનો આ ઐતિહાસિક મુકામ હાંસલ કર્યો છે.
ભારતીય ટીમની આ જીતમાં બેટિંગ, સ્પિન અને પેસ—ત્રણેય વિભાગનું મહત્વપૂર્ણ યોગદાન રહ્યું. પડિકલની સદી બાદ બોલિંગમાં માનવ સુથારના 10 વિકેટના પ્રદર્શનથી ભારતે શ્રીલંકાને કોઈ તક આપી નહોતી. આ સાથે શુભમન ગિલની આગેવાની હેઠળ ટીમ ઈન્ડિયાએ 600મી ટેસ્ટને શાનદાર વિજય સાથે યાદગાર બનાવી છે.
વધુ સમાચાર વાંચવા માટે અંહી ક્લિક કરો: ભાવનગરમાં લઠ્ઠાકાંડ: નકલી દારૂ પીવાના આક્ષેપ વચ્ચે 3 ના મોત, 17 સારવાર હેઠળ
