High Drama In Rajkot: રાજકોટ સહિત સમગ્ર સૌરાષ્ટ્રમાં આજથી બાગેશ્વરધામના પંડિત ધીરેન્દ્ર કૃષ્ણ શાસ્ત્રીના ત્રિદિવસીય કાર્યક્રમનો પ્રારંભ થઈ રહ્યો છે. જૂન 2023 બાદ એટલે કે આજે (5 જૂન, 2026ના રોજ) ફરી એકવાર બાબા બાગેશ્વરનું રાજકોટમાં ભવ્ય આગમન થઈ રહ્યું છે. પરંતુ, તેઓ રાજકોટ પહોંચે તે પહેલાં જ વિવાદની એન્ટ્રી થઈ ગઈ છે. પાટીદાર અગ્રણી પરષોત્તમ પીપળીયાએ એ-ડિવિઝન પોલીસ સ્ટેશન પહોંચીને ‘દિવ્ય દરબાર’ બંધ કરાવવા તેમજ પોતાને સુરક્ષા આપવા માટે બે અલગ-અલગ અરજીઓ કરી છે.
High Drama In Rajkot: ‘હનુમાન કથા સામે વાંધો નથી, પણ ચમત્કારના નામે અંધશ્રદ્ધા બંધ કરો’
સૌરાષ્ટ્ર સનાતન સમિતિ દ્વારા રેસકોર્સ મેદાન ખાતે 5, 6 અને 7 જૂન દરમિયાન ‘સનાતન સેતુ હનુમાન કથા’ અને ‘દિવ્ય દરબાર’નું આયોજન કરવામાં આવ્યું છે. આ અંગે પાટીદાર અગ્રણી પરષોત્તમ પીપળીયાએ જણાવ્યું કે:
“અમને હનુમાન કથા સામે કોઈ વાંધો નથી, કથા ચોક્કસપણે થવી જોઈએ. પરંતુ કથાના બહાના હેઠળ યોજાનારા કથિત ‘દિવ્ય દરબાર’નો અમે વિરોધ કરીએ છીએ. જેવી રીતે અંધશ્રદ્ધા ફેલાવનારા ધીરેન્દ્ર શાસ્ત્રીને પોલીસ સુરક્ષા આપવામાં આવે છે, તેવી જ રીતે આ કથિત ચમત્કારોનો પર્દાફાશ કરવા જઈ રહેલા અમારા જેવા આલોચકોને પણ પોલીસ પ્રોટેક્શન મળવું જોઈએ.”
High Drama In Rajkot: શું છે સમગ્ર વિવાદ અને પડકાર?
રાજકોટમાં બાબાના આગમન પૂર્વે ‘વિજ્ઞાન જાથા’ના જયંત પંડ્યા અને સ્થાનિક અગ્રણી પરષોત્તમ પીપળીયાએ બાબાના કથિત ચમત્કારોને ખુલ્લો પડકાર ફેંક્યો છે.
- રૂબરૂ જઈને પર્દાફાશ કરવાની જાહેરાત: વિરોધીઓએ પોતાની જાનનું જોખમ ખેડીને પણ દિવ્ય દરબારમાં રૂબરૂ જવાની જાહેરાત કરી છે.
- 1997ના અપહરણ કેસની ચેલેન્જ: પરષોત્તમ પીપળીયાએ વર્ષ 1997ના એક રહસ્યમય અપહરણ કેસનો ઉકેલ લાવી બતાવવા બાબા બાગેશ્વરને ખુલ્લી ચેલેન્જ આપી છે.
- બાબાનો પલટવાર: બીજી તરફ, પંડિત ધીરેન્દ્ર શાસ્ત્રીએ આ તમામ પડકારોનો સ્વીકાર કરીને સ્પષ્ટ કર્યું છે કે જેમને પણ શંકા હોય તેઓ ખુલ્લા મને દરબારમાં આવી શકે છે. જ્યારે આયોજકો આ વિરોધને સનાતન ધર્મના કાર્યોને રોકવાનો એક પ્રચાર ગણાવી રહ્યા છે.
High Drama In Rajkot: આયોજનમાં અનોખો પ્રયોગ: બાબાનો કાફલો માત્ર EV (ઇલેક્ટ્રિક વાહનો) નો રહેશે
વડાપ્રધાન નરેન્દ્ર મોદીની પર્યાવરણ અને ઊર્જા બચતની અપીલને ધ્યાનમાં રાખીને આયોજકો દ્વારા આ વખતે એક અનોખી પહેલ કરવામાં આવી છે:
- પંડિત ધીરેન્દ્ર શાસ્ત્રીના એરપોર્ટથી લઈને કથા સ્થળ સુધીના સ્વાગત કાફલામાં માત્ર ઇલેક્ટ્રિક વાહનો (EV) નો જ ઉપયોગ કરવામાં આવશે.
- ભક્તોને પણ શેરીંગ સિસ્ટમ અથવા EV વાહનોમાં આવવા અપીલ કરાઈ છે.
- રાજકોટ મનપા (RMC) સાથે સંકલન કરીને ભક્તોની સુવિધા માટે ખાસ સ્પેશિયલ ઇલેક્ટ્રિક બસોના રૂટ પણ શરૂ કરવામાં આવશે.
વધુ સમાચાર વાંચવા માટે અંહી ક્લિક કરો: મિડલ ઈસ્ટમાં ફરી યુદ્ધના ભણકારા, હિઝબુલ્લાહે સીઝફાયરનો પ્રસ્તાવ ફગાવ્યો, ઈઝરાયલના હુમલામાં 4 ના મોત, નેતન્યાહૂની બેઠક દરમિયાન વાગ્યા સાયરન
