Gujarat Weather: ગુજરાતમાં ઉનાળો હવે તેના અંતિમ તબક્કામાં પહોંચી રહ્યો છે, તેમ છતાં રાજ્યભરમાં કાળઝાળ ગરમીનો પ્રકોપ યથાવત્ જોવા મળી રહ્યો છે. હવામાન વિભાગ દ્વારા રાજ્યમાં પ્રવર્તી રહેલી ગરમી અને આગામી ચોમાસાને લઈને એક અત્યંત મહત્વની આગાહી જાહેર કરવામાં આવી છે. રાજ્યના નાગરિકોએ હજુ આગામી ત્રણ દિવસ સુધી અસહ્ય ગરમીનો સામનો કરવો પડશે, પરંતુ ત્યારબાદ તાપમાનનો પારો ગગડતાં લોકોને મોટી રાહત મળવાના સંકેતો છે.
Gujarat Weather: ત્રણ દિવસ તાપમાન 41 ડિગ્રીને પાર રહેશે, વિદ્યાનગર સૌથી ગરમ
હવામાન વિભાગના જણાવ્યા અનુસાર, હાલમાં રાજ્યના મહત્તમ તાપમાનમાં કોઈ મોટો ફેરફાર થવાની શક્યતા દેખાઈ રહી નથી. આગામી ત્રણ દિવસ સુધી રાજ્યના મોટાભાગના શહેરોમાં મહત્તમ તાપમાન 41 ડિગ્રી સેલ્સિયસ કરતાં વધુ નોંધાઈ શકે છે. આજે (16 મે) વલ્લભ વિદ્યાનગરમાં તાપમાનનો પારો રેકોર્ડબ્રેક 42.3 ડિગ્રી સેલ્સિયસ સુધી પહોંચી ગયો હતો, જેને પગલે તે રાજ્યનું સૌથી ગરમ શહેર નોંધાયું છે.
Gujarat Weather: 19મી મે બાદ ગરમી અને બફારાથી મળશે આંશિક રાહત
અસહ્ય ગરમી અને અકળામણ વચ્ચે હવામાન વિભાગે એક રાહતના સમાચાર પણ આપ્યા છે. હવામાન નિષ્ણાતોના મતે, હાલમાં એક સાયકલોનિક સર્ક્યુલેશન સિસ્ટમ (Cyclonic Circulation System) રાજ્ય તરફ સક્રિય થઈ રહી છે. આ સિસ્ટમની સાનુકૂળ અસરને કારણે આગામી ત્રણ દિવસ પછી એટલે કે 19 મે બાદ તાપમાનમાં આંશિક ઘટાડો નોંધાશે, જેથી લોકોને કાળઝાળ ગરમી અને અસહ્ય બફારાથી થોડી શાંતિ મળશે.
Gujarat Weather: આ વર્ષે ચોમાસું સમય કરતાં 5 દિવસ વહેલું બેસશે
ચોમાસાની આતુરતાથી રાહ જોઈ રહેલા દેશ અને રાજ્યના નાગરિકો તથા ખેડૂતો માટે હવામાન વિભાગે ખૂબ જ પ્રોત્સાહક અને આનંદના સમાચાર આપ્યા છે. આ વર્ષે દેશમાં ચોમાસું તેના નિયત સમય કરતાં 5 દિવસ વહેલું સક્રિય થાય તેવી પૂરેપૂરી સંભાવના છે. સામાન્ય રીતે જૂન મહિનાની શરૂઆતમાં બેસતું ચોમાસું આ વખતે 26 મેની આસપાસ જ કેરળના દરિયાકિનારે દસ્તક આપી દેશે. કેરળમાં ચોમાસાના વહેલા આગમનને પગલે ગુજરાતમાં પણ આ વર્ષે ચોમાસું તેના નિયત સમય કરતાં વહેલું શરૂ થઈ શકે છે, જે કૃષિ ક્ષેત્ર માટે ખૂબ જ ફાયદાકારક સાબિત થશે.
વધુ સમાચાર વાંચવા માટે અંહી ક્લિક કરો
