Gujarat Revenue Staff Strike: ગુજરાતના મહેસૂલી વિભાગમાં કામ કરતા 10 હજારથી વધુ કર્મચારીઓ પોતાની વિવિધ 14 પડતર માંગણીઓને લઈને આજથી અચોક્કસ મુદતની હડતાળ પર ઉતર્યા છે. કર્મચારીઓ દ્વારા લાંબા સમયથી સરકાર સમક્ષ વિવિધ માંગણીઓ રજૂ કરવામાં આવી રહી હતી, પરંતુ માંગણીઓનો યોગ્ય ઉકેલ નહીં આવતા હડતાળનો નિર્ણય લેવામાં આવ્યો હોવાનું જણાવાયું છે.
Gujarat Revenue Staff Strike: તલાટીથી મામલતદાર કચેરી સુધી અસર
હડતાળમાં તલાટી, કનિષ્ઠ મંત્રી, સર્કલ ઇન્સ્પેક્ટર, મામલતદાર કચેરી સહિત મહેસૂલી વિભાગ સાથે જોડાયેલા વિવિધ કર્મચારીઓ સામેલ થયા હોવાનું જણાવાયું છે. કર્મચારીઓના હડતાળ પર જવાથી મહેસૂલી વિભાગની દૈનિક કામગીરી પર અસર થવાની શક્યતા છે.
Gujarat Revenue Staff Strike: 14 મુખ્ય માંગણીઓને લઈને વિરોધ
કર્મચારીઓની માંગણીઓમાં પ્રમોશન, નિયમિત બદલી, જન સેવા કેન્દ્ર માટે અલગ મહેકમ, નાયબ મામલતદારોની સુવિધા અને પ્રમોશન સહિતની બાબતોનો સમાવેશ થાય છે. આ ઉપરાંત તલાટી કમ મંત્રી પાસેથી બિન-મહેસૂલી કામગીરી દૂર કરવા સહિતની માંગણીઓ પણ રજૂ કરવામાં આવી છે.
Gujarat Revenue Staff Strike: જમીન અને પ્રમાણપત્ર સંબંધિત કામગીરીને અસરની શક્યતા
હડતાળની સીધી અસર જમીનની નોંધણી, વારસાઈ એન્ટ્રી, ઈ-ધરા, 7/12 અને 8-A જેવા મહેસૂલી કામો પર પડી શકે છે. ગ્રામ્ય વિસ્તારોમાં લોકોના રોજિંદા મહેસૂલી કામકાજમાં પણ વિલંબ થવાની શક્યતા વ્યક્ત કરવામાં આવી છે.
સરકારની ચેતવણી છતાં કર્મચારીઓ હડતાળ પર
હડતાળ પહેલાં રાજ્ય સરકાર અને જિલ્લા વહીવટી તંત્ર દ્વારા કર્મચારીઓને નોટિસ આપવામાં આવી હોવાનો દાવો કરવામાં આવ્યો છે. સરકાર તરફથી સેવા સંબંધિત નિયમો અને શિસ્તભંગની કાર્યવાહી અંગે ચેતવણી આપવામાં આવી હોવા છતાં કર્મચારીઓએ પોતાની માંગણીઓના ઉકેલ માટે હડતાળનો માર્ગ અપનાવ્યો છે.
કર્મચારીઓનું શું કહેવું છે?
કર્મચારીઓનું કહેવું છે કે તેમનો વિરોધ કોઈ રાજકીય હેતુથી નહીં પરંતુ લાંબા સમયથી પડતર રહેલી ન્યાયસંગત માંગણીઓ માટે છે. માંગણીઓનો યોગ્ય ઉકેલ ન આવે ત્યાં સુધી આંદોલન ચાલુ રાખવાની ચીમકી પણ આપવામાં આવી છે.
વધુ સમાચાર વાંચવા માટે અંહી ક્લિક કરો: ભારતમાં આવશે હાઇબ્રિડ કોમ્પેક્ટ SUVની નવી લહેર: Fronx, Sonet, Toyota અને Honda વચ્ચે ટક્કર
