Gujarat Rain Update: જુલાઈ મહિનાની શરૂઆત સાથે જ ગુજરાતમાં ચોમાસું જામ્યું છે. હવામાન વિભાગ દ્વારા રાજ્યમાં ગાજવીજ સાથે ભારે વરસાદની આગાહી કરવામાં આવી છે, જેને પગલે દક્ષિણ ગુજરાતના અનેક જિલ્લાઓમાં ‘યલો એલર્ટ’ જાહેર કરાયું છે. હવામાન વિભાગના મતે ૨ જુલાઈથી વરસાદનું જોર વધશે અને ૩ તેમજ ૪ જુલાઈએ દક્ષિણ ગુજરાતમાં અત્યંત ભારે વરસાદ પડી શકે છે. નોંધનીય છે કે, ચાલુ વર્ષે જૂન મહિનામાં સરેરાશ વરસાદમાં ૮૦% ટકાની મોટી ઘટ રહી હતી અને સમગ્ર મહિનામાં માત્ર સવા ઈંચ વરસાદ નોંધાયો હતો. જોકે, જુલાઈની શરૂઆત ધમાકેદાર રહી છે.
Gujarat Rain Update: વાપીમાં આભ ફાટ્યું: ૫ ઈંચ વરસાદથી રેલવે અંડરબ્રિજ ગરકાવ
૧ જુલાઈના રોજ સવારે ૬થી ૧૦ વાગ્યા દરમિયાન રાજ્યના ૩૭ તાલુકાઓમાં વરસાદ નોંધાયો હતો. જેમાં સૌથી વધુ વાપીમાં અંદાજે ૫ ઈંચ વરસાદ ખાબકતા સમગ્ર પંથક પાણી-પાણી થઈ ગયો હતો. વાપીના ચલા રોડ, કચીગામ રોડ સહિતના વિસ્તારો જળબંબાકાર બન્યા હતા અને રેલવે અંડરબ્રિજ પાણીમાં ગરકાવ થઈ જતાં વાહનવ્યવહાર ખોરવાયો હતો. આ ઉપરાંત, વલસાડના ઉમરગામમાં પણ પોણા બે ઈંચ જેટલો વરસાદ નોંધાયો છે.
Gujarat Rain Update: સુરતમાં પ્રી-મોન્સૂન કામગીરીના ધજાગરા: સ્કૂલ વાન અને એસટી બસ ખૂંપી
સુરત શહેરમાં પહેલા જ વરસાદે મહાનગરપાલિકા (મનપા)ની પ્રી-મોન્સૂન કામગીરી અને રોડ કોન્ટ્રાક્ટરોની બેદરકારીની પોલ ખોલી નાખી છે:
- બાળકોનો આબાદ બચાવ: સુરતના લિંબાયત વિસ્તારમાં રોડ બેસી જતાં એક સ્કૂલ વાન અચાનક ખાડામાં નમીને ફસાઈ ગઈ હતી. સ્થાનિકોની દોડધામ બાદ વાનમાં સવાર બાળકોને સુરક્ષિત બહાર કાઢવામાં આવ્યા હતા, જેથી મોટી હોનારત ટળી હતી.
- એસટી બસ ફસાઈ: ઉધના નજીક પણ રોડ બેસી જવાને કારણે એક એસટી બસ રસ્તામાં ખૂંપી ગઈ હતી, જોકે આ ઘટનામાં કોઈ જાનહાનિ થઈ નથી.
- મસમોટો ભુવો: ઉધના ઝોનની ઓફિસ બહાર જ રસ્તા પર મોટો ભુવો પડતાં મનપાના અધિકારીઓ અને કર્મચારીઓમાં દોડધામ મચી ગઈ હતી.
- ખાડીમાં ક્રેન ફસાઈ: ઉધના નજીક ખાડી સફાઈ દરમિયાન અચાનક પાણીનું સ્તર વધી જતાં સફાઈ કરતી મોટી ક્રેન પાણીમાં ફસાઈ ગઈ હતી. આ અફરાતફરી વચ્ચે મનપાના કોઈ જવાબદાર અધિકારી લાંબા સમય સુધી ઘટનાસ્થળે ડોકાયા નહોતા.
Gujarat Rain Update: સૌરાષ્ટ્ર અને મધ્ય ગુજરાતમાં વરસાદી માહોલ
- વંથલી પંથક: વંથલીમાં મેઘરાજાની વિધિવત એન્ટ્રી થતાં અસહ્ય ઉકળાટ અને ગરમીથી રાહત મળી છે. જોકે, ખેડૂતો હજુ વાવણીલાયક ધોધમાર વરસાદની આતુરતાથી રાહ જોઈ રહ્યા છે.
- છોટાઉદેપુર: જિલ્લાના કવાંટ અને બોડેલીના રાજબોડેલીમાં ધોધમાર વરસાદ તૂટી પડ્યો છે, જ્યારે પાવી જેતપુર અને નસવાડીમાં ધીમીધારે વરસાદ ચાલુ રહેતાં ધરતીપુત્રોમાં ખુશીનો માહોલ જોવા મળ્યો છે.
Gujarat Rain Update: આંકડાની નજરે વરસાદની સ્થિતિ
| સમયગાળો | અસરગ્રસ્ત તાલુકા | મુખ્ય વિગત |
| છેલ્લા ૨૪ કલાકમાં | ૭૫ તાલુકા | નવસારીમાં ૪.૫૩ ઈંચ, જલાલપોરમાં ૩.૫૦ ઈંચ વરસાદ. ૨૮ તાલુકામાં ૧ ઈંચથી વધુ વરસાદ. |
| ૧ જુલાઈ (સવારે ૬થી ૮) | ૨૭ તાલુકા | વાપીમાં ૪.૧૩ ઈંચ અને ઉમરગામમાં ૧.૭૩ ઈંચ વરસાદ. |
હવામાન વિભાગની આગામી કલાકોની ચેતવણી:
છોટાઉદેપુર, વડોદરા, ભરૂચ, નર્મદા, સુરત, તાપી, નવસારી, વલસાડ તેમજ દમણ અને દાદરા નગર હવેલીમાં મધ્યમ વરસાદની સાથે ૪૧થી ૬૧ કિમી પ્રતિ કલાકની ઝડપે પવન ફૂંકાવાની શક્યતા છે.
વધુ સમાચાર વાંચવા માટે અંહી ક્લિક કરો
