Gujarat Rain Alert: ગુજરાત પર એક સાથે પાંચ શક્તિશાળી હવામાન સિસ્ટમ સક્રિય થતાં દક્ષિણ ગુજરાત અને સૌરાષ્ટ્રમાં મેઘરાજાએ રૌદ્ર સ્વરૂપ ધારણ કર્યું છે. છેલ્લા 24 કલાકમાં રાજ્યના 225 તાલુકાઓમાં ભારેથી અતિભારે વરસાદ નોંધાયો છે, જેના કારણે સર્વત્ર જળબંબાકારની સ્થિતિ સર્જાઈ છે. વલસાડના વાપીમાં સૌથી વધુ સાડા આઠ ઇંચ વરસાદ ખાબક્યો છે. હવામાન વિભાગે આજે (7 જુલાઈ 2026) પણ રાજ્યના 5 જિલ્લાઓમાં અત્યંત ભારે વરસાદનું ‘રેડ એલર્ટ’ જાહેર કર્યું છે.
Gujarat Rain Alert: 1. સુરતમાં શાળાઓ-આંગણવાડીઓમાં રજા, નવસારીમાં 26 રસ્તા બંધ
ભારે વરસાદની આફતને પગલે વહીવટી તંત્ર એક્શન મોડમાં આવ્યું છે:
- સુરતમાં રજા: સુરત જિલ્લા શિક્ષણાધિકારી (DEO) ડૉ. ભગીરથસિંહ પરમારે મોડી રાત્રે જાહેર કરેલા પરિપત્ર મુજબ, સુરત મહાનગરપાલિકા (SMC) અને તમામ નગરપાલિકા વિસ્તારની તમામ પ્રાથમિક, માધ્યમિક, ઉચ્ચતર માધ્યમિક શાળાઓ તેમજ આંગણવાડીઓમાં આજે 7 જુલાઈના રોજ સંપૂર્ણ શૈક્ષણિક રજા જાહેર કરાઈ છે. ગ્રામ્ય વિસ્તારની શાળાઓ માટેનો નિર્ણય આચાર્યો પર છોડાયો છે.
- નવસારીમાં ચક્કાજામ: નવસારીમાં કોઝવે અને અંડરપાસ પાણીમાં ગરકાવ થતાં જિલ્લાના 26 મુખ્ય રસ્તાઓ બંધ કરાયા છે, જેમાં નવસારી તાલુકાના સૌથી વધુ 13 રસ્તાઓ સામેલ છે.
- તાપીમાં અઢી ઇંચ: આજે સવારે 6 થી 8 વાગ્યા સુધીના માત્ર બે કલાકમાં જ તાપીના વાલોદમાં અઢી ઇંચ વરસાદ ખાબક્યો હતો.
Gujarat Rain Alert: 2. ઐતિહાસિક ડોસવાડા ડેમ ઓવરફ્લો, 17 ગામો હાઈએલર્ટ પર
તાપી જિલ્લાના સોનગઢમાં આવેલો ગાયકવાડી શાસન સમયનો પ્રખ્યાત ઐતિહાસિક ડોસવાડા વિયર ડેમ ઉપરવાસના ભારે વરસાદને કારણે ઓવરફ્લો થયો છે. ડેમની સપાટી પરથી 2.4 સેન્ટીમીટર જેટલું પાણી વહી રહ્યું છે અને નદીમાં 57.91 ક્યુસેક પાણી ડિસ્ચાર્જ કરાતું હોવાથી હેઠવાસના 17 ગામોને હાઈએલર્ટ કરી લોકોને નદી કિનારે ન જવા કડક સૂચના આપવામાં આવી છે.
Gujarat Rain Alert: 3. સૌરાષ્ટ્રમાં મેઘતાંડવ: અમરેલીના 7 ડેમ ઓવરફ્લો, ભાવનગરમાં આભ ફાટ્યું
- અમરેલી: છેલ્લા 48 કલાકના અનરાધાર વરસાદથી જિલ્લાના 10માંથી 7 મોટા જળાશયો ઓવરફ્લો થયા છે. ઠેબી ડેમના દરવાજા ખોલાતા નીચાણવાળા વિસ્તારોને એલર્ટ કરાયા છે. સાવરકુંડલાના ફીફાદ ગામ નજીક મેરામણ નદીના પૂરમાં ફસાયેલી એક ટ્રકમાંથી 8 લોકોનું વંડા પોલીસે સફળ રેસ્ક્યૂ કર્યું છે. લાઠીના ચાવંડ ગામે કાચું મકાન ધરાશાયી થતાં દબાયેલા બાળકને જેસીબીની મદદથી બચાવાયો છે અને 50 લોકોનું સ્થળાંતર કરાયું છે.
- ભાવનગર: ભાવનગર જિલ્લાના ઘોઘામાં સૌથી વધુ 6 ઇંચ વરસાદ નોંધાયો છે, જ્યારે ભાવનગર શહેરમાં રાત્રે 10થી 12 દરમિયાન માત્ર 2 કલાકમાં 4 ઇંચ વરસાદ ખાબકતા માર્કેટિંગ યાર્ડથી નારી ચોકડી રોડ બેટમાં ફેરવાયો હતો. મહુવામાં પણ વીજળીના કડાકા સાથે ધોધમાર વરસાદ પડ્યો છે.
Gujarat Rain Alert: 4. આદિવાસી વિસ્તારો અને અંતરિયાળ ગામોમાં તારાજીની સ્થિતિ
- નર્મદા જિલ્લો: સાગબારા (3 ઇંચ) અને ચીકદા (2.5 ઇંચ) પંથકમાં નદીઓ ગાંડીતૂર થતાં નીચાણવાળા વિસ્તારોના ઘરોમાં પૂરના પાણી ઘૂસી ગયા છે અને ગરીબોની ઘરવખરી તણાઈ ગઈ છે. સેલંબા ખાડીમાં એક ગાય તણાઈ હોવાના અહેવાલ છે, જ્યારે ગોટાપાડા પુલ પર પાણી હોવા છતાં વિદ્યાર્થીઓ જીવના જોખમે શાળાએ જવા મજબૂર બન્યા હતા.
- પાવી જેતપુર (છોટાઉદેપુર): ઝાબ પાણીબાર ગામના ટોકરવા કોતરમાં પૂર આવતા મુખ્ય કોઝવે ધોવાઈ ગયો છે, જેના કારણે બોરધા, નાની અમરોલ, સજૂલી અને દેગલા સહિતના અંતરિયાળ ગામોનો સંપર્ક તૂટી ગયો છે.
- ડાંગ જિલ્લો: સરેરાશ 2 ઇંચ વરસાદને કારણે વઘઈ અને આહવા પંથકના ત્રણ મુખ્ય રસ્તાઓ વાહનવ્યવહાર માટે અસ્થાયી રૂપે બંધ કરાયા છે.
Gujarat Rain Alert: 5. મુંબઈ રેલ વ્યવહાર ખોરવાયો: ગુજરાતની 3 મુખ્ય ટ્રેનો રદ
પાલઘર રેલવે સ્ટેશન અને મુંબઈ ડિવિઝનમાં રેલવે ટ્રેક પર પાણી ભરાઈ જવાના કારણે પશ્ચિમ રેલવેની સેવાઓ ખોરવાઈ છે. રેલવે પ્રશાસન દ્વારા 16 ટ્રેનો સંપૂર્ણ રદ, 15 શોર્ટ ટર્મિનેટ અને 26 ટ્રેનો મોડી દોડાવવામાં આવી રહી છે. જેમાં ગુજરાતની 3 મુખ્ય ટ્રેનો આજે (07 જુલાઈ) સંપૂર્ણ રદ કરાઈ છે:
- પોરબંદર-દાદર એક્સપ્રેસ (19016)
- વેરાવળ-બાંદ્રા ટર્મિનસ એક્સપ્રેસ (19218)
- ભાવનગર ટર્મિનસ-આસનસોલ એક્સપ્રેસ (12941)
રેલવે તંત્રએ મુસાફરોને ઘરની બહાર નીકળતા પહેલાં ટ્રેનનું ‘લાઈવ સ્ટેટસ’ ચેક કરવા ખાસ અપીલ કરી છે. બીજી તરફ, વાપીમાં ભારે વરસાદથી રેલવે અંડરપાસ બંધ થતાં પાલિકાની પ્રી-મોન્સૂન કામગીરીની પોલ ખૂલી ગઈ છે અને સ્થાનિકોમાં ભારે નારાજગી જોવા મળી રહી છે.
આશ્ચર્યજનક વિગત: એક તરફ આખું રાજ્ય પાણી-પાણી છે, ત્યારે 7 જુલાઈ આવી ગઈ હોવા છતાં રાજ્યના 8 તાલુકા એવા છે જ્યાં હજી સુધી મોસમનો એક પણ વરસાદ પડ્યો નથી, જેમાં 6 તાલુકા એકલા કચ્છ જિલ્લાના છે.
વધુ સમાચાર વાંચવા માટે અંહી ક્લિક કરો
