PM Modi in Indonesia: વડાપ્રધાન નરેન્દ્ર મોદી સોમવારે ઇન્ડોનેશિયાની મુલાકાતે પહોંચ્યા છે. વડાપ્રધાન બન્યા પછી પીએમ મોદીનો આ ત્રીજો ઇન્ડોનેશિયા પ્રવાસ છે, જ્યારે તેમના કાર્યકાળનો આ 102મો વિદેશ પ્રવાસ છે. પીએમ મોદીનું વિમાન ઇન્ડોનેશિયાની સરહદમાં પ્રવેશતાની સાથે જ ત્યાંના ફાઇટર જેટ્સે તેમના વિમાનને હવામાં એસ્કોર્ટ કરીને ભવ્ય સ્વાગત કર્યું હતું. એરપોર્ટ પર ઇન્ડોનેશિયાના રાષ્ટ્રપતિ પ્રબોવો સુબિયાંતોએ પીએમ મોદીનું ઉષ્માભર્યું સ્વાગત કર્યું હતું.
PM Modi in Indonesia: ₹2,500 કરોડની બ્રહ્મોસ મિસાઈલ ડીલ મુખ્ય એજન્ડા
બંને દેશોના નેતાઓ વચ્ચે યોજાનારી દ્વિપક્ષીય બેઠકમાં સંરક્ષણ ક્ષેત્રે મોટો નિર્ણય લેવાઈ શકે છે. આ યાત્રા દરમિયાન ભારત અને ઇન્ડોનેશિયા વચ્ચે આશરે ₹2,500 કરોડના બ્રહ્મોસ સુપરસોનિક ક્રુઝ મિસાઈલ સિસ્ટમનો સંભવિત સોદો ફાઈનલ થવાની પ્રબળ સંભાવના છે. જો આ કરાર પર મહોર લાગશે, તો ફિલિપાઇન્સ પછી ઇન્ડોનેશિયા ભારત પાસેથી બ્રહ્મોસ ખરીદનાર બીજો વિદેશી દેશ બનશે. ઉલ્લેખનીય છે કે બ્રહ્મોસ મિસાઈલ ભારતની DRDO અને રશિયાની ‘એનપીઓ મશીનોસ્ટ્રોયેનિયા’નું સંયુક્ત સાહસ છે, જે વિશ્વની સૌથી ઝડપી ઓપરેશનલ સુપરસોનિક ક્રુઝ મિસાઈલોમાંની એક છે.
PM Modi in Indonesia: ઐતિહાસિક પ્રમ્બાનન શિવ મંદિરની મુલાકાત લેશે પીએમ
આ પ્રવાસ દરમિયાન વડાપ્રધાન મોદી ઇન્ડોનેશિયાના સૌથી મોટા અને પ્રખ્યાત હિન્દુ મંદિર ‘પ્રમ્બાનન’ની મુલાકાત પણ લેશે. 9મી સદીમાં બનેલું આ ભવ્ય મંદિર ભગવાન શિવ, વિષ્ણુ અને બ્રહ્માને સમર્પિત છે અને તે યુનેસ્કોની (UNESCO) વિશ્વ ધરોહર સૂચિમાં સામેલ છે.
PM Modi in Indonesia: સુરક્ષાની દૃષ્ટિએ સાબાંગ પોર્ટ ભારત માટે અતિ મહત્વનું
ભારત અને ઇન્ડોનેશિયા વચ્ચે વડાપ્રધાન મોદીની 2018ની જકાર્તા યાત્રા દરમિયાન સાબાંગ પોર્ટના વિકાસ અને દરિયાઈ સહયોગ વધારવા પર સહમતિ બની હતી. આ પોર્ટ ભારતની સરહદ એટલે કે અંદમાન અને નિકોબાર દ્વીપસમૂહની ખૂબ જ નજીક આવેલું છે. આ પોર્ટના વિકાસથી બંને દેશો વચ્ચે દરિયાઈ સંપર્ક, લોજિસ્ટિક સહયોગ અને હિંદ મહાસાગરમાં દરિયાઈ સુરક્ષા વધુ મજબૂત બનશે.
PM Modi in Indonesia: 85% મુસ્લિમ વસ્તી છતાં ઇન્ડોનેશિયા પર હિન્દુ સંસ્કૃતિની ઊંડી છાપ
ઇન્ડોનેશિયા વિશ્વમાં સૌથી વધુ મુસ્લિમ વસ્તી ધરાવતો દેશ છે, તેમ છતાં તેની સાંસ્કૃતિક વિરાસત ભારતીય હિન્દુ-બૌદ્ધ સભ્યતા સાથે 2,000 વર્ષ જૂનો સંબંધ ધરાવે છે. ભારતનું ઇન્ડોનેશિયા પર ક્યારેય શાસન નહોતું, છતાં અહીંની સંસ્કૃતિમાં ભારત વણાયેલું છે:
- અહીંની સરકારી એરલાઇનનું નામ ‘ગરુડ એરલાઇન’ છે.
- દેશની ચલણી નોટો પર ભગવાન ગણેશજીની તસવીર છપાઈ ચૂકી છે.
- ઇન્ડોનેશિયાના બાલી અને જાવામાં આજે પણ રામાયણ અને મહાભારત પર આધારિત નૃત્ય-નાટકો અને રામલીલા ખૂબ જ પ્રચલિત છે.
PM Modi in Indonesia: PM મોદીની અગાઉની ઇન્ડોનેશિયા યાત્રાઓ
પીએમ મોદી આ પહેલા મે 2018માં પ્રથમ વખત ઇન્ડોનેશિયા ગયા હતા. ત્યારબાદ સપ્ટેમ્બર 2023માં તેઓ જકાર્તામાં આયોજિત 20મી આસિયાન (ASEAN)-ભારત સમિટ અને 18મી ઇસ્ટ એશિયા સમિટમાં ભાગ લેવા પહોંચ્યા હતા. હવે આ ત્રીજી મુલાકાત બંને દેશોના વ્યૂહાત્મક અને આર્થિક સંબંધોને નવી ઊંચાઈએ લઈ જશે.
વધુ સમાચાર વાંચવા માટે અંહી ક્લિક કરો
નિફ્ટીમાં 160 પોઈન્ટનો જોરદાર વધારો, વિદેશી રોકાણકારો (FII) ની ₹1,355 કરોડની ખરીદીથી બજાર ગુલઝાર
