Fire Fury in Bharuch: ભરૂચ જિલ્લાના ઔદ્યોગિક હબ ગણાતા ઝઘડિયા GIDCમાં આજે એક મોટી દુર્ઘટના સર્જાઈ છે. ઝઘડિયાની મેટ્રોપોલિટન એક્ઝીચેમ કંપનીમાં પ્રચંડ વિસ્ફોટ સાથે ભીષણ આગ ફાટી નીકળી હતી. આ અકસ્માતમાં કંપનીમાં ફરજ બજાવતા 10થી વધુ કામદારો ગંભીર રીતે દાઝી જતાં ઔદ્યોગિક વસાહતમાં અરેરાટી વ્યાપી ગઈ છે.
Fire Fury in Bharuch: ધડાકાથી ધ્રૂજી ઉઠી ધરા: કિલોમીટરો સુધી દેખાયા ધુમાડા
પ્રાપ્ત વિગતો અનુસાર, કંપનીના પ્લાન્ટમાં અચાનક કોઈ ટેકનિકલ કારણોસર જોરદાર બ્લાસ્ટ થયો હતો. આ વિસ્ફોટ એટલો ભયાનક હતો કે તેનો અવાજ આસપાસના ગામો સુધી સંભળાયો હતો. બ્લાસ્ટ બાદ તરત જ આખી કંપની આગની લપેટમાં આવી ગઈ હતી. આકાશમાં કાળા ડિબાંગ ધુમાડાના ગોટેગોટા 5 થી 7 કિલોમીટર દૂરથી પણ સ્પષ્ટ જોઈ શકાતા હતા, જે આગની વિકરાળતા દર્શાવે છે.
Fire Fury in Bharuch: કામદારોમાં મચી દોડધામ: 10થી વધુ દાઝ્યા
જ્યારે બ્લાસ્ટ થયો ત્યારે કંપનીમાં અનેક કામદારો શિફ્ટમાં કામ કરી રહ્યા હતા. વિસ્ફોટ થતાની સાથે જ જીવ બચાવવા માટે કામદારોમાં ભાગદોડ મચી ગઈ હતી. જોકે, પ્લાન્ટની નજીક કામ કરી રહેલા 10થી વધુ કામદારો આગની જપેટમાં આવી ગયા હતા અને ગંભીર રીતે દાઝ્યા હતા. તમામ ઇજાગ્રસ્તોને તાત્કાલિક એમ્બ્યુલન્સ મારફતે અંકલેશ્વરની જયાબેન મોદી હોસ્પિટલ ખાતે ખસેડવામાં આવ્યા છે, જ્યાં તેમની સારવાર ચાલી રહી છે.
Fire Fury in Bharuch: ફાયર ફાઈટરોનો મોરચો: આગ પર કાબૂ મેળવવા મથામણ
ઘટનાની જાણ થતા જ ઝઘડિયા GIDC, અંકલેશ્વર અને ભરૂચથી ફાયર ટેન્ડરોનો કાફલો ઘટનાસ્થળે દોડી આવ્યો હતો. કેમિકલ યુનિટ હોવાને કારણે આગ ઝડપથી પ્રસરી રહી હતી, જેને રોકવા માટે ફાયર ફાઈટરો દ્વારા ફોમ અને પાણીનો મારો ચલાવવામાં આવી રહ્યો છે. હાલમાં પણ આગ પર સંપૂર્ણ કાબૂ મેળવવાના પ્રયાસો યુદ્ધના ધોરણે ચાલુ છે.
Fire Fury in Bharuch: તપાસના ચક્રો ગતિમાન
આ બ્લાસ્ટ કયા કારણોસર થયો – રીએક્ટરમાં ખામી હતી કે ગેસ લીકેજ – તે હજુ સુધી સ્પષ્ટ થયું નથી. વહીવટી તંત્ર અને ફેક્ટરી ઇન્સ્પેક્ટર દ્વારા આગ પર કાબૂ મેળવ્યા બાદ તપાસ હાથ ધરવામાં આવશે. આ ઘટનાને પગલે આસપાસની કંપનીઓમાં પણ સાવચેતીના ભાગરૂપે કામગીરી અટકાવી દેવામાં આવી છે.
વધુ સમાચાર વાંચવા માટે અંહી ક્લિક કરો
બંગાળમાં પ્રથમ તબક્કામાં બપોર સુધીમાં 62% થી વધુ મતદાન, તમિલનાડુમાં પણ ભારે ઉત્સાહ
